„Ekki láta Facebook blekkja þig,“ sagði ég við vinkonu mína sem sat buguð við eldhúsborðið hjá mér, starði á símann sinn og studdi hönd undir þreytta kinn. Ég kunni ekki við að auka á þjáningar hennar en ég er nokkuð viss um að hún var með skyr á olnboganum. Bláberja. Með viðbættum sykri.
„Ég meina, kom on,“ sagði hún. „Ekki séns að hún sé búin að baka bollakökur og skinkuhorn, fara með krakkana í sund og lakka kertaarin klukkan þrjú á sunnudegi. Ég meina, þetta er bara sögufölsun og sjúkleg lygi.“ Ég yppti öxlum og lét eins og ég tæki ekki eftir því að hún talaði fullhátt.
Ég verð að viðurkenna að þessa sömu konu og nú ældi dugnaði sínum yfir internetið hef ég grunaða um að fita morgunafrek sín duglega. Ég er meira að segja viss um að myndin sem hún póstaði af Beef Wellingtoninu um síðustu helgi sé tekin af gordonramsey.co.uk. Hún instaði* hana bara.
Vinkonan við eldhúsborðið mitt var hins vegar heiðarlegi Facebook-notandinn sem lét myndir af fremur misheppnuðum eldhúsverkum sínum á internetið og andlegur status hennar skein heiðarlega í gegnum síðuna. Hún setur aldrei inn ræktarstatus nema hún sé í alvörunni í ræktinni og gleymir jafnvel stundum að setja inn að hún hafi farið í ræktina. Þannig að hún er í raun betri manneskja en Facebook bendir til. Ég held meira að segja að hún hafi aldrei sett in selfie**. Hún á reyndar tvö börn og er oft þreytt þannig að séns á góðri selfie er yfirleitt á milli 14 og 16 á daginn þegar hún er aftur farin að sjá út um augun eftir að andvökubólgunni er farið að létta og áður en sturlunin sem fylgir því að hlusta á tvö börn rífast í gegnum Bónus leggst yfir.
„Nei, veistu þetta er rétt, hún er ekki búin að þessu öllu,“ sagði ég. „Djöfull ættum við að mæta óboðnar í kaffi til hennar og nappa hana í sjúskuðum Russel-galla með gargandi krakka í skálmunum, þurrkubletti í andlitinu og slitna enda í oflituðu – líklega aðkeyptu – hárinu.“
Ég brosti hughreystandi til þreyttu vinkonunnar um leið og ég leit á klukkuna og missti út úr mér: „Vúhú. Fjórir tíma í að barnið mitt sofni. 4,2 tímar í að ég geti farið að sofa. Djöfull sem það er ekki góður status.
Clik here to view.
Æfingamynd. Góð til blekkingar a Facebook.
Ég get svo sem skilið að fólk vilji fegra aðstæður aðeins. Smart status væri: Hot jóga og hráfæði! Eða 34 km á Ægisíðunni! Sannleikurinn = síríuslengja (sko bökunarsúkkulaði), stórt rauðvínsglas og hálfur Scandal-þáttur (næ aldrei að horfa á heilan vegna þreytu) er ekki að gera neitt fyrir neinn á internetinu! Ég sé kommentin fyrir mér hrúgast inn. Alki! Feitabolla! Letingi! Karaktersubba! Sykurfíkill!“
Vinkonan rankaði við sér. „Nei, fokk itt. Gott hjá þér. Síríus og Shiraz er gott kvöld. Æjjj, veistu ég held að við myndum sjá eftir því að mæta óboðnar í kaffi til siðblindu bollakökukonunnar. Ef hún er í raun búin að þessu öllu myndi það reynast mér of mikið áfall. Sjálfsmynd mín myndi splundrast.
Það er svo fátt sem stendur í vegi fyrir því að ég sæki páskaeggið sem ég ætlaði að senda Hrefