Sæl Ingibjörg Kristjánsdóttir.
Ég las af áhuga og fróðleik samantekt lögmanna ykkar hjóna sem þú birtir í Fréttablaðinu 07. apríl, 2015 þar sem þú fullyrðir að Hæstiréttur hafi farið “mannavillt” og ranglega sakfellt eiginmann þinn, Ólaf Ólafsson í svokölluðu Al Thani málinu.
Eftir þann lestur kom eiginmaður þinn Ólafur Ólafsson hvergi nálægt þessu Al Thani máli og hafði nákvæmlega enga aðkomu að málinu eins og fullyrt er í grein þinni. Ef svo er þá er það auðvitað sjálfsagt og rökrétt að yfirvöld leiðrétti slíkt ranglæti strax og eiginmanni þínum verði sleppt úr fangelsi hið snarasta. Eftir að hafa lesið Hæstiréttadóminn langar mig að beina nokkrum spurningum til þín á sama vettvangi og bréf þitt birtist, í þ.e. Fréttablaðinu 07. apríl. 2015
1. Í símtali sem þú vitnar til í grein þinni, segir þú að verið sé að tala um Ólaf Arinbjörn, lögmann hjá Logos en ekki eiginmann þinn Ólaf Ólafsson og þú birtir svo hluta úr símtalinu, máli þínu til stuðnings.
Mig langar hinsvegar að birta þann hluta simtalsins sem þú birtir EKKI en hann er svohljóðandi:
“….já, sem það og er sko, af því mér skilst að Ólafur náttúrulega á að fá sinn part af kökunni sko”.
Um HVAÐA ÓLAF er verið að ræða hérna Ingibjörg? átti Ólafur Arinbjörn hjá Logos að fá “sinn part af kökunni” ?
2. Bjarnfreður Ólafsson hdl og stjórnarmaður í Kaupþingi, og starfaði fyrir eiginmann þinn, segir í þessu sama símtali og lýst er hér að ofan:
“Hann þarf að fá sinn part af upside-inu sko” og er þarna verið að vísa til skv. dómnum til mögulegra gengishækkana á Kaupþingsbréfunum sem voru keypt.
Hvaða “HANN” er starfsmaður ykkar hjóna að visa til hérna sem eigi að fá “sinn part af upside-inu sko”? Varla er Bjarnfreður, starfsmaður ykkar hjóna, að meina Ólaf Arinbjörn, lögmann hjá Logos sem eigi að fá hagnaðinn af gengishækkun hlutabréfanna í Kaupþing?
3. Í tölvupósti sem Kaupþingsmenn sendu sín á milli, sem Hæstiréttur vísar í ,er spurt „hvernig samning ÓÓ gerir við sjeikinn til að tryggja sér sinn hlut af hagnaðinum af Kaupþingsbréfunum sem þeir eru að kaupa“.
Ingibjörg, hvaða „ÓÓ“ eru Kaupþingsmenn að visa til hérna sem eigi að fá sinn hlut af hagnaðinum ?
4. Fram kom í málinu að Kaupþing hefði lánað félaginu “Gerland Assetts Ltd.”, skráðu á Bresku Jómfrúareyjunum, yfir 12 þúsund milljónir króna sem var að stórum hluta til í eigu Ólafs Ólafssonar eiginmanns þíns. Sama upphæð var svo lánuð til félags í eigu Sjeik Al Thani.
Var eiginmaður þinn skráður eigandi að “Gerland Assetts Ltd.” ÁN HANS SAMÞYKKIS? Ef svarið er já, hafið þið hjónin þá ekki lagt fram kæru á Kaupþingsmenn fyrir skjalafals?
5. Er það rétt að eftir að Kaupþingsbanki féll, þá hafi Ólafur Ólafsson eiginmaður þinn hringt til Kaupþingsbanka í Lúxemborg og beðið starfsmenn bankans að allar ábyrgðir sem Sjeik Thani hafði undirgengist yrðu felldar niður ?
6. Fram kom við vitnaleiðslur málsins að lögmenn Sjeik Al Thani töldu það fráleitt að Sjeikinn ætti að greiða einhverja fjármuni til baka og sögðu skjólstæðing sinn hafa verið blekktan. Sé hafður í huga hinn mikli vinskapur ykkar hjóna við Sjeik Al Thani, sbr. bréf þitt, af hverju kom Al Thani ekki fyrir dóm og bar vitni um sakleysi eiginmanns þíns ?
7. Fram kom fyrir dómi að eiginmaður þinn, Ólafur Ólafsson, hafi persónulega greitt mörg hundruð milljón krónur í vexti af láni til Al Thani. Ef eiginmaður þinn kom hvergi nálægt þessum hlutabréfakaupum Sjeik Al Thani eins og þið hjónin viljið halda fram, af hverju er þá Ólafur Ólafsson eiginmaður þinn að greiða vexti fyrir einn ríkasta mann í heimi,þar sem þetta voru hans persónulegu hlutabréfakaup í Kaupþingi banka en ekki ykkar hjóna?
Virðingarfyllst
Jon Gerald Sullenberger
Bréf birtist einnig í Fréttablaðinu í dag 30. apríl 2015.