Bjarni Benediktsson, formaður Sjálfstæðisflokksins og forsætisráðherra, notaði tölvupóstfang frá N1 í lok september árið 2009 til að skrá sig á síðuna Adult FriendFinder. Þetta kemur fram í ítarlegri umfjöllun Stundarinnar um störf Bjarna Benediktssonar en vitnað er í gagnalekann þar í samhengi við yfirlýsingar Bjarna Benediktssonar nokkrum mánuðum áður um að hann hefði sagt sig frá frá ábyrgðarstöðum í atvinnulífinu. Bent er á að Bjarni notaði netfang sitt hjá N1 mánuðum saman þrátt fyrir að félagið hafi verið tekið yfir af kröfuhöfum.
Ítarlega er fjallað um feril, viðskipti og stjórnmál Bjarna í nýjasta tölublaði Stundarinnar. Umfjöllunin sem telur tíu síður greinir meðal annars frá áherslum hans í stjórnmálum, samgang viðskiptahagsmuna og stjórnmálanna, villandi og oft á tíðum ósannan málflutning sem og ótrúlegt net fjárhagslegra hagsmuna Bjarna og fjölskyldu. Áskrifendur Stundarinnar geta lesið nýjasta tölublaðið með því að smella hér.
„Bjarni tilkynnti sérstaklega að hann ætlaði að hætta þátttöku í viðskiptalífinu þegar hann varð formaður Sjálfstæðisflokksins en skráning Bjarna á einkamálasíðu sýnir fram á notkun á tölvupóstfangi hans löngu eftir að hann sagðist hafa látið af afskiptum af félögunum,“ segir í umfjöllun Braga Páls Sigurðssonar, fréttamanni Stundarinnar, um grá svæði stjórnmála og viðskipta þegar kemur að Bjarna. Bjarni sagði við Viðskiptablaðið í desember árið 2008 að áframhaldandi aðkoma hans að viðskiptalífinu gæti skapað tortryggni. „Ég neita því heldur ekki að mér finnst á vissan hátt óheppilegt að vera mjög virkur þátttakandi í viðskiptalífinu eftir að bankarnir komust í hendur ríkisins. Það getur möguleika leitt til einhverrar tortryggni sem gæti bitnað á hagsmunum félaganna. Mér finnst það ekki góð staða,“ hafði Viðskiptablaðið eftir Bjarna.
Skömmu eftir tilkynninguna voru reglur um hagsmunaskráningu þingmanna teknar upp. Þá sá Bjarni ekki ástæðu til að skrá félag sitt Falson & Co. sem skráð er á Seychelleseyjum eins og ljóst varð við birtingu Panamaskjalanna.
Þetta er ekki í fyrsta sinn sem ferðalög Bjarna um stefnumótasíður koma upp í gegnum gagnaleka. „Áframhaldandi notkun á netfangi Bjarna hjá N1 varð ljós í kjölfar þess að tölvuhakkarar komust inn í kerfi síðunnar Adult FriendFinder í nóvember í fyrra og láku þaðan gögnum um tæplega 339 milljónir reikninga einstaklinga sem notuðu síðuna. Þar var meðal annarra að finna reikning sem Bjarni opnaði með tengingu við N1-netfangið sitt, bjarniben@n1.is. Um er að ræða sama netfang og notað var til að stofna reikning Bjarna á einkamálasíðunni AshleyMadison sem eiginkona Bjarna greindi frá árið 2015. Engin leið er að opna reikning á Adult FriendFinder nema með því að staðfesta hann í gegnum netfangið sem upp er gefið. Notendanafnið þar er það sama og Bjarni hefur notað á öðrum vettvangi. Á síðunni skráir Bjarni sig til heimilis að Bradenton í Flórída, en í þeim bæ á Benedikt, faðir Bjarna, hús. Þetta er sama heimilisfang og Bjarni skráði á reikningum sínum á AshleyMadison í september ári áður,“ segir í umfjöllun Stundarinnar. Tölvupóstur Bjarna hjá N1 var því í notkun fjórum mánuðum eftir að fyrsta hagsmunaskráning hans var sett á vef Alþingis – án þess að minnst væri á hugsanleg hagsmunatengsl – og níu mánuðum eftir að hann hafði lýst því yfir að hann væri hættur öllum afskiptum af félaginu.
Í auglýsingu Bjarna á síðunni Adult FriendFinder kemur fram að hann sé að leita sér að skemmtun þegar hann er staddur í Flórída. „Ég er til í minnistæða stund með hverjum þeim er leitað að spennandi tíma með einhverjum sem kemur langt að,“ skrifar Bjarni á síðuna. „Á þessum tíma var Bjarni hættur að veita N1 forstöðu. Fyrirtækið var yfirtekið af kröfuhöfum og 8,6 milljarðar króna afskrifaðir. Stuttu eftir að hafa opinberlega og formlega yfirgefið viðskiptaveldið, þann 29. mars 2009, var Bjarni kjörinn formaður Sjálfstæðisflokksins,“ segir í umfjöllun Stundarinnar.
Gerði lítið úr Ashley Madison
Skráning Bjarna á Adult FriendFinder vekur athygli í ljósi yfirlýsinga Bjarna og eiginkonu hans Þóru Margrétar Baldvinsdóttur um hvernig Bjarni endaði á síðunni Ashley Madison en söluvara þeirrar síðu er framhjáhald. Þann 31. ágúst árið 2015 vakti eiginkona Bjarna, Þóra Margrét Baldvinsdóttir, máls á því á Facebook að Bjarni hefði stofnað aðgang að síðunni Ashley Madison árið 2008 með sinni aðkomu. Þetta var í kjölfar þess að listi yfir notendur síðunnar hafði komist í umferð í kjölfar tölvuinnbrots á síðuna. Hún lýsti því hvernig hún og Bjarni hefðu frétt af síðunni Ashley Madison árið 2008 í erlendum fréttum. „Í framhaldi af því skoðuðum við vefinn fyrir forvitnissakir, en til þess þurfti að fylla út þar til gert form, skrá netfang, erlent póstnúmer og fleira sem við gerðum í algjörum hálfkæringi og af léttúð.“ Þóra sagði þau aldrei fyrr né síðar hafa farið inn á vefinn, greitt fyrir hann eða átt samskipti við nokkurn mann.
Aðstoðarmenn ráðherra hunsuðu fyrirspurnir
Fjallað var um veru Bjarna á Ashley Madison í ágúst árið 2015. Þá var nokkuð um liðið síðan lekinn átti sér stað en fjölmiðlar höfðu ekki fjallað um málið. Það breyttist þó þegar Þóra Margrét birti sjálf yfirlýsingu á Facebook. Síðar sama dag kom í ljós að yfirlýsingin virðist eiga uppruna sinn í ótta þeirra hjóna um að Stundin hefði í hyggju að fjalla um málið. Viku áður hafði DV sagt frá því án þess að nefna Bjarna á nafn að maður úr stjórnmálaheiminum væri meðal þeirra sem notað hefðu Ashley Madison. Bjarni var skráður sem Icehot1 á síðunni og sagðist vera að leita sér að „intelligent and fun conversation and good…very good sex.“
Veit einhver um gott netöryggisnámskeið? Er að spyrja fyrir vin.
