Páll Matthíasson forstjóri Landspítalans gerir ríkisfjármálaáætlun og söluna á Vífilsstaðalandi að umfjöllunarefni í forstjórapistli sem hann sendir samstarfsfólki sínu í byrjun sumars. Páll lýsir furðu sinni á fjármálaáætluninni og segir:
„Með nýrri fjármálaáætlun fyrir árin 2018- 2022 hefur ríkisstjórnin sýnt á spilin. Fyrir liggur að nær allt það umtalsvert mikla nýja fjármagn sem ætlað er í heilbrigðisþjónustu á tímabilinu mun koma til á seinni hluta þess og renna að miklu leyti í stofnframkvæmdir. Þegar kemur að rekstri þjónustunnar kveður við annan og öllu kunnuglegri tón. Fjármálaáætlunin gerir ráð fyrir að Landspítali dragi verulega saman í rekstri á næsta ári. Farið verður nánar yfir þetta á ársfundinum en okkur er óneitanlega talsvert brugðið, í ljósi umræðu í aðdraganda kosninga sem og við gerð fjárlaga. Við vonum að fjármálaáætlunin verði leiðrétt með hliðsjón af raunveruleikanum. Að öðrum kosti er það verkefni okkar næstu vikur og mánuði að draga fram aðgerðir sem geta mætt þessari kröfu ríkisvaldsins.“
Um Vífilstaði segir Páll en bæjarstjórinn í Garðabæ og fjármála- og efnahagsráðherra undirrituðu í vikunni sem leið kaupsamning um jörðina Vífilsstaði og er fyrirhugað að byggja um 1.500 íbúðir á svæðinu:
„Að lokum langar mig að taka upp mál varðandi land Vífilsstaða, sem af hálfu Landspítala er lokið en varð umfjöllunarefni fjölmiðla nú í vikunni. Land Vífilsstaða hefur þjónað heilbrigðisþjónustunni í rúm hundrað ár og margir hafa séð fyrir sér framhald á þeirri nýtingu. Um áramótin 2014/2015 kom nokkuð óvænt en eindregin ósk frá fjármálaráðuneytinu um þá ráðstöfun að land Vífilsstaða færi undir Ríkiseignir. Við mótmæltum því en þess ber að gæta að á þessum tíma var enn ákveðin óvissa (m.a. vegna afstöðu þáverandi forsætisráðherra) um það að endurnýjun spítalans yrði við Hringbraut, óvissa sem nú er eytt með skýrum, fastmótuðum og skynsamlegum ákvörðunum um uppbyggingu þar. Hins vegar var aðalástæða athugasemda okkar sú að ef litið er til mannfjöldaspár fram eftir 21. öld þá teljum við skynsamlegt að hafa svigrúm innan marka höfuðborgarsvæðisins til uppbyggingar næstu kynslóðar sjúkrahúsa, sjúkrahúss sem þyrfti að vera risið eftir 40-50 ár. Það er í því ljósi sem við horfðum til Vífilsstaða. Niðurstaðan varð hins vegar sú að ríkið leysti til sín landið og hefur nú ráðstafað því, væntanlega að loknu mati stjórnvalda á því hvaða nýting landsins þjóni best heildarhagsmunum samfélagsins. Um það er ekkert frekar að segja.“
