Fjölmiðlafulltrúi Utanríkisráðuneytisins, svaraði fyrirspurn Kvennablaðsins um áform NATO um nýja stjórnstöð fyrir aðgerðir og eftirlit á Norður-Atlantshafi, með tölvupósti. Tilkynnt var um áformin eftir fund varnarmálaráðherra NATO-ríkjanna í Brussel á miðvikudag.
Fyrirspurnin, sem var borin upp við fjölmiðlafulltrúann í síma, var almenns eðlis en efnislega má þó líklega hluta hana í þrennt: Komu Íslendingar að þessari ákvörðun? Hver er afstaða Íslands í málinu? Og hefur möguleg staðsetning stjórnstöðvarinnar á Íslandi verið rædd á einhverjum vettvangi?
Í svari ráðuneytisins, sem birtist hér að neðan, kemur þó ekkert nýtt fram, nema ef vera skyldi að umræddan fund sótti, í fjarveru ráðherra, fastafulltrúi Íslands hjá NATO, en það mun vera Anna Jóhannsdóttir. Ofangreindum spurningum hefur aftur á móti ekki fengist svarað.
Enn hefur ekki náðst á Arnór Sigurjónsson, yfirmann Varnarmálaskrifstofu, sem annast nú málaflokkinn. Á síðum ráðuneytisins er Arnór titlaður skrifstofustjóri, en í erlendum miðlum kemur hann fram undir ýmsum nöfnum, þar á meðal „Chief of Defence“ og „försvarsminister“ eða varnarmálaráðherra.
Á vef Stjórnarráðsins er engar upplýsingar að finna um Varnarmálaskrifstofu. Að því er næst verður komist í samtölum við starfsfólk Utanríkisráðuneytisins var hún þó stofnuð nú í haust, sem „sjálfstæð skrifstofa“, eftir tillögum sem komu fram í skýrslu 1. september sl. Starfar þar fernt.
Allar ákvarðanir á vettvangi Atlantshafsbandalagsins eru teknar á grundvelli samstöðu. Fastafulltrúi Íslands hjá Atlantshafsbandalaginu situr ráðherrafundinn í fjarveru utanríkisráðherra.
Uppfært eftir birtingu:Utanríkisráðuneytið bað Kvennablaðið, eftir birtingu þessarar fréttar, um að senda skriflega fyrirspurn um efnið, sem ritstjórn gerði upp úr hádegi föstudaginn 10. nóvember.
