Sæl Ásrún, mig langar til að skrifa þér vegna fréttar sem þú skrifaðir á vef RÚV í dag og birtist klukkan 16:06 undir fyrirsögninni:
Mesta mannfall á Gaza frá árinu 2014
Ég las fréttina þína af athygli enda er óforskammaður gjörningur Ísraela og Bandaríkjanna með flutningi sendiráðs Bandaríkjanna til Jerúsalem einhver andstyggilegasta atlaga að Palestínumönnum fyrr og síðar. Palenstínska þjóðin hefur fyrir löngu þolað nóg en það þarf ég auðvitað ekkert að segja þér um. Ég varð líka hugsi við lestur greinar þinnar um stöðu Íslands og hvernig Ísland mátar sig við heimsveldin sem harðast ganga fram í harðræði og vopnaskaki.
Þú skrifar í greininni um Erdogan Tyrklandsforseta:
„Recep Tayyip Erdogan forseti Tyrklands, sagði í morgun að Bandaríkjamenn hefðu með þessum gjörningi glatað hlutverki sínu sem sáttasemjari í deilum Ísraela og Palestínumanna.“
Og þá fór ég að hugsa um Guðlaug Þór af því að flokkur hans Sjálfstæðisflokkurinn er í bandalagi með flokki Erdogan og hvort Guðlaugur sé sammála Erdogan þegar Erdogan kallar mannfall í Gaza í dag af völdum ísraelska hersins þjóðarmorð. Ég er nefnilega sammála Erdogan. Þjóðarmorð er það. Mér finnst samt Erdogan eitthvert mesta ógeð jarðar svo það sé tekið fram.
Ég hugsaði líka um Ísland og afstöðu Guðlaugs til fyrirhugaðra aukinna umsvifa Bandaríkjahers á Íslandi. Eigum við að vera í hernaðarbandalagi með Bandaríkjunum meðan þursinn Trump og siðlausir vargarnir að baki hans ráða þar ríkjum?
Seinna um daginn langaði mig til að lesa greinina aftur en þá var hún á bak og burt og í stað hennar önnur grein eftir þig ansi mikið breytt.
Mikið mannfall í mótmælum á Gaza
Ég get ekki alveg útskýrt afhverju ég leitaði greinina uppi aftur en kannski er það vegna þess að ég, eins og þú, fylgist með þessum hryllingi úr fjarska í vorblíðunni í Reykjavík og ég er grútspæld yfir því að ríkisstjórn Íslands láti ekkert í sér heyrast og vilji eitthvað hafa saman að sælda við Bandaríkin yfir höfuð. Og ég skil auðvitað ekki heldur samkrull Sjálfstæðisflokksins og flokks Erdogan sem er einhver hörmulegasti harðstjóri okkar tíma.
Og út af öllu þessu langar mig að spyrja þig hversvegna greininni var umbylt laust eftir klukkan sex í kvöld.
Í fyrri frétt sem þú ert skrifuð fyrir er fyrsta málsgreinin svona, ásamt upphaflegri fyrirsögn:
Mesta mannfall á Gaza frá árinu 2014
Ísraelskir hermenn hafa skotið 52 Palestínumenn til bana í mótmælum á Gaza-ströndinni við mörk Ísrael í dag. BBC greinir frá þessu og segir að um 2.200 til viðbótar séu særðir. Mótmælt er stofnun Ísraelsríkis fyrir 70 árum og flutningi bandaríska sendiráðsins frá Tel Aviv til Jerúsalem.
Í seinni fréttinni er fyrsta málsgreinin hinsvegar svona ásamt fyrirsögn:
Mikið mannfall í mótmælunum á Gaza
Ísraelskir hermenn hafa skotið að minnsta kosti 52 Palestínumenn til bana í mótmælum á Gaza-ströndinni í dag. Mannfallið á Gaza er það mesta í fjögur ár. Meira en 2.000 eru særðir. Mahmoud Abbas, forseti Palestínumanna, hefur lýst yfir þriggja daga sorg vegna mannfallsins.
Atburðir dagsins hafa leitt af sér mesta mannfall á Gaza frá árinu 2014. Hver var ástæða þess að þú ákvaðst að breiða yfir þá hörmulegu staðreynd og stórfrétt með mildaðri fyrirsögn og fyrstu efnisgrein?
Þetta ER mesta mannfall á Gaza frá árinu 2014. Ástæðan ER opnun sendiráðs Bandaríkjanna á mörkum Ísraelsks yfirráðasvæðis, klesst upp við það sem eftir er af yfirráðasvæði Palestínumanna.
Ég ákvað að bera saman texta fréttanna beggja því netið geymir þær báðar og þá koma breytingarnar berlega í ljós:
Hvers vegna dregurðu úr í síðari frétt þinni og mildar frásögnina alla? Afhverju? Mér fannst upphaflega fréttin þín þar sem þú vitnaðir í heimildir BBC alveg hreint ágæt en ég tel að með breytingum hafirðu haft ýmsar nauðsynlegar upplýsingar af lesendum sem getur varla samræmst hlutverki Ríkisútvarpsins og þá spyr ég í þágu hverra?
