Evrópska geimrannsóknarstofnunin ESA lét frá sér gervihnattamyndir þann 31. júlí, sem sýna áhrif hitabylgjunnar nú í sumar á gróðurfar í Norður-Evrópu. Á myndunum má sjá hvernig grænt yfirborð norðurhluta Þýskalands, Danmerkur og Svíþjóðar, sumarið 2017, víkur fyrir brúnu og drapplitu yfirborði sumarsins 2018.
Uppskerubrestur, fjöldagjaldþrot —og styttri franskar
Ótal hitamet hafa verið slegin í norðurhluta álfunnar þetta sumar og er hætta á verulegum uppskerubresti með haustinu. Í Svíþjóð hafa akrar aðeins notið 12% af rigningu meðalsumars. Lýst hefur verið yfir neyðarástandi í Lettlandi og Litháen.
Gert er ráð fyrir að hveitiframleiðsla dragist verulega saman víðast hvar í Norður-Evrópu: um 3,1 milljón tonn í Frakklandi, sem framleiðir að jafnaði tæp 40 milljón tonn árlega; um 3 milljón tonn í Þýskalandi, þar sem ársframleiðslan er annars tæp 30 milljón tonn, um 2 milljón tonn, af fimm, í Danmörku, um milljón tonn í Svíþjóð og svo framvegis. Heimsmarkaðsverð á hveiti hefur þegar tekið að hækka, í fyrsta sinn síðan 2012.
Blaðamaður The Guardian ræddi við Lennart Nilsson, 55 ára gamlan kúabónda í grennd við Malmö og einn stjórnenda sænsku bændasamtakanna. Hann sagði þurrk þessa sumar vera þann versta sem hann hefði upplifað og búast mætti við 50% rýrari uppskeru en að jafnaði, jafnvel minna en það. Sérfræðingar samtakanna gera ráð fyrir að um 8 milljarðar sænskra króna tapist vegna uppskerubrestsins, eða tæplega 100 milljarðar íslenskra króna. Þá er gert ráð fyrir að mörg bú verði hrakin í þrot af þeim sökum.
Þá segjast samtök kartöflubænda í Þýskalandi gera ráð fyrir 25 rýrnun í uppskeru frá síðasta ári, og vara við því að franskar kartöflur verði ekki aðeins dýrari en á meðalári heldur styttri, þar sem kartöflur þessa árs verði í smærri kantinum.