Sigríður Ingibjörg Ingadóttir býður sig fram til formanns Samfylkingarinnar og tilkynnti það í dag en landsfundur Samfylkingarinnar er á morgun. Sigríður er greinilega hvergi bangin og því upplagt að fá hana í lauflétta yfirheyrslu.
Þú ætlar í formannsslag við Árna Pál Árnason eins og heyrinkunnugt er og því viljum við hjá Kvennablaðinu rekja úr þér garnirnar, ertu tilbúin?
Já.
Til hvers er Samfylkingin? Á hún eitthvert erindi við þjóðina?
Auðvitað á jafnaðarflokkur erindi við þjóðina. Mjög efnað fólk eignast sífellt meira og notar fjárhagslega yfirburði sína til að grafa undan samfélaginu sem við eigum öll saman. Við þurfum öfluga Samfylkingu sem stendur með því sem við eigum öll sameiginlega. Við þurfum að verja börnin okkar, mömmur okkar og pabba, fólk sem er öðruvísi, unga fólkið sem flytur að heiman og fólkið sem nær ekki endum saman af því kaupið er of lágt og vextirnir of háir.
Hver er aðaltilgangur flokksins?
Akkúrat núna er aðaltilgangur flokksins að verja fólkið í landinu fyrir verstu ríkisstjórn sem hér hefur setið. Almennt er tilgangur flokksins að búa til gott og sanngjarnt samfélag.
Er stefnan ennþá að ganga í ESB?
Já. Brussel er að mörgu leyti þunglamaleg og ESB á í allskonar vandræðum en ég er sannfærð um að aðild að ESB og full þátttaka Íslands í samfélagi þjóðanna væri öllum til hagsbóta nema þeim örfáu sem hagnast á einangrunarstefnu og höftum.
Nú flykkist ungt fólk til Pírata. Af hverju?
Ég skil það vel. Þau eru hress, heiðarleg og tala mannamál. Það er gaman að vinna með þeim og ég hlakka til að gera meira af því.
Það er augljóst að Samfylkingin hefur verið í ákveðnum vandræðum undanfarin ár og tapaði stórt í síðustu kosningum. Hvar ætlar þú að byrja?
Við höfum ekki tíma til að leggjast í naflaskoðun en við megum ekki hætta að gagnrýna sjálf okkur heldur. Fyrst og fremst þurfa allir að standa saman og verja fólkið í landinu fyrir ríkisstjórninni. Ef okkur tekst að gera gagn verður miklu auðveldara að leysa innanbúðarmál Samfylkingarinnar.
Ertu hægrikrati, vinstrikrati eða miðjukrati?
Ég er jafnaðarmaður og trúi á frelsi einstaklingsins. Frelsið frá fjötrum fátæktar og mismununar.
Skiptir máli að þú ert kona?
Já.
Þú ert úr Reykjavík. Hefurðu komið út á land?
Hahaha. Hefur þú komið til Svalbarða? Þar er hilla fyrir riffilinn í staðinn fyrir fatahengi. Ísland er stórt land með ótrúlega fjölbreytt og spennandi viðfangsefni og ég hef ferðast skammarlega víða á kostnað skattgreiðenda til að kynna mér þau.
Er munur á félögum þínum úti á landi og í höfuðborginni?
Kannski. Á mörgum stöðum á landsbyggðinni hafa félagar mínir þurft að heyja alltof harða baráttu fyrir sjálfsögðum réttindum og augljóslega skynsamlegum lausnum.
Styður fjölskyldan þig eða vill hún að þú komir heim að elda bjúgu?
Ég á frábæra fjölskyldu. Þau gagnrýna mig, styðja mig, elska mig og verða þreytt á mér. Það er gagnkvæmt. Ég stórefa að ég geti breytt því með því að elda bjúgu.
Hver er uppáhaldsþingmaðurinn þinn?
Ég geri ráð fyrir að ég megi ekki nefna þingmenn úr eigin flokki. Úr öðrum flokkum er það Helgi Hrafn núna, hann hefur vaxið mikið og er toppmaður. Svo á ég auðvitað góða vinnufélaga í öllum flokkum, enda er fullt af góðu fólki á þingi þó ástandið sé slæmt núna.
Hvern myndir þú kjósa fyrstan burt úr þingsal?
Sigmund Davíð Gunnlaugsson með Bjarna Benediktsson í vasanum.
Eru of margir framsóknarmenn í Samfylkingunni?
Nei. Og þó, það eru einstaka Framsóknarmenn í okkar röðum, svona af gamla skólanum, sem trúa á félagshyggju.
Er Samfykingin spilltur flokkur?
Nei. Engin stjórnmál eru algjörlega án spillingar en það er furðuleg hugmynd að Samfylkingin sé spillt.
Ef þú réðir öllu, hvernig væru hlutirnir hjá fólkinu í landinu?
Ég vil ekki ráða öllu. En það væri minni munur á hæstu og lægstu launum. Það væri auðveldara að búa í íbúð sem er gaman að koma heim til sín í, læra það sem maður hefur áhuga á og vera það sem maður vill vera. Við hefðum alvöru gjaldmiðil. Og frændfólk mitt fengi vonandi gott samfélag eins og allir aðrir, hvorki meira né minna.