Það er eitthvað hjá mér með mat og minningu um sumarfrí þessa dagana. Ilmurinn sem verður í eldhúsinu þegar þessi kjúklingaréttur er eldaður dregur mig vel áleiðis til Marokkó. Ekki að ég þekki Marokkó út og inn, það er af og frá. Eða að ég hafi fengið þennan rétt þar. Held bara að það sé ilmurinn af kryddunum sem eru í honum. Nákvæmlega þennan kryddilm fann ég á kryddmarkaði í Marokkó.
Fyrir langa löngu fórum við fjölskyldan í frí til Costa del sol. Eins og gengur var boðið upp á margs konar skoðunarferðir. Ein þeirra var ferð til Marokkó. Mér fannst ótrúlega spennandi að geta farið til Afríku. Á þessum tíma hafði ég ekki farið á svo framandi slóðir. Ég vildi ekki fyrir mitt litla líf missa af þessari ferð. Við fórum.
Fararstjórarnir lögðu okkur lífsreglurnar. Það mátti alls ekki kaupa neitt af sölumönnum úti á götu, ég man ekki hvað gæti gerst þá, ekki taka myndir af fólkinu, varla mátti horfa á það og ég veit ekki hvað og hvað. Ég var orðin frekar stressuð yfir því að hafa ákveðið að fara í þessa hættuför. Þar sem við vorum leidd í gegnum gömlu borgina fór ég ekki alveg eftir reglunum. Ég horfði vel og vandlega í kringum mig og varð heilluð af mannlífinu á götunum. Ég sá meðal annars konu elda við opinn eld.
Á eldinum var einhvers konar pottur með strýtulaga loki sem myndaði stromp. Gufan leið upp úr strompinum. Heillandi! Forvitni mín var vakin. Þó svo að ég vissi ekki hvað væri eldað í þessum potti, langaði mig til að eignast hann. Við gengum framhjá sölumanni sem var að selja slíka potta. Átti ég að stoppa og kaupa? Þar sem ég er oftast mjög hlýðin þorði ég alls ekki að hunsa fyrirmæli fararstjórana og kaupa pott. En mikið sá ég eftir því.
Stuttu eftir að við komum heim var matreiðsluþáttur í sjónvarpinu sem var tekinn upp í Marokkó. Þar var verið að elda í þessum potti sem ég vissi nú að nefndist tagine. Þátturinn vakti aftur löngun mína. Ég hafði séð tagine í búðum hér heima en mér fannst ég verða að eignast tagine frá Marokkó. Allt annað væri plat.
Tíminn leið
Dag einn tilkynnti sú elsta mér að hún væri á leið til Costa del sol. Við þessa frétt lyftist á mér brúnin. Að sjálfsögðu spurði ég hvort hún ætlaði í þessa skoðunarferð til Marokkó. Það stóð til. Þar sem ég er mamma hennar og veit að hún fer ekki alltaf eftir öllum reglum, lét ég slag standa og bað hana að kaupa tagine fyrir mig. Hún var meira en til í það.
Heim kom hún með þetta fallega tagine og vænan slatta af saffran. Hún sagði mér að þetta hefði verið aðeins meira en að segja það. Hún keypti eitt stykki tagine snemma morguns, það var ekkert mál. En nú var hún komin með þennan gullmola í hendurnar og varð því að koma honum heilum alla leið heim. Allan daginn í sjóðandi hita var hún með pottinn í fanginu og þorði ekki að sleppa af honum hendinni alla ferðina. Mikið lagt á sig fyrir mömmuna.
Ekki var allt búið enn. Nú átti eftir að koma gullmolanum alla leið til Íslands. Ekki vildi sú elsta taka sénsinn á að láta pottinn í ferðatöskuna, því eins og allir vita er ekki farið mjúkum höndum um hluti í flugi. Þá var ekki annað eftir en að taka pottinn eina ferðina enn í fangið og það var gert. Og til Íslands kom það heilt og hefur veitt mikla ánægju í eldhúsinu á Njálsgötunni.
Auðvitað þarf ekki tagine til að elda þennan kjúklingarétt. Eldfast form eða ofnskúffa dugar fullkomlega.
Kjúklingur uppskrift
Fyrir fjóra
Í fjölskyldunni hjá mér borðum við konurnar 1 ½ læri en karlarnir tvö og ef þeir eru mjög svangir þrjú.
Innihald:
- 7 – 9 stk. kjúklingalæri
- 5 msk. ólífuolía
- ½ tsk kanill
- Ca 2 tsk. saltflögur
- Pipar eftir smekk
- 1 heill geiralaus hvítlaukur
- 2 msk. röspuð engiferrót
- 2 cm röspuð túrmerikrót
- Maður verður mjög gulur á fingrunum af túrmerikinu.
- 2 tsk. paprikuduft.
