Svandís Svavarsdóttir skrifar:
Mikilvæg tíðindi hafa orðið í framkvæmd náttúruverndar á Íslandi. Tíðindin felast í því að úrskurðarnefnd umhverfis- og auðlindamála hefur fellt þann úrskurð að Landsneti bæri að stöðva framkvæmd við lagningu Þeistareykjalínu og Kröflulínu.
Úrskurðarnefndin mun á meðan fjalla um kæru Landverndar vegna útgáfu sveitarfélagsins á framkvæmdaleyfi fyrir línurnar og ljóst er að ákvörðun nefndarinnar tefur framkvæmdirnar um tæplega heilt ár.
Í nóvember síðastliðnum samþykktum við á Alþingi ný náttúruverndarlög sem m.a. fólu í sér auknar varnir fyrir íslenska náttúru, þar á meðal var styrkt svokölluð sérstök vernd fyrir tiltekin náttúrufyrirbæri. Varúðarreglan var því loks innleidd í íslenskan rétt og þar kemur m.a. fram að óheimilt sé að raska tilteknum náttúrufyrirbærum nema almannahagsmunir krefjist þess og annarra kosta hafi sannarlega verið leitað.
Í máli Þeistareykjalínu og Kröflulínu, liggur fyrir að að óafturkræfra áhrifa muni gæta á línuleiðinni samkvæmt umhverfismati Skipulagsstofnunar. Þar með sé ekki verjandi að fara í framkvæmdina án þess að það liggi ljóst fyrir hvort rökstuðningur sé nægilegur samkvæmt náttúruverndarlögum. Efnislegt mat þarf að eiga sér stað áður en lengra er haldið.
Hér er um að ræða mikilvæg þáttaskil í framkvæmd náttúruverndar á Íslandi. Með úrskurðinum liggur fyrir mikilvæg viðurkenning á stöðu svæða sem njóta verndar samkvæmt íslenskum náttúruverndarlögum. Það er vel og meira en það.
Vinstri græn hafa alltaf lagt áherslu á mikilvægi þess að náttúran njóti vafans í raun og við fögnum því sérstaklega að sú sé orðin raunin í þessu máli. Þannig varð breytingin ekki bara á lagabókstafnum sjálfum með öllum greiddum atkvæðum hér í þingsal í fyrra, heldur liggur nú fyrir að staða íslenskrar náttúru í lögum er umtalsvert betri en hún var fyrir gildistöku nýrra laga.
Það eru jákvæð og mikilvæg tíðindi náttúrunni í hag.
Höfundur er þingmaður VG.
