Eftirfarandi tilkynning barst fjölmiðlum í dag, föstudag, undir yfirskriftinni „Áskorun til stjórnmálanna í skugga valdsins #metoo“:
1. Kynferðisofbeldi og áreitni á sér stað í stjórnmálum rétt eins og annars staðar í samfélaginu.
2. Meðfylgjandi eru frásagnir kvenna sem lýsa reynslu sinni.
3. Það verður að verða breyting á. Við krefjumst þess að allir karlar taki ábyrgð, að allir stjórnmálaflokkar taki af festu á málinu, setji sér viðbragðsreglur og lofi konum að þær þurfi ekki að þegja meir því þær muni fá stuðning.
Undir tilkynninguna rita 419 konur sem starfa á vegum stjórnmálaflokka og í tengslum við þá: þingmenn, varaþingmenn, bæjarstjórar, bæjarfulltrúar, borgarfulltrúar, sveitarstjórnarfulltrúar, formenn og fyrrverandi formenn flokksfélaga, framkvæmdastjórar og fleiri.
Sögurnar sem vísað er til eru alls 136 frásagnir kvenna í stjórnmálum, af ofbeldi og áreiti karla í sinn garð, á nýliðnum árum. Þær fylgja tilkynningunni í skjali sem má nálgast hér.
„Fyrir um hundrað árum,“ skrifar ein kvennanna, „óttuðust sumir karlmenn það að konur fengju kosningarétt, hver ætti að sjá um börnin og heimilið? Og hvað kæmi næst, kannski framboð kvenna? Þegar Kvennalistinn var stofnaður 1983 varð óttinn sá að þær kæmu konum inn á Alþingi og jafnvel málum sínum á dagskrá. Þegar undirskriftalisti kvenna úr stjórnmálastarfi verður tilbúinn vona ég að næsti ótti þeirra verði sá að konur hætti að taka við góðum leiðbeiningum þeirra, athugasemdum, aðdráttunum, þukli og káfi.“
Myndin sem fylgir fréttinni var valin innan ritstjórnar Kvennablaðsins. Þar sést Ingibjörg H. Bjarnason, sem varð þingmaður árið 1922, fyrst kvenna á Íslandi.
Stytta af Ingibjörgu var afhjúpuð fyrir utan Alþingi fyrir rúmum tveimur árum síðan. Ingibjörg fæddist 14. desember 1867, og á því 150 ára fæðingarafmæli um miðjan næsta mánuð.
