Þorgerður Katrín Gunnarsdóttir, oddviti Viðreisnar, í Suðurvesturkjördæmi vill að tekið verði upp búrkubann á Íslandi. Þetta kemur fram í ítarlegu viðtali Stundarinnar við frambjóðandann.
Stjórnmálaaflið Viðreisn hefur lagt mikla áherslu á ímynd frjálslyndis og umbóta. Þorgerður Katrín er fyrrverandi varaformaður Sjálfstæðisflokksins og var um tíð menntamálaráðherra flokksins. Sem stjórnmálamaður barðist hún gegn breytingum á kvótakerfinu og kom á aukinni einkavæðingu í menntamálum. Iðnskólinn í Reykjavík var á árunum hennar sem menntamálaráðherra færður samtökum vinnuveitenda, Landssambandi íslenskra útvegsmanna sem í dag heitir Samtök Fyrirtækja í sjávarútvegi, Samtökum atvinnulífsins og Samorku.
Árið 2013 var tilkynnt um stofnun sérstaks mennta- og nýsköpunarsviðs Samtaka atvinnulífsins. „Stofnun menntasviðs er liður í aukinni áherslu Samtaka atvinnulífsins á menntamál og nýsköpun,“ segir í tilkynningu samtakanna. Valin til að leiða starfið var Þorgerður Katrín Gunnarsdóttir, fyrrverandi menntamálaráðherra, sú sama og gefið hafði samtökum vinnuveitenda fjölmennasta iðnskóla landsins skömmu áður. „Ég hlakka til að takast á við spennandi og mikilvægt verkefni í þágu atvinnulífsins. Efling menntunar er tvímælalaust liður í að tryggja undirstöður bæði atvinnulífs og samfélags til lengri og skemmri tíma, var haft eftir henni í tilkynningunni. Þorgerður Katrín hefur verið kölluð menntamálaráðherra atvinnulífsins en hún vann ötullega að stofnun Tækniskólans, sem varð til með niðurlagningu Iðnskólans. Aðgerð sem átti sér stað skömmu fyrir kosningar árið 2007.
Þorgerður Katrín tók búrkubann upp í fyrirspurnartíma á Alþingis í febrúar árið 2011. Hún spurði Ögmund Jónason sem þá var innanríkisráðherra hvort hann teldi koma til greina að banna búrkur á Íslandi. Ögmundur taldi þá ekki rétt að ganga til slíks banns.
Í Stundinni spyr Jóhann Páll Jóhannsson, blaðamaður Stundarinnar, Þorgerði út í hugmyndir hennar um að banna skuli búrkur á Íslandi. – Fyrir nokkrum árum talaðirðu fyrir því á Alþingi að búrkur yrðu bannaðar. Þetta er eitthvað sem margir sem telja sig frjálslynda eru mótfallnir. Ertu enn á þessari skoðun?
„Já, ég er enn þeirrar skoðunar. Það voru ekki síst frjálshyggjumennirnir sem hjóluðu hvað harðast í mig, en ég var og er fyrst og fremst á móti búrkunum á grundvelli kvenfrelsis og jafnréttis. Höfum hugfast að ég er ekki að tala um slæður heldur aðeins búrkur sem hylja andlitið þannig að einungis sést í augun. Ég hvatti til þess að menn tækju þessa umræðu áður áður en hætt yrði við því að umræðan hér á landi færi að snúast um tiltekna einstaklinga í stað prinsippanna. Ég er enn sannfærð um þetta, eftir að hafa lesið ótal bækur um femínisma, íslam og annað og ekki síður vegna þeirra pósta sem ég fékk í kjölfar umræðunnar um þetta. Konur sem voru múhameðstrúar sendu mér tölvupósta og tóku eindregið undir það sem ég var að segja en óskuðu líka nær allar nafnleyndar. Þær sögðu búrkur ekki samræmast íslam, að búrkurnar byggðu á eftiráskýringu karla í múhameðstrúarheiminum, og tóku undir málflutning minn rétt eins og konur úr ýmsum flokkum hafa gert, bæði t.d. úr Samfylkingunni og Sjálfstæðisflokknum. Það hefur ekkert með frjálslyndi að gera að vera á móti því að banna búrkur, mér finnst sú afstaða öllu heldur fela í sér lítinn skilning á jafnrétti og kvenfrelsi. En það kemur svo sem ekki á óvart að slík gagnrýni komi hægra megin frá.“
– Gagnrýni á þessar hugmyndir af hinum vængnum hefur til dæmis snúist um að með búrkubanni sé verið að jaðarsetja múslima enn frekar en gert er nú þegar.
„Ég held að þessu sé frekar öfugt farið. Að ef búrkur verði algengar þá ýti það frekar undir andúð og skilningsleysi á múslimum heldur en bann við búrkum.“
