Mannkyn hefur þurrkað út 60% af öllum villtum spendýrum, fuglum, fiskum og skriðdýrum frá árinu 1970, samkvæmt rannsókn sem birtist í nýrri skýrslu World Wildlife Fund (WWF), Living Planet Report 2018. Rannsóknin er viðamikil en 59 vísindamenn um heim allan unnu að henni. Mannkyn er að þurrka út auðlindir og tortíma lífneti heimsins, segja vísindamennirnir. Vöxtur í matvælaiðnaði er aðalsökudólgurinn, samkvæmt niðurstöðum rannsóknarinnar.
Mike Barrett, yfirmaður vísindarannsókna og verndarmála hjá WWF, bendir á að ef mannkyni fækkaði um 60% væri það á við að þurrka út byggðir Norður- og Suður-Ameríku, Afríku, Evrópu, Kína og Ástralíu. „Það er umfang þess sem við höfum gert.“
Hann segir að þó að það sé „átakanlega dapurt“ að undrum náttúrunnar skuli fækka svo, þá snúist málið um fleira. „Þróunin ógnar framtíð mannfólks. Náttúran er ekki eitthvað sem er „indælt að hafa“, hún heldur okkur á lífi“.
Þannig snýst vandinn, eða krísan, ekki bara og jafnvel ekki fyrst og fremst, um tegundir í útrýmingarhættu. Samkvæmt rannsókninni rýrnuðu stofnar fiska og hryggleysingja í heimshöfunum um alls 6 milljarða tonna á tímabilinu. Það er tæpt tonn á hvert núlifandi mannsbarn.
Samkvæmt rannsókninni urðu vistkerfi í ferskvötnum þó verst úti, en stofnar þeirra rýrnuðu um 83 prósent, yfir heiminn litið, frá 1970. Meðal heimshluta urðu Suður- og Mið-Ameríka verst úti, en þar fækkaði dýrum um 89%.
Aðrar nýlegar rannsóknir hafa leitt í ljós að mannkyn hefur fækkað spendýrum jarðar um 83% frá upphafi, og jurtum um helming. Jafnvel þó að þessari tortímngu lyki umsvifalaust, hér og nú, segsja vísinda menn að það tæki villt lífríki 5–7 milljónir ára að jafna sig á þessum áhrifum.
Margir vísindamenn hafa tekið að líta á þessa hnignun lífkerfa sem sjötta fjöldaútdauða jarðsögunnar. Meðal hinna fimm er útdauði risaeðlanna.
Marco Lambertini, forseti WWF, segir lykilvandann vera neyslu: „Við gewtum ekki lengur hunsað áhrif ósjálfbærra framleiðsluhátta og sóunar í lífsvenjum okkar.“ Tanya Stelle, framkvæmdastjóri samtakanna, sagði við birtingu skýrslunnar: „Við erum fyrsta kynslóðin sem veit að við erum að tortíma lífríki hnattarins og sú síðasta sem getur gert eitthvað í því.“
Hina nýbirtu skýrslu WWF má nálgast hér.
