Oumuamua (ó-múa-múa) hefur hann verið nefndur: fyrsti loftsteinninn í grennd við jörðu sem vitað er að er hingað kominn frá öðru sólkerfi. Hann er um 400 metra langur, ílangur í hlutföllum sem er líkt við vindil, gerður úr dökku, rauðleitu grjóti eða málmgrýti.
Oumuamua er tífalt lengri en nemur þykkt hans, en ýktustu hlutföllin sem sést hafa á loftsteini fram að því voru 3:1. Að fyrirbærið er upprunnið utan sólkerfisins ráða vísindamenn af ferðahraða þess og stefnu. Þann 14. október kom Oumuamua næst jörðu og var þá 60 sinnum lengra frá okkur en tunglið. Hann ferðast nú burt frá okkur með gríðarlegum hraða, eða um 140.000 km/klst.
Rob Weryk, stjörnufræðingur við stjörnuskoðunarstöð Hawaii háskóla varð fyrst var við Oumuamua þann 19. október, þegar hann var í um 30 milljón kílómetra fjarlægð frá jörðu og þegar á burtleið, í átt að stjörnuþyrpingunni Pegasus. Evrópska stjörnuskoðunarstöðin á Tenerife, Kanaríeyjum, staðfesti uppgötvunina. Þann 1. nóvember var rannsókn send tímaritinu Nature sem staðfesti hana og birti sl. mánudag, 20. nóvember. Þá þegar var loftsteinninn kominn í um 300 milljón kílómetra fjarlægð frá jörðu.
Ekki kemur á óvart að geimfyrirbæri af þessum toga séu til – en það er fyrst um þessar mundir sem sjónaukar eru nógu öflugir til að greina þau. Af þeim 750.000 fyrirbærum sem þekkt eru á ferð innan sólkerfisins er þetta það fyrsta sem vitað er að á uppruna sinn annars staðar.
Steinninn er þó of lítill og nú þegar of fjarlægur til að sjást beinlínis: lögun hans er til dæmis ráðin af því hversu breytileg birta stafar af honum. Myndina sem fylgir þessari frétt gerði grafískur hönnuður sem starfar við Hubble sjónaukann.
Oumuamua er hawaiíska fyrir langtaðkominn sendiboða. Þar sem hann er ekki á braut um sólu mun hann aldrei sjást hér aftur.
