Marta Guðjónsdóttir, borgarfulltrúi Sjálfstæðisflokksins í Reykjavík, fer mikinn í nýlegri grein í Grafarvogsblaðinu. Umræðuefnið er uppsetning öryggismyndavéla í hverfinu, en tillaga um uppsetingu þeirra hlaut afgerandi stuðning á Betri Reykjavík árið 2018 og sigraði finnska útisaunatunnu með 307 hjörtum gegn 212.
Upphaflega tillagan er um “Myndavéla kerfi í Grafarvog” og hljóðar svo:
Fá uppsettar myndavélar í hverfi Grafarvogs, svona svipað og Garðabær gerði, og svo ef eitthvað kemur upp á og það þarf að skoða eitthvað að það sé í höndum lögreglu að skoða. Þannig er ekki verið að brjóta á persónuverndarlögum.
Í meðförum borgarfulltrúans snýst tillagan þó fyrst og fremst um eftirlit með mannaferðum inn og út úr borgarverfum:
Í mörgum hverfum borgarinnar hafa íbúar sýnt því áhuga að auka öryggi sitt og nágranna sinna með eftirlitsmyndavélum sem borgaryfirvöld kæmu fyrir við helstu aðkomuleiðir hverfanna.
Og fulltrúi flokks einstaklingsfrelsis og einkalífs liggur ekki á skoðun sinni þegar kemur að úrtölufólk, sem vill fara varlega í eftirlit hins opinbera með borgurunum:
„Til er fámennur og veruleikafirrtur hópur fólks sem virðist illa haldinn af því ofsóknaræði að svona vélar verði notaðar til þess að fylgjast með okkur öllum, alltaf og alls staðar og koma á alræði á Íslandi. Þetta eru yfirleitt einstaklingar sem hafa einhvern tíma heyrt minnst á skáldsöguna 1984, eftir Georg [svo] Orwell, hafa líklega aldrei lesið hana, telja sig hafa áhyggjur af frelsi einstaklingsins en bera, samkvæmt skrifum sínum á samfélagsmiðlum, ekkert skynbragð á einstaklingsfrelsi og hafa augljóslega aldrei lesið John Lock [svo], Adam Smith, John Stuart Mill, Isaiah Berlin, F.A. Hayek, Karl R. Popper né Milton Friedman.“
Meðal þeirra sem grunaðir eru um að hafa í veruleikafirringu og ofsóknaræði láðst að kynna sér verk þessara merku höfunda hlýtur að vera annar borgarfulltrúi Sjálfstæðisflokksins, Katrín Atladóttir, sem hefur beitt sér gegn óhóflegri notkun eftirlitsmyndavéla og freistaði þess að láta loka myndavél sem Vegagerðin hafði komið upp við Einarsnes í Skerjafirði og bauð upp á beina útsendingu af ferðum og einkalífi íbúa við þá götu. „Þegar tækninni fleygir fram þarf að doka við og stíga varlega til jarðar“ segir Katrín í grein í Fréttablaðinu og varar við því á Twitter að eftirlitssamfélagið læðist upp að okkur ef við séum ekki á tánum.
Kvennablaðið ætlar sér ekki þá dul að meta með fullnægjandi hætti hvernig framlag höfunda á borð við Mill, Popper, von Hayek og Friedman getur stutt rafrænt eftirlit með þegnunum, en verður hugsað til þeirrar spurningar sem Popper taldi lykilspurningu um stjórnskipan samfélagsins:
Hvernig getum við hagað stofnunum lýðræðisins til að þær tryggi sem best að illir eða óhæfir stjórnendur valdi sem minnstu tjóni? *
*Karl R. Popper: The Open Society and its Enemies, vol. I, kafli 7
