Sameinuðu þjóðirnar krefjast ekki vopnahlés í hafnarborginni Hodeidah (Al Hudaydah) í Jemen, þar sem Sádi-Arabía og Sameinuðu arabísku furstadæmin (SAF) leiða nú árás gegn uppreisnaröflum sem hafa farið með völd á svæðinu. Fulltrúar Svía lögðu fyrir Öryggisráð SÞ tillögu að ályktun þar sem krafist yrði vopnahlés, en bæði Bandaríkin og Bretland beittu neitunarvaldi gegn ályktuninni. Þess í stað biður Öryggisráðið „alla málsaðila að virða skuldbindingar sínar við mannúðarlög“ og sýna aðgát við hernaðinn.
70% alls innflutnings fer um höfnina
Árás Sádi-Arabíu og SAF á hafnarborgina hófst með loftárásum og landhernaði á miðvikudag. Landherirnir eru, á föstudag, sagðir nálgast flugvöll borgarinnar. Stjórnvöld í ríkjum tveimur styðja útlagastjórn Jemen, sem hrakin var frá völdum í uppreisn sem hófst árið 2011. Landið hefur verið hrjáð af átökum síðan þá. Uppreisnarliðarnir sem fara með völd í Hodeidah eru nefndir Houthis, en opinbert heiti samtakanna er Ansar Allah. Þeir hafa notið stuðnings íranskra stjórnvalda.
Höfnin í Hodeidah hefur verið helsta leið mannúðaraðstoðar til Jemen á undanliðnum árum. 70% alls innflutnings til landsins er sagður fara um höfnina. Breski stjórnmálamaðurinn David Miliband er nú stjórnandi Alþjóða björgunarráðsins, International Rescue Committee. Í viðtali við BBC tók hann undir með ályktun Svía og sagði mikla hættu á að árásin leiði til þess að höfnin verði hernumin og/eða vettvangur langvarandi átaka. Þegar séu 22 milljónir manna hjálpar þurfi í Jemen, þar af 11 milljón á barnsaldri. 8 milljónir séu við hungurmörk og fullkomlega háð matarúthlutunum hjálparstofnana. Þá hafi á síðasta ári 50.000 manns í landinu látist úr kóleru og skyldum sjúkdómum.
Að beita hungursneyð í hernaðarlegum tilgangi er stríðsglæpur
Um 600.000 manns eru talin hafast við í borginni, helmingurinn á barnsaldri. Adama Diegn, ráðgjafi Sameinuðu þjóðanna um varnir gegn þjóðarmorðum, segir hættu á að árásin leiði til hungursneyðar. Að beita slíkri neyð í hernaðarlegum tilgangi teljist til stríðsglæpa.
Fulltrúar SAF segja að með því að endurheimta Hodeidah-borg úr höndum uppreisnarliða megi draga verulega úr efnahagsumsvifum þeirra og þvinga þá þannig til samningaviðræðna. Þá hafa þeir haldið fram að hafnaraðstaða borgarinnar hafi verið nýtt til að smygla vopnum frá Íran, að meðtöldum loftskeytum sem notuð hafi verið til árása á Sádi-Arabíu.
Enn hefur ekki verið ráðist á höfnina sjálfa, sem er því nothæf. Sendiherra SAF á vettvangi Sameinuðu þjóðanna segir að hernaðarðgerðin sé yfirveguð og nákvæm, og að í mannúðarskyni hafi uppreisnarliðum verið boðið að ferðast í norðurátt á meðan ráðist er á suðurhluta borgarinnar, kjósi þeir að leggja niður vopn, gefast upp og hverfa á braut. Þá dró hann í efa að höfnin sjálf væri jafn mikilvæg og af er látið, enda séu níu aðrar hafnir í Jemen og tvær í Sádi-Arabíu, sem notast megi við í neyð.
