Hinn íslenski Reyka vodki spilar örlitla rullu í fjórðu og nýjustu seríu House of Cards. Reyka Vodki er í eigu skoska fyrirtækisins William Grant & Sons en er bruggaður í Borganesi af Þórði Sigurðssyni. Hjá Vífifell fengust þær upplýsingar að Reyka væri þegar orðið nokkuð stórt vörumerki í Bandaríkjunum. Það kæmi því ekki á óvart að Reyka væri meðal þeirra drykkja sem sæust í þáttunum. Um hundrað þúsund lítrar af Reyka eru fluttir út frá Íslandi á mánuði samkvæmt upplýsingum frá Vífilfell.
Reyka er bruggaður með samskonar tækjum og eru venjulega nýtt til ginframleiðslu. Í stað blöndu berja og kryddjurta er vodkinn síaður í gegnum hraun. Í samtali við Kvennablaðið sagði Þórður Sigurðsson að sú hugmynd hafi kveiknað hjá William Grant & Sons eftir ferðalag til Íslands þar sem vatn sem síast hafði í gegnum hraun var í boði. Þá sagði Þórður staðsetningu verksmiðjunar skipti líka nokkru máli. Áfengi sé þannig efniviður að lykt í umhverfinu geti smitast í áfengið. „Það má ekki slá grasið hér í kringum verksmiðjuna nema með okkar leyfi vegna þess að í einstaka tilvikum er hætta á að graslyktin smitist í bragðið.“ Ísland hafi því marga kosti þegar kemur að framleiðslu vodka.
Það er Doug Stamper, starfsmannastjóri Underwood, sem freistað er til drykkju áfengis, þar á meðal Reyka, á meðan hann gistir á hóteli. House of Cards, sem er flaggskip Netflix efnisveitunnar, fjallar um Francis Underwood, sem leikinn er af Kevin Spacey, óbilgjarnan og grimman stjórnmálamann sem lætur fátt standa í vegi fyrir eigin póltiíska metnaði. Þættirnir fylgja ferli Underwood frá stöðu hans sem þingflokkssvipu Demókrata í fulltrúadeild Bandaríkjaþings til Hvíta hússins. Opnað var fyrir áhorf fjórðu seríu þáttanna í byrjun mars. Á Íslandi hafa þættirnir verið í sýningu á RÚV undir nafninu Spilaborgin