Magn úrgangs frá framkvæmdum hefur aukist um tuttugu prósent frá sama tímabili í fyrra. Þetta sýna tölur Sorpu en þær taka til úrgangs frá framkvæmdum á höfuðborgarsvæðinu og Fréttablaðið fjallar um í dag.
Björn Halldórsson, framkvæmdastjóri Sorpu, segir við blaðið að magnaukningin hljóti að tengjast uppgangi íslensks efnahags.
„Ég tel að það sé frekar augljóst. Fólk hefur greinilega meira á milli handanna,“ segir Björn við Fréttablaðið en magn úrgangs frá framkvæmdum nálgast tölur ársins 2007 þegar mest var. Til framkvæmdaúrgangs telst litað og ólitað timbur, grófur úrgangur frá byggingarframkvæmdum og innréttingar.
