Helgi Sigurðsson, skopteiknari Morgunblaðsins, opinberar að því er virðist rasískar skoðanir sínar í teikningu er birtist eftir hann í Morgunblaðinu síðastliðinn laugardag.
Helgi Sigurðsson
Þar má sjá Hönnu Birnu sitja í skammakróknum við hliðina á auðu hásæti „himnaríkisráðherra“ en hún spyr í talblöðru hvort Tony Omos viti af þessu. Neðst á myndinni stendur svo: „Hrakin úr embætti með sögulegu Nígeríusvindli“.
Myndin, sem er ósmekkleg svo ekki sé minna sagt, getur jafnframt varðað við almenn hegningarlög, en þar segir í 233. grein:
233. gr. a. Hver sem með háði, rógi, smánun, ógnun eða á annan hátt ræðst opinberlega á [mann eða hóp manna]1) vegna þjóðernis þeirra, litarháttar, [kynþáttar, trúarbragða eða kynhneigðar]1) sæti sektum …2) eða fangelsi allt að 2 árum.]
Myndina mætti túlka á marga vegu: sem háð, róg og smánun vegna þjóðernis sem og litarháttar. Tony Omos er þar stillt upp sem Nígeríusvindlara en eins og alþjóð veit þá er það fjarri sanni. Tony var sendur úr landi í trássi við Dyflinnarreglugerðina sem og Barnasáttmála Sameinuðu þjóðanna og til þess að réttlæta það lögbrot var persónuupplýsingum um hann og þá er honum stóðu nærri lekið úr innanríkisráðuneytinu. Ekki var látið þar við sitja og rógburði um Tony var bætt við minnisblaðið. Hanna Birna var svo hrakin úr embætti fyrir hversu ömurlega hún stóð að lekamálinu svokallaða og kom Tony Omos þar hvergi nærri.
Erfitt er að túlka myndina á annan hátt en svo að henni sé beinlínis ætlað að ala á fordómum gegn Nígeríubúum, að hæðast að Tony sem innanríkisráðuneytið braut á eins og frægt er orðið og tengja hann ómaklega við glæpagengi sem vissulega þrífast í Nígeríu en Tony hefur aldrei verið tengdur við.
Helgi er ekki einn um að draga þessa tengingu en DV greindi frá því í janúar síðastliðnum að Einar K. Guðfinnsson, forseti Alþingis, líkti virtu nígersku dagblaði, The Nation, við Nígeríusvindl vegna greinar sem birtist þar um lekamálið.
Við spyrjum Halldór og Einar hvort þeir viti að hann búi á Íslandi 2014 og að hatursáróður sem þessi stangist mögulega á við lög?
