Tilurð Hraðfrystihúss Hellissands (1941) og Hraðfrystihúss Stokkseyrar (1948-1992), sem og þróttmikill rekstur þessara, nokkurra helztu burðarstoða fyrrum Sölumiðstöðvar hraðfrystihúsanna, ætti að verða Oddnýju Steinu Valsdóttur og hennar samherjum hjá Landssamtökum sauðfjárbænda hvatning til stórsóknar á sölu sauðfjárafurða vestan hafs, sem og austan þess.
Oddnýju Steinu og hennar slekti öllu (collegum hennar), á ekki að verða hin minnsta skotaskuld úr, fremur en ráðsnjöllum og dugmiklum frumherjunum 15, sem upphaflega stóðu að stofnum Sölumiðstöðvarinnar gömlu, í þágu útgerðar og fsikvinnzlu í Febrúar 1942, að hrinda af stað viðlíka sölusamtökum fyrir eitthvað það bezta sem íslenzkur landbúnaður býður upp á, og hefur gert, frá aldaöðli.
Landssamtök sauðfjárbænda þurfa að halda gróða- og æfintýrafólki algjörlega utan sinna vébanda, eigi þeim að takast að koma á laggrinar viðunandi sölustarfsemi á lambakjötinu og fylgiafurðum þess sem er ekki minna hnossgæti þorsksins, sem og annarra fjölmargra sjávarafurða.
Viðurkennast verður að ekki nándar nærri allir, hafa náð að átta sig á sölustarfi Baldvins Jónssonar vestanhafs, og hvaða raunverulega árangri það hefur skilað til þessa, talandi um hin feiknamiklu sóknarfæri á sölu sauðfjárafurðanna, þar ytra m.a.
Spyrja má hvort nautgripa- og hrossabændur, ættu ekki einnig að sverjast til lagsmennzku með þeim Oddnýju Steinu, þegar til lengri tíma yrði litið.
Að ógleymdum gróðurhúsa- og kornræktarbændum, ekki síður.
En fólk þarf að gæta að, að ekki nái að smeygja sér inn í raðir framleiðendanna forhertir og óbilgjarnir embættis- og stjórnmálamenn og fjárplógsmenn, sem kynnu að kollsteypa góðum áformum sem og fyrirsjáanlegum árangri bændanna, sem allt of oft hefur við brugðið, til þessa. Samanber endalok Hraðfrystihúss Stokkseyrarar hf árið 1992; sem varð leiksoppur pólitískra hráskinna- og meðalmennzku, sem Stokkseyringum og nágrönnum þeirra mun seint bætt verða.
Á meðan Golfstraumurinn (undan Suðurströndinni) er til friðs, (þó blikur kunni að vera á lofti þar um, jafnvel) þarf fremur að auka matvælaframleiðzlu í landinu fremur en hitt, enda eru ræktunarskilyrði í Evrópu og Afríku t.d. á hverfanda hveli, á næstu áratugum. Í því liggja sóknarfærin í landbúnaðinum, ekki síður en annarri framleiðzlu.
Hér með vil ég skora á Oddnýju Steinu Valsdóttur og hennar liðsmenn, að þau skjóti á fundi til frekara skrafs, um þá stórkostlegu valkosti, sem bíða þeirra utan lands — ekkert síður en heimafyrir. Stórhugur og fyrirhyggja frumkvöðla gömlu Sölumiðstöðvar hraðfystihúsanna ætti að verða þeim hvatning mikil, fremur en til úrtölu og bælingar.
Óskar Helgi Helgason, sölumaður séhæfðra verkfæra fyrir málmiðnað, til lands og sjávar.