Læknar í Rússlandi halda áfram að detta út um glugga og eru nú orðnir þrír á síðustu tveimur vikum. Tveir létust í lendingu en sá þriðji liggur þungt haldinn á sjúkrahúsi.
Lögregluyfirvöld segjast vera með málin í rannsókn.
Nýjasta tilfellið er Alexander Sjúlepov frá Voronesh, sem datt út um glugga á annarri hæð eftir að hafa tjáð sig óvarlega um skort á búnaði og að vera þvingaður til að halda áfram að sinna sjúklingum þrátt fyrir að vera smitaður af kórónuveiru. Hann var lagður inn vegna sjúkdómsins og var á batavegi þegar glugginn varð á vegi hans og hann kaus að því er virðist að stytta sér aldur. Í millitíðinni hafði hann dregið fyrri staðhæfingar sínar til baka.
Natalya Lebedeva, yfirlæknir bráðamóttöku í þjálfunarstöð fyrir geimfara skammt fyrir utan Moskvu gætti sín ekki á opnum glugga þann 24. apríl, datt út um hann og lést. Frekari fréttir af því slysi liggja ekki á lausu en gefið var í skyn að hún hefði stytt sér aldur vegna ásakana um að hafa smitað samstarfsfólk sitt af kórónuvírus.
Þann 1. maí lést Elena Nepomnyaskaja, yfirlæknir í Krasnojarsk eftir vikudvöl á gjörgæslu. Hún er sögð hafa dottið út um gluggann á fundi með fulltrúum heilbrigðisyfirvalda, sem vildu nota spítalann sem neyðarmóttöku veirusjúklinga. Elena var mótfallin þeim áætlunum og taldi spítalann vanbúinn.
