Forystumenn Framsóknarflokks og Vinstri grænna hafa síðustu daga átt samtöl um hvort flokkar þeirra geti saman verið valkostur í stjórnarsamstarfi við Sjálfstæðisflokkinn. Þetta kemur fram í Morgunblaðinu í dag. Tíðindin þýða að einangrun Sjálfstæðisflokksins er rofin og nú vilja allir flokkar starfa með Sjálfstæðisflokknum, utan Pírata og Samfylkingar, þrátt fyrir að kosið hafi verið vegna spillingar sem afhjúpuð var í Panamaskjölunum.
Panamaskjölin staðfestu að Bjarni Benediktsson, formaður Sjálfstæðisflokksins, var ásamt varaformanni flokksins Ólöfu Nordal að finna í skjölum lögfræðistofnunarinnar Mossack Fonseca. Þá staðfestu gögnin að Sjálfstæðisflokkurinn er því sem næst gegnumsýrður af flóttafólki á lágskattasvæðum en auk Bjarna og Ólöfu mátti meðal annars finna fjölskyldu og viðskiptafélaga Bjarna og fulltrúa flokksins í borgarstjórn.
„Samkvæmt heimildum Morgunblaðsins hafa Sigurður Ingi Jóhannsson, forsætisráðherra og formaður Framsóknarflokksins, og Katrín Jakobsdóttir, formaður VG, farið yfir mál og sett punkta á blað, sem væru grundvöllur viðræðna. Samhljómur þykir vera í það mörgu að hægt sé að stíga frekari skref. Bjarna Benediktssyni, formanni Sjálfstæðisflokksins, mun kunnugt um þessar hugmyndir,“ segir í blaðinu.
Frétt Morgunblaðsins birtist samhliða því að Sjálfstæðisflokkurinn, Viðreisn og Björt framtíð hafa rætt saman. Fréttablaðið segir frá því í morgun að samkomulag hafi náðst um öll stærri mál. „Samkomulag hefur náðst milli Sjálfstæðisflokksins, Viðreisnar og Bjartrar framtíðar um öll þau stóru mál sem steyttu á skeri í síðustu viðræðum. Benedikt Jóhannesson, formaður Viðreisnar, segir nú aðeins eftir að setjast niður og skrifa stjórnarsáttmála og að það þyrfti ekki að taka meira en tvær vikur,“ segir í Fréttablaði dagsins í dag.
Þá segir að samkvæmt heimildum Fréttablaðsins mun þjóðaratkvæðagreiðsla verða haldin á kjörtímabilinu um hvort hefja eigi að nýju viðræður við ESB. „Líkt og í stjórnarsáttmála Samfylkingarinnar og VG árið 2009 verður ákvæði í stjórnarsáttmála um að skoðanir flokkanna sem mynda ríkisstjórn séu mismunandi, að þeir virði skoðanir hver annars og að ríkisstjórnarflokkunum verði í sjálfsvald sett hvernig þeir greiði atkvæði um þingsályktun um þjóðaratkvæðagreiðslu varðandi ESB á kjörtímabilinu.“ Í sömu frétt segir að hlutfall aflaheimilda verði boðin upp árlega. „Þannig mun markaðurinn ákveða hvað samfélagið geti fengið fyrir aflaheimildir á markaði.“ Tollar á kjúklinga- og svínakjöt verða lækkaðir og samkvæmt heimildum Fréttablaðsins verður endurskoðun búvörusamninga „tekin föstum tökum.“
