Síðastliðinn sunnudag urðu þau tíðindi að þjóðaröryggisráðgjafinn John Bolton tilkynnti að ekki yrði af brottflutningi Bandaríkjahers úr Sýrlandi fyrr en kúrdískum sveitum og yfirráðasvæðum hefðu verið tryggðar varnir. Bandaríkjaforseti bætti því við að herinn myndi ekki yfirgefa landið „fyrr en ISIS er farið“. Forsetinn virðist að því leyti hafa endurmetið stöðuna frá því 19. desember, þegar hann sagði að Bandaríkjamenn hefðu sigrast á ISIS í Sýrlandi og því ástæðulaust að dvelja þar lengur.
Þessar tilkynningar virðast, að minnsta kosti tímabundið, hafa sett úr skorðum áform Tyrklandsstjórnar um að hefja víðtækar hernaðaraðgerðir gegn Kúrdum í Norður-Sýrlandi. Erdogan, Tyrklandsforseti, ávarpaði þingið í Ankara á þriðjudag og sagði breytt áform Bandaríkjanna „alvarleg mistök“. Þá sakaði Erdogan Bolton um að ganga erinda Ísraelsríkis í málinu.
Víglínur þvers og kruss
Ágreiningur hefur staðið milli Bandaríkjanna, eða að minnsta kosti ákveðinna deilda bandaríska stjórnkerfisins, og Tyrklands, um stöðu og rétt Kúrda í Sýrlandi, þá einkum lýðræðishreyfingarinnar YPG/YPJ sem byggt hefur upp sína eigin samfélagsinnviði í norðurhluta Sýrlands á svæði sem þau nefna Rojava. Þegar Donald Trump tilkynnti nýverið að hann hygðist flytja allt bandarískt herlið burt frá Sýrlandi óttuðust Kúrdar og aðrir þeir sem styðja lýðræðistilraunin í Rojava um viðbrögð Tyrkja. Þar sem kúrdísku sveitirnar sáu að langmestu leyti um eiginlega bardaga á jörðu niðri, í baráttunni gegn ISIS, í slagtogi við Bandaríkin sem lögðu einkum til stuðning úr lofti, eru Bandaríkin skuldbundin Kúrdum sem bandamönnum. Á sama tíma eru Bandaríkin og Tyrkland bandamenn til langs tíma, sem aðilar að hernaðarbandalaginu NATO. Hverfi Bandaríkin frá Sýrlandi er ekki aðeins óttast heldur hefur Erdogan lýst því blákalt yfir að hann hyggist beita Tyrklandsher til að binda endi á yfirráðasvæði Kúrda í Norður-Sýrlandi og lýðræðisþróunina Rojava með blóðbaði.
Jim Mattis, fyrrum varnarmálaráðherra Bandaríkjanna, sagði af sér nú undir áramót, ekki síst vegna ágreinings við Trump um afstöðu Bandaríkjanna í þessu máli: svo virðist sem Mattis hafi talað máli þess að virða skuldbindingar Bandaríkjanna við Kúrda, en Trump kæri sig kollóttan.