— Svanhildur Hólm (@svanhildurholm) August 31, 2015
Stundin gerði samskipti sín við við fjármálaráðuneytið í aðdraganda yfirlýsingarinnar að umfjöllunarefni í frétt af málinu í ágúst árið 2015. „Aðstoðarmenn Bjarna Benediktssonar, fjármála- og efnahagsráðherra, hafa hunsað símtöl og tölvupóst frá Stundinni eftir að gögnum Ashley Madison-vefsins var lekið á netið fyrr í þessum mánuði. Stundin hefur ítrekað reynt að ná sambandi við Teit Björn Einarsson og Svanhildi Hólm Valsdóttur, aðstoðarmenn Bjarna Benediktssonar og einnig ráðherra sjálfan. Aðstoðarmennirnir hafa látið undir höfuð leggjast að svara í síma og að svara tölvupóstum frá Stundinni, en samkvæmt leiðbeinandi erindisbréfi fyrir aðstoðarmenn sem forsætisráðuneytið sendi ráðuneytunum um síðustu áramót ber aðstoðarmönnum að fylgjast með fjölmiðlaumfjöllun og veita fjölmiðlum viðbrögð. Í siðareglum starfsmanna stjórnarráðsins er einnig fjallað um samskipti við fjölmiðla, en fram kemur að starfsfólki stjórnarráðsins beri að veita upplýsingar greiðlega og með kerfisbundnum hætti.“ Svanhildur Hólm gantaðist síðar sama dag með málið á Twitter og spurði hvort einhver vissi um „gott netöryggisnámskeið“ fyrir vin sinn.
Viðskiptablaðið talaði fyrir því að fjölmiðlar segðu ekki frá málinu
Gagnrýni á Stundina fyrir að voga sér að fjalla um öryggisleka Ashley Madison og veru fjármálaráðherra þar kom meðal annars frá Viðskiptablaðinu. Blaðið taldi ótækt að fjölmiðlar hefðu ætlað sér að fjalla um málið og gerði Stundina sérstaklega að viðfangsefni. „Það er óþarfi að rökstyðja það sérstaklega hvers vegna einkalífið er friðhelgt og spurningar um það eru ekki svara verðar, nema sérstakar ástæður eru til þess að málið varði almenning Það átti engan veginn við. Það á enginn að þurfa að svara slíkum spurningum; hvorki af eða á, því einu gildir hvert svarið er: það kemur engum við. Það á jafnt við um ráðherra og aðra í þessu þjóðfélagi, að það á enginn að þurfa að standa fjölmiðlum reikningsskil einkalífsins,“ segir í skoðanapistli eftir Andrés Magnússon, fjölmiðlarýni hjá Viðskiptablaðinu. „Það er ömurlegt, nei skammarlegt, að fjölmiðill skuli leggja sig niður við slíkt, að stilla fólki upp á opinberum vettvangi til þess að játa eða afneita meintum syndum. Eitt er þó gott við það, en það er að slík framganga afhjúpar fjölmiðilinn, erindi hans og starfshætti,“ bætti Andrés við.
Einkamál ráðherra?
Um allan heim varð Ashley Madison lekinn þó ástæða til umfjöllunar og skoðunar fjölmiðla sem og ríkisstofnana. Ástæðan er sú að stafræn öryggismál embættismanna, stjórnmálamanna og viðskiptalífs eru ekki einkamál þess aðila. Bandaríska blaðið The Hill sagði frá því í ágúst 2015 að um 15000 opinber netföng hefðu fundist í lekanum. Hakkarahópurinn sem var að baki innbrotinu og kallaði sig „The Impact Team“ hafði í mánuð notað gögnin til að þrýsta á Ashley Madison að taka niður vefinn. Yfirvöld um allan heim rannsökuðu því lekan með tilliti til gagnaöryggi ríkisins. Þá var Bjarni óhræddur við að nýta sér aðstoðarmenn sína við að gera lítið úr málinu. Aðstoðarmenn fjármálaráðherra eru vissulega aðstoðarmenn stjórnmálamannsins og ráðnir vegna stöðu hans sem ráðherra.
Breska blaðið The Telegraph sagði frá því að netföng úr breskum ráðuneytum og stjórnmálaflokkum sé að finna í lekanum. Þá fjallaði vefmiðillinn Gigaom sérstaklega um Ashley Madison lekann og þjóðaröryggi Bandaríkjanna.
Ashley Madison lekinn var um allan heim til umfjöllunar einmitt vegna þess að þar var viðkvæmum persónuupplýsingum um áhrifafólk lekið. Alþekkt er að nýta má ótta embættismanna, viðskiptaforkólfa og stjórnmálamanna til kúgunar og áhrifa.