Bíddu nú við, hvað er í gangi hér? Er þetta ekki matarblogg? Af hverju er þá verið að vísa í skó? Satt best að segja veit ég ekki alveg hverju á að svara. En það getur verið eitthvað á þessa leið. Þegar ég var að hugsa um þessa færslu, kom þetta skilti, sem hangir uppi á vegg á ganginum hjá okkur upp í huga mér. Skór og fiskur? Skrítið, ekki satt? Fyrir nákvæmlega þremur mánuðum byrjaði ég á þessu matarbloggi. Þegar ég fór að hugsa um það og þessa fiskuppskrift og hinar sex fiskuppskriftirnar sem ég hef þegar látið inn, fannst mér þetta bara smellpassa. Í staðinn fyrir skó gæti staðið fiskur. Enn þá gæti einhver sagt: Ég skil ekki samhengið? Það er alltaf verið að hvetja okkur til að borða meiri fisk. Við viljum flest hafa fjölbreytni í mat. Þess vegna getur verið gott að eiga og prófa margs konar uppskriftir. Síðan bætist alltaf ein og ein inn hjá okkur sem verður uppáhalds.
Mér finnst maður alltaf geta bjargað sér með góðum fiski. Hvort sem það er hversdags eða spari. Einn af kostum þess að elda fisk er að hann tekur stuttan tíma í eldun og auðvelt er að útbúa fullkominn veislumat úr honum.
Ég hef kynnst því úr mötuneytinu í skólanum sem ég vinn í, að yngri börnin vilja helst hvítan fisk og nánast öllum finnst hann mjög góður. Því er upplagt að sleppa pestóinu á bita barnanna.
Uppskriftir
Ofnbakaðir þorskhnakkar með heimagerðu tómatpestói
Stillið ofninn á 200°C
Innihald:
- Þorskhnakkar.
- Ég miða við rúmlega 200 g á mann.
- Heimatilbúna pestóið.
- Uppskrift hér að neðan.
Aðferð:
- Skerið þorskhnakkana niður í hæfilega bita.
- Raðið í eldfast form.
- Smyrjið pestóinu á hvert stykki.
- Bakið í 18–20 mínútur.
- Ég baka fiskinn í 18 mín. þar sem ég vil ekki hafa hann gegnum eldaðan.
Pestó úr sólþurrkuðum tómötum
Nota verður matvinnsluvél við pestógerðina.
Innihald:
- 1 bolli sólþurrkaðir tómatar.
- 4 stk. hvítlauksrif.
- 3 msk. parmesan.
- Raspaður.
- 3 msk. kasjúhnetur.
- Olía eftir þörfum.
- Saltflögur og nýmalaður pipar.
Aðferð:
- Setjið allt hráefnið í matvinnsluvélina nema ólífuolíuna.
- Byrjið að mauka.
- Bætið olíunni smátt og smátt út í og maukið um leið.
- Magnið af olíunni fer eftir því hversu þykkt þið viljið hafa pestóið.
Smekksatriði er hversu gróft fólk vill hafa pestóið. Mér finnst gott að hafa hneturnar svolítið grófar.
Volgt kartöflusalat
Gott með þessum þorskhnökkum og öllu mögulegu.
Með því að útbúa salatið úr volgum kartöflum smýgur kryddið svo skemmtilega inn í þær. Ef þið ætlið að útbúa kartöflusalatið úr kartöflum sem þig eigið soðnar inni í ísskáp, þá endilega hitið þær upp.
Tek það þó fram að kartöflusalatið er líka mjög gott daginn eftir.
Innihald:
- ½ kg kartöflur.
- ½ krukka sólþurrkaðir tómatar.
- ½ krukka fetaostur.
- 10 stk. steinlausar ólífur.
- 1 stk. rauðlaukur.
- 2 stk. hvítlauksrif.
- Saltflögur og pipar.
Mér finnst mjög gott að hafa vel af ólífuolíu og bæti salti út í eftir tilfinningu og smekk. Byrjið t.d. á 2 msk.
Aðferð:
- Sjóðið kartöflurnar.
- Skerið þær volgar niður í báta.
- Setjið í skál.
- Fínsaxið rauðlaukinn, bætið út í.
- Fínsaxið hvítlaukinn, bætið út í.
- Skerið niður sólþurrkuðu tómatana, bætið út í.
- Notið 3 msk. af olíunni.
- Bætið fetaostinum við.
- Látið aðeins af olíunni fylgja.
- Saltið og piprið.
- Ég salta frekar mikið.
Anna Fjóla Gísladóttir ljósmyndari tók myndirnar fyrir mig.
Njótið.