Kristín Helga Gunnarsdóttir formaður Rithöfundasambands Íslands skrifar:
„Bókaþjóðin fær hrollkaldar kveðjur frá stjórnvöldum í fjárlagafrumvarpi þessa hausts.
Boðuð er 5 prósenta virðisaukaskattshækkun á bækur – úr 7 prósentum í 12 prósent. Þetta hefur áhrif á fagur – og fræðibókmenntir og allar kennslubækur.
Þessi stefna hefur áhrif á útbreiðslu bóka, læsi og þjálfun tungumáls til framtíðar. En ekkert er meitlað í stein og framundan er þref þingmanna um einstaka liði þessa frumvarps.
Stjórn RSÍ er í nánu samstarfi við aðra hagsmunaaðila og félaga í bókmenntaheiminum og saman leggjumst við á árar.
Menntamálaráðherra fer nú um landið og kynnir stefnu sína í læsi samkvæmt Hvítbókinni. Í Hvítbókinni segir að lesskilningur sé forsenda þess að nemendur geti náð hæfni til að fóta sig í samfélaginu. Þar segir jafnframt að gæði menntunar varði okkur öll, hafi gildi fyrir samfélagið í heild og lýðræðislega og efnahagslega þróun. Það er því gríðarleg mótsögn að þessi ráðherra standi nú fyrir aukinni skattlagningu á bækur og þar með taldar námsbækur.
Stjórn RSÍ treystir því að ríkisstjórnin vakni til vitundar og hafi metnað á við færeyinga, breta, íra og norðmenn og afnemi þennan skatt með öllu.
Það er okkar markmið í samvinnu við hagsmunaaðila að fá þessum tillögum breytt svo við megum standa jafnfætis nágrannaþjóðum okkar en ekki síst til að við getum spyrnt við fótum gegn ólæsi.
Látum í okkur heyra. Tölum saman og tölum við þingmenn allt í kringum okkur. Málið er stærra en svo að það snúist um skattahækkun. Það snýst um menningarstefnu og vilja þjóðar til að standa vörð um viðkvæma þjóðtungu sem á svo sannarlega undir högg að sækja.“