Smári McCarthy, þingmaður Pírata, segir „vel hugsanlegt að Rússar hafi brotið í bága við INF“, það er samkomulag Rússa og Bandaríkjamanna frá árinu 1987 sem bannar báðum ríkjum að koma sér upp meðaldrægum kjarnaflaugum á landi. „En spurningin sem við þurfum að spyrja okkur,“ segir Smári:
„er hvort það sé betra að Rússar brjóti INF í laumi og fái fyrir það diplómatískar skammir í einrúmi, eða að Rússar, Bandaríkjamenn og aðrir fari aftur í þann gír að fjöldaframleiða meðaldrægar kjarnorkuflaugar fyrir opnum tjöldum?“
Smári lét orðin falla aðspurður um stöðuna sem komin er upp eftir þá tilkynningu Trumps á sunnudag að hann hyggist rifta INF-samkomulaginu. Samkomulagið leiddi til þess að alls 2.700 meðaldrægum Bandaríkjanna og Sovétríkjanna var eytt fyrir mitt ár 1991, en þau beindust einkum að löndum Evrópu.
Að hefja framleiðslu slíkra vopna á ný segir Smári að væri „auðvitað undanfari annars vopnakapphlaups ─ annars kalds stríðs.“
Smári segir Rússa ekki eiga að komast upp með að svíkja samninga, sé sú raunin, „en sú aðferðafræði að fara alltaf í hart hefur sögulega ekki verið mjög árangursrík í diplómatísku samhengi.“ Hann segir að vandinn við það sem Bandaríkin undir forystu Trump geri nú varðandi INF-samninginn, líkt og í tilfelli annarra alþjóðasáttmála —Smári nefnir samninginn um afvopnun og vopnaeftirlit með Íran, fríverslunarbandalagið NAFTA, „og jafnvel NATO og aðra samninga“— samsvari því að „taka alltaf forvirk svik á öllum fangaklemmum.“
Fangaklemma eða valþröng fangans (prisoner’s dilemma) er heitið á þraut eða leik sem snýst um rökvísi, traust og áhættu. Um þrautina má lesa hér.
Smári hefur boðað til fundar í Utanríkismálanefnd vegna stöðunnar sem komin er upp. Fundurinn hefur ekki verið dagsettur, en líklegt þykir að hann fari fram í vikunni.
