State of the Nordic Region – skýrsla ráðherranefndarinnar 2018. Sækja hér.
Á Íslandi og í Færeyjum fjölgaði íbúum síðastliðinn áratug einkum af „náttúrulegum orsökum“ eins og það er kallað: þar voru fæðingar tíðari en andlát. Á Grænlandi eru fæðingar einnig umtalsvert tíðari en andlát en þar fækkar íbúum engu að síður, vegna verulegs brottflutnings.
Þetta kemur fram í nýútkominni skýrslu Norrænu ráðherrenefndarinnar, þar sem borin er saman samfélagsleg þróun Norðurlandanna.
Á hinum Norðurlöndunum, það er í Skandinavíulöndunum Danmörku, Svíþjóð, Noregi, Finnlandi og Álandseyjum eru fæðingar alls ekki jafn tíðar. Þar fjölgar íbúum einkum vegna aðfluttra íbúa.
Á áratugnum frá 2007 til 2017 fjölgaði íbúum Íslands um alls 10%. Þar af var aðeins 1/5 hluti vegna innflutnings en 4/5 af „náttúrulegum völdum“, það er sökum fæðinga umfram andlát. Í Noregi fjölgaði íbúum mest á tímabilinu, um yfir 12%, en þar voru hlutföllin nær öfug: þriðjungur fjölgunarinnar stafaði af fæðingum umfram andlát, en 2/3 hlutar fjölgunarinnar fólst í flutningi fólks til landsins.
Lág hlutdeild innflutnings í fólksfjölgun á Íslandi skýrist að nokkru leyti af því að áratugurinn sem hér er skoðaður inniheldur efnahagshrunið 2008 og eftirhrunsárin, þegar hægðist mjög á innflutningi. Flutningar til landsins hafa aukist á ný, með batnandi efnahagsaðstæðum.
Gert er ráð fyrir meiri fólksfjölgun á Íslandi framan af áratugnum framundan en annars staðar á Norðurlöndum: samkvæmt spá mun skráðum íbúum landsins fjölga úr 338.000 nú í 400.000 árið 2030.
