Fréttatilkynning.
Stofnendur síðunnar Færeyingar: Við biðjumst afsökunar, Rakel Sigurgeirsdóttir og Addy (Valdís) Steinarsdóttir hafa ekki aðeins komið afsökunarbeiðni hennar á framfæri við áhöfn Nærabergs heldur líka við bæjarstjóra Klaksvíkur, útgerð Nærabergs, Lögþingið og færeyskan almenning. Afsökunin var sett fram í tölvupósti sem var sendur á bæjarstjórann í Klaksvík, Jógvan Skorheim, og framkvæmdastjóra útgerðarinnar P/F JFK sem gerir Nærabergið. Framkvæmdastjórinn er Hanus Hansen. Ráðherrar og þingmenn færeyska Lögþingsins fengu samhljóða bréf. Í kjölfarið var bréfið sent á færeyska fjölmiðla.
Þess má geta að a.m.k. þrír netmiðlar í Færeyjum hafa fjallað um afsökunarbeiðnina. Það eru Aktuelt (http://aktuelt.fo/islendingar+bidja+um+umbering.html). Sandportal.fo (http://www.sandportal.fo/islendingar-bidja-foroyingar-um-umbering/) og Norðlýsið (http://nordlysid.fo/islendingar+bidja+foroyingar+um+umbering.html) en Norlýsið birtir bréfið í heild.
Afsökunarbeiðnin var sett fram á Facebook í kjölfar frétta um viðbrögð íslenskra stjórnvalda við umleitan færeyska makrílveiðiskipins, Nærabergs, um að fá að leggjast að bryggju í Reykjavík vegna vélabilunar og njóta nauðsynlegrar þjónustu. Fréttir af frávísun stjórnvalda til að byrja með og síðan að hleypa þeim að landi með þeim skilaboðum að þeir fengju hvorki að stíga í land né njóta annarrar þjónustu en liggja við bryggju á meðan á viðgerð vélarinnar stæði kölluðu á sterk viðbrögð mjög stórs hóps. Þessi viðbrögð komu berlega fram í athugasemdakerfum bæði íslenskra og færeyskra fréttamiðla þar sem fólk lýsti því yfir að það setti sig upp á móti slíkri framkomu við frændur og nágranna og þá ekki síst fyrir þann stuðning og höfðingsskap sem Færeyingar hafa sýnt þjóðinni endurtekið á neyðarstundum líkt og átti við snjóflóðaárið 1995 og í kjölfar hrunsins 2008.
Tilgangurinn með því að stofna síðu á Facebook um þetta málefni var í aðalatriðum sá að koma því örugglega á framfæri við skipsverjanna á Nærabergi og færeysku þjóðina að það væri stór hópur Íslendinga sem skammaðist sín ekki bara fyrir framkomu stjórnvalda gagnvart þeim heldur vildu biðjast afsökunar líka. Þessu er komið á framfæri á síðunni með þessum texta: „Við hörmum framkomu íslenskra stjórnvalda í garð skipverja færeyska makrílveiðiskipsins Nærabergs og biðjumst innilegrar afsökunar.“ Á þeirri viku sem er liðinn frá því að síðan var sett í loftið hafa nær 14.000 manns tekið undir.
Að lokum langar okkur til að vekja athygli á skoðanakönnun sem er í gangi á forsíðu Vinnuvitan.fo (http://www.vinnuvitan.fo/) en þar eru lesendur spurðir út í það hvaða viðbrögð þeim finnst eðlilegast að gripið sé til vegna Nærabergsmálsins og væntanlega Gullbjórsmálsins líka. Í umræddri skoðanakönnun er boðið upp á fjóra valmöguleika sem eru: afsökunarbeiðni frá stjórnvöldum, uppsögn Hoyvíkursáttmálans, afsökun og uppsögn eða láta þetta allt sem vind um eyru þjóta.
Á þessari stundu eru þeir ekki margir sem hafa greitt atkvæði en krafan um afsökun íslenskra stjórnvalda nýtur þó áberandi fylgis. Í mannlegum samskiptum þykir það eðlilegt og sjálfsagt að krefjast afsökunar til hreinsunar andrúmsloftisns og því er það ekki óeðlileg krafa að íslensk stjórnvöld biðji Færeyinga opinberlega afsökunar til að ljúka þessu máli.
Hér er bréfið á íslensku og færeysku.
„Þegar þetta er skrifað hafa hátt í 14.000 Íslendingar lækað Facebooksíðuna: „Færeyingar: Við biðjumst afsökunar“. Síðan var stofnuð vegna Nærabergsmálsins þann 29. ágúst síðastliðinnn í þeim tilgangi að koma afsökunarbeiðni íslensks almennings á framfæri við Færeyinga.
Með þessu bréfi viljum við tryggja að hún skili sér bæði til almennings og stjórnvalda í Færeyjum. Afsökunarbeiðnin sem komið er á framfæri á síðunni er svohljóðandi:
„Við hörmum framkomu íslenskra stjórnvalda í garð skipverja færeyska makrílveiðiskipsins Nærabergs og biðjumst innilegrar afsökunar.“
Slóðin á síðuna er eftirfarandi: https://www.facebook.com/faereyjar
Með kærleikskveðjum,
Rakel Sigurgeirsdóttir
Addy (Valdís) Steinarsdóttir
Þetta bréf hefur verið sent á útgerð Nærabergs, borgarstjóra Klaksvíkur, þingmenn og ráðherra í Færeyjum auk þarlendra fjölmiðla.
___________________________________________________________
Færeyski textinn:
Tá hetta er skrivað, hava nærum 14.000 íslendingar dámað Facebooksíðuna „Føroyingar, vit biðja um umbering“. Síðan bleiv stovnað vegna málið um Næraberg, tann 29. august, við tí fyri eyga, at íslendska tjóðin kundi biðja føroyingar um umbering.
Vit vilja við hesum brævi tryggja okkum, at umberingin verður borin bæði til fólkið og stjórnina í Føroyum. Soleiðis ljóðar umberingin á síðuni:
„Vit eru hørm um ta viðferð, manningin á føroyska makrelskipinum, Nærabergi, hevur fingið av íslendsku stjórnini, og biðja um umbering.“
Leinkjan á síðuna er henda: https://www.facebook.com/faereyjar
Við vinarkvøðu
Rakel Sigurgeirsdóttir
Addy (Valdís) Steinarsdóttir
Hetta bræv er sent til reiðaríið hjá Nærabergi, borgarstjórin í Klaksvík, tingmenn, landsstýrisfólk og fjølmiðlar.“