Quantcast
Channel: Kvennablaðið
Viewing all articles
Browse latest Browse all 8283

Gústaf Níelsson mun leiða Þjóðfylkinguna í Reykjavík norður

$
0
0

„Af margvíslegum toga geta þær áskoranir verið, sem lífið og tilveran leggur mönnum á herðar. Sumar geta verið léttar, en aðrar þungar, jafnvel blýþungar. Nú hef ég fengið eina blýþunga í fangið,“ skrifar Gústaf Níelsson sagnfræðingur á Facbook í gær. Hin blýþunga áskorun sem hann hefur fengið í fangið er að leiða lista Íslensku þjóðfylkingarinnar í Reykjavík norður í komandi kosningum.

„Til mín hafa leitað foringjar Íslensku þjóðfylkingarinnar og óskað eftir því að ég skipi efsta sæti á lista flokksins í Reykjavíkurkjördæmi norður vegna alþingiskosninganna 29. október næstkomandi og tjáðu þeir mér jafnframt að alger einhugur væri um þessa tilhögun í Kjördæmisráði flokksins í Reykjavík. Satt best að segja kom þetta nokkuð flatt upp á mig, enda verið handgenginn Sjálfstæðisflokknum um áratugaskeið og gegnt fyrir þann flokk margvíslegum trúnaðarstörfum,“ skrifar Gústaf.

„Þó verð ég að játa, að mér hefur hin síðari misseri þótt sem leiðir okkar liggi ekki lengur saman af jafnmikilli einlægni og forðum. Kemur þar margt til og mun ég gera gleggri grein fyrir því síðar.

Eftir vandlega íhugun hef ég afráðið að verða við þessari ósk og mun leiða lista Íslensku þjóðfylkingarinnar í [Reykjavík norður] í komandi alþingiskosningum. Afstöðu minni ræður mest að ég treysti ekki Sjálfstæðisflokknum í þeim málum, sem heitast brenna á allri Evrópu um þessar mundir, en það eru málefni hælisleitenda og flóttamanna og íslamsvæðing álfunnar með fulltingi vinstri róttæklinga allra flokka. Undanlátssemi Sjálfstæðisflokksins í þessum fullveldis- og sjálfstæðismálum þjóðarinnar er slík að ekki verður við unað. Um þau ósköp bera nýsamþykkt lög um málefni útlendinga, sem taka eiga gildi um næstu áramót, skýrast vitni.“

Starfað í Sjálfstæðisflokknum

Árið 2015 var Gústaf meðflutningsmaður með Jóni Magnússyni, hæstaréttaögmanni og fyrrverandi Alþingismanni, að ályktun á landsfundi Sjálfstæðisflokksins. Ályktunin snéri að málefnum innflytjenda og flóttafólks og var í anda þeirra beggja ekki innflytjendum né flóttafólki til framdráttar. Gústaf fór í pontu og ætlaði að tala fyrir tillögunni. Þegar upp í pontu var komið var púað á hann og framsaga hans trufluð. „Ég fer í púltið og segi: Hér sé ég engan mann með túrban, hér sé ég engan blökkumann, hér sé ég enga konu með blæju. Um hvaða fjölmenningu eruð þið eiginlega að tala hér?“ Þá var það umsvifalaust notað að ég væri að tala illa um blökkumenn. En, ég var nú bara að lýsa því sem ég sá,“ sagði Gústaf við Vísi um málið.

Framsókn vildi hann í mannréttindaráð

Framsóknarflokkur og flugvallavinir skipuðu Gústaf í mannréttindaráð Reykjavíkur fyrir hönd flokksins í ársbyrjun árið 2015. Sú ákvörðun kom mörgum í opna skjöldu. Gústaf var þá flokksbundinn Sjálfstæðismaður og hafði ekki áunnið sér orð fyrir sérstaka ást á mannréttindum. Framsóknarflokkur og flugvallavinir endurskoðuðu skipanina sökum gríðarlegrar reiði í samfélaginu. Gústaf tók ekki sæti í ráðinu.


Viewing all articles
Browse latest Browse all 8283