Facebook hefur stofnað til tilraunaverkefnis meðal notenda í Ástralíu, til að koma í veg fyrir dreifingu hefndarkláms á samfélagsmiðlinum, það er birtingu viðkvæmra mynda án samþykkis. Notendum er boðið að senda fyrirtækinu þær ljósmyndir sem þeir óttast að maki eða fyrrverandi maki hafi í hyggju að dreifa.
Tölvukerfið mun, að sögn fyrirtækisins, ekki geyma myndirnar sjálfar heldur „hash“-greiningu á þeim, skráningu einstakra einkenna sem nýtast til að bera kennsl á myndirnar, eins og nokkurs konar rafrænt fingrafar. Það getur til dæmis litið svona út:
36117308d22b8c6f6gf3041bb4186j10e3331ab0
Þessar upplýsingar nýtir Facebook þaðan í frá sjálfkrafa til að neita öðrum um birtingu sömu mynda.
PhotoDNA
Tæknilausnin sem fyrirtækið styðst við í þessu tilraunaverkefni heitir PhotoDNA, og var þróuð af Microsoft í samstarfi við International Centre for Missing & Exploited Children, til að bera kennsl á myndir af börnum sem sættu ofbeldi eða misnotkun. Kerfið hefur það fram yfir fyrri lausnir á sama sviði að geta borið kennsl á myndir þó að gerðar hafi verið á þeim breytingar.
Facebook nýtir þegar sömu tækni til að koma í veg fyrir dreifingu slíks og annars ólögmæts myndefnis, svo sem áróðurs frá öfgasamtökum.
Fyrstu viðbrögð við tilrauninni hafa verið jákvæð. The Guardian hefur eftir Carrie Goldberg, lögfræðingi í New York, að Facebook, nú með tvo milljarða notenda, sé kjörlendi fyrir þá sem brjóta vilja á öðrum með myndbirtingu. Fyrirbyggjandi úrræði sem þetta geti haft allveruleg áhrif.
