Hún vakti athygli mína á síðasta ári, Alison Redford fylkisstjóri Alberta, einkum vegna þess hversu hvassyrt, hörð og þvermóðskufull hún var við fylkisstjóra Bresku Kolumbíu Christy Clark, í samningaumræðum um olíuleiðslu frá olíulindum í Alberta til sjávar í Bresku Kolumbíu.
Leiðsluna þurfti að leggja yfir viðkvæm landssvæði og að sjálfsögðu vildi Christy Clark fá greitt tilhlýðilega fyrir áhættu og umhverfisrask sem leiðslan myndi valda.
Þarna fóru tvær frambærilegar konur á pólitískum vettvangi að rífast af heift á torgum úti og í fjölmiðlum og riflildið gekk svo langt að Redford sagðist bara ætla að leggja leiðsluna hina leiðina til Quebec, miklu lengri, dýrari og áhættusamari vegalengd, ef að Clark léti ekki af kröfum sínum um gjald fyrir að leggja leiðsluna.
Maður fékk það á tilfinninguna að deilan væri orðin dáldið persónuleg, af hálfu Alberta fylkisstjórans.
Í mars fyrr á þessu ári, sagði Alison Redford svo skyndilega af sér sem fylkisstjóri Alberta, vegna ferðakostnaðarmála á vegum fylkisins. Í dag sagði hún af sér sem þingmaður í Alberta, vegna meintra spillingarmála og misnotkunar á trausti og skattfé almennings, en eftirmaður hennar hefur beðið um lögreglurannsókn á meintri misnotkun forvera síns.
Spillingarmál einstakra stjórnmálamanna og embættismanna í Kanada er litið mjög alvarlegum augum, m.a. til að viðhalda háum staðli í stjórnsýslu. Hvert hliðarspor sem er afhjúpað leiðir af sér umsvifalausa afsögn tímabundið og endanlega eins og í þessu tilfelli. Það er ekki ásættanlegt að skapa fordæmi um linkind og trúnaðarbrot gagnvart kjósendum.
Alison Redford er sökuð um að hafa brotið reglur stjórnarinnar og að hafa ekki nýtt skattpeninga borgaranna af virðingu og lotningu sem henni ber að gera. Þess vegna þurfi hún að greiða persónulegt og pólitískt gjald fyrir mistök sín; er haft eftir formanni framsóknarflokks Alberta, Jim McCormick.
Hvað gerði hún af sér?
Í skýrslu fylkis-endurskoðanda var sagt frá að Redford hafi eytt $45,000 (ÍSK 4,6 milljónir) í ferðalag til að vera viðstödd jarðarför Nelson Mandela. Hún eyddi einnig $3,100(ÍSK 330 þúsund)í ýmis flugfargjöld fyrir dóttur sína og vin. Hún lét bóka „gervifarþega“ í flug, til að geta flogið í friði.
Þrátt fyrir að Alison Reford hafi endurgreitt $48,100 varð ekki aftursnúið, pirringurinn yfir dómgreindarleysinu var yfirþyrmandi.
Í tilfelli Alison, gengur ekki að viðurkenna mistök og lofa bót og betrun.
Alison Redford hefur nú viðurkennt mistök, tekið afleiðingum og gengið á braut.