Hagstæðasti tíminn til að hefja afnám haftanna var síðla árs 2013. Fyrri ríkisstjórn hafði skilið eftir öflug vopn fyrir glímuna við vogunarsjóðina, sem Sigmundur og Bjarni eru loksins núna að taka í notkun. Vopnin fólust í breytingunum á gjaldeyrislögum sem við keyrðum í gegn á einni nóttu 12. mars ári 2012, sem læstu inni allar gjaldeyriseigur slitabúanna. Þarmeð komust vogunarsjóðirnir hvorki lönd né strönd nema á forsendum Íslendinga. Þetta var langmikilvægasta skrefið í að ná undirtökum á kröfuhöfum.
Athyglisvert er, að Sjálfstæðisflokkurinn og Framsókn studdu ekki þessa afdrifaríku breytingu á sínum tíma.
Langvinn átök milli Bjarna og Sigmundar um s.k. gjaldþrotaleið, sem Sigmundur vildi fara, settu hins vegar alla undirbúningsvinnu að afnámi haftanna í frost. Sl. haust kom svo í ljós með hæstarréttardómi að gjaldþrotaleið Sigmundar var ófær. Þetta er ástæðan fyrir því að ríkisstjórnin hefur tapað einu og hálfu ári í undirbúningi að afnámi haftanna. Hún er fyrst núna að ráðast í verkið – alltof seint.
Hvað kostar töfin Ísland? – Viðskiptaráð mat það svo á síðasta ári að hvert ár undir höftum kostaði íslensk fyrirtæki 80 milljarða. Töf í eitt og hálft ár hefur því líklega kostað Ísland 120 milljarða! –
Dýr myndi Sigmundur allur….