Voru þetta kannski bara Gazaleg mistök?
Bestu kveðjur
Steinunn Ólína
Mesta mannfall á Gaza frá árinu 2014
Ísraelskir hermenn hafa skotið 52 Palestínumenn til bana í mótmælum á Gaza-ströndinni við mörk Ísrael í dag. BBC greinir frá þessu og segir að um 2.200 til viðbótar séu særðir. Mótmælt er stofnun Ísraelsríkis fyrir 70 árum og flutningi bandaríska sendiráðsins frá Tel Aviv til Jerúsalem.
Sendiráð Bandaríkjanna í Jerúsalem var formlega opnað klukkan eitt að íslenskum tíma. Trump sagði í ræðu um fjarfundabúnað að Bandaríkin vildu stuðla að friði til frambúðar.
Það minnir hins vegar fátt á frið á þessum slóðum í dag. Palestínumenn hafa mótmælt við landamæri Gaza að Ísrael undanfarnar sex vikur og hefur verið boðað að þeim ljúki á morgun, fimmtánda maí, daginn sem Palestínumenn kalla Nakba, eða hörmungardaginn. Þann dag árið 1948 flúðu hundruð þúsunda Palestínumanna eða voru hraktir á brott eftir stofnun Ísraelsríkis.
Flutningur bandaríska sendiráðsins hefur víða vakið hörð viðbrögð og hefur Arababandalagið lýst gjörninginn ólöglegan og boðað til aukafundar vegna málsins á miðvikudag.
Recep Tayyip Erdogan forseti Tyrklands, sagði í morgun að Bandaríkjamenn hefðu með þessum gjörningi glatað hlutverki sínu sem sáttasemjari í deilum Ísraela og Palestínumanna. Þeir hefðu kosið að verða partur af vandamálinu, en ekki lausninni.
Ísraelski herinn gerði síðdegis loftárásir á bækistöðvar Hamas-samtakanna á Gaza. AFP vísar í yfirlýsingu frá hernum þar sem fram komi að ráðist hafi verið á fimm skotmörk til að svara árásum Hamas samtakanna á landamærunum að Gaza.
Ísraelski herinn hefur verið gagnrýndur fyrir að beita skotvopnum gegn mannfjöldanum við landamærin. AFP greinir frá því að mannfalllið þar í dag sé það mesta í deilu þjóðanna frá árinu 2014. Frá því sex vikna mótmælin hófust hafi ísraelskir hermenn skotið nærri hundrað Palestínumenn til bana. Ekki hafi verið tilkynnt um mannfall í herliði Ísraels.“
Mikið mannfall í mótmælunum á Gaza
Ísraelskir hermenn hafa skotið að minnsta kosti 52 Palestínumenn til bana í mótmælum á Gaza-ströndinni í dag. Mannfallið á Gaza er það mesta í fjögur ár. Meira en 2.000 eru særðir. Mahmoud Abbas, forseti Palestínumanna, hefur lýst yfir þriggja daga sorg vegna mannfallsins.
Bandaríska sendiráðið var opnað í Jerúsalem klukkan 13 í dag að íslenskum tíma en í dag fagna Ísraelar því að 70 ár eru liðin frá stofnun Ísraelsríkis. Trump sagði í ræðu um fjarfundabúnað við opnunina að Bandaríkin vildu stuðla að friði til frambúðar. Abbas sagði síðdegis að sendiráðið jafnaðist á við nýja bandaríska landnemabyggð í Jersúalem. Friðar væri ekki að vænta undir leiðsögn Bandaríkjamanna.
Flutningur bandaríska sendiráðsins hefur víða vakið hörð viðbrögð og hefur Arababandalagið lýst gjörninginn ólöglegan og boðað til aukafundar vegna málsins á miðvikudag. Mansour Al-Otaibi, fastafulltrúi Kúveit hjá Sameinuðu þjóðunum, útilokar ekki að farið verði fram á krísufund í öryggisráðinu.
Benjamin Netanyahu forsætisráðherra Ísraels varði í dag aðgerðir ísraelska hersins – sagði að ríkið hefði rétt á því að verja landamæri sín. Hamas samtökin hefðu lýst því markmiði sínu að eyða Ísrael og sendu þúsundir manna til að ryðja niður landamæragirðingarnar til að ná því fram. Ísraelar ætli að halda áfram að standa vörð um fullveldi sitt og borgara.
Palestínumenn hafa mótmælt við landamæri Gaza að Ísrael undanfarnar sex vikur og hefur verið boðað að þeim ljúki á morgun, 15. maí, daginn sem Palestínumenn kalla Nakba, eða hörmungardaginn. Þann dag árið 1948 flúðu hundruð þúsunda Palestínumanna eða voru hraktir á brott eftir stofnun Ísraelsríkis.
AFP greinir frá því að mannfalllið á Gaza í dag sé það mesta í deilu þjóðanna frá árinu 2014. Frá því sex vikna mótmælin hófust hafi ísraelskir hermenn skotið um hundrað Palestínumenn til bana. Á sama tímabili hafi ekki verið tilkynnt um mannfall í herliði Ísraels.