- 1 stk. lífræn stítróna
- 100 g lífrænar döðlur
- ½ krukka ólífur
Rétturinn verður enn betri ef kjúklingalærin fá að marinerast í nokkra klukkutíma.
Aðferð:
- Raðið kjúklingalærunum í eldfast form.
- Blandið öllu kryddinu saman við olíuna.
- Smyrjið kryddblöndunni yfir kjúklingalærin.
- Skerið niður sítrónuna, döðlurnar og ólífurnar.
Dreifið yfir réttinn. - Bakið réttinn við 180°C í 50 mínútur.
Raita sósa
Innihald:
- 1 dós hrein lífræn jógúrt
- ½ gúrka
- 1½ msk ferskur sítrónusafi
Aðferð:
- Gúrkan afhýdd og röspuð niður.
- Gúrkan sett í sigti og vökvinn látinn drjúpa af henni.
- Til að flýta fyrir þrýsti ég ofan á röspuðu gúrkuna með eldhúspappír.
- Gúrkunni og sítrónusafanum blandað saman við jógúrtina.
Ristað bygg var í einni uppskriftinni á súrdeigsbrauðnámskeiðinu sem ég fór á fyrir stuttu. Mér fannst það smakkast ótrúlega vel og hugsaði sem svo að það gæti smellpassað sem meðlæti með mat. Sem það og gerði. Ég er ekki sérstaklega góð í að tjá mig um bragðkeim af mat. En ég er ekki frá því að ég fyndi hnetukeim af ristaða bygginu.
Ristað bygg
Fyrst ristað síðan soðið.
Innihald:
- 100 g bygg
- Ég notaði lífrænt íslenskt.
- 200 g vatn
Aðferð:
- Stillið ofninn á 160°C.
- Byggið sett í ofnskúffu.
- Haft inni í 20 mínútur.
Þá er að sjóða byggið.
- Sjóðið 200 g af vatni.
- Þegar vatnið er farið að sjóða bætið bygginu út í.
- Lækkið hitann (hafið á lægsta straum og lokið á) undir pottinum.
- Látið malla í 40–45 mínútur.
- Hrærið í öðru hverju.
Ef ég á að vera alveg hreinskilin þá er/var þetta uppskrift af nanbrauði. Ég hef bakað það ótal sinnum og alltaf farið eftir þessari uppskrift og fengið þessi fínu flötu nanbrauð. Að þessu sinni varð þetta svo meira nanbollubrauð. Ég veit svo sem af hverju það gerðist. Ég læt það bara flakka.
Anna Fjóla ljósmyndari, kunningjakona mín, var að ljósmynda fyrir mig og gefa mér góð ljósmyndaráð. Eins og gengur þegar tvær konur eru saman komnar í eldhúsi sem báðar hafa mjög gaman að tala, æddi tíminn áfram. Deigið fékk því töluvert meiri lyftingu en ég gef upp í uppskriftinni. Töluvert merkir víst á annan tíma. Þannig að ef þið viljið nanbollubrauð þá er bara að gleyma deiginu. En ef þið ætlið að baka nanbrauð þá farið endilega eftir uppskriftinni.
Dætur mínar og mágkona voru í mat hjá mér. Ég sagði ekki orð um að bollurnar ættu að vera nanabrauð. Ég var meira að segja að hugsa um að sleppa nanbollubrauðinu á blogginu. Eftir að dætur mínar og mágkona dásömuðu það og höfðu á orði að þær hefðu aldrei fengið þetta góða brauð áður hjá mér ákvað ég bara að láta það flakka.
Nanbrauðbollur uppskrift
16 stykki
Innihald:
- 200 ml volg (fingurheit) mjólk
- 1 msk. þurrger
- ½ tsk. pálmasykur
- Gerið nærist á sykri
- 1 tsk. salt
- Öllu blandað saman og látið bíða í 5 mínútur
- 550 g gróft spelt
- 2 tsk. lyftiduft
- 1 tsk. garam masala-krydd
- 4 msk. ólífuolía
- 1 dós lífræn jógúrt
- Blandað saman og gerblöndunni bætt út í.
Aðferð:
- Allt hráefnið sett í skál.
- Deigið er fyrst hrært með sleif og síðan hnoðað í höndunum.
- Deigið sett á hnoðmottuna og klárað að hnoða.
- Búin til pylsa úr deiginu.
- Skorið niður og gerðar kúlur á stærð við stóra tómata.
- Kúlurnar flattar út.
- Ég ýti á þær með lófanum.
- Látið hefast undir votu viskastykki í 10 mínútur.
- Bakað við 210 °C í 10 mínútur.
Ofan á eftir bakstur
- 1 dl olía
1 tsk. maldonsalt - 1 stk. marin hvítlauksrif
- Má vera meira.
- Blandað saman og penslað ofan á brauðin strax eftir bakstur.
Njótið vel, hvort sem þið eldið og bakið þetta allt eða kannski bara kjúklinginn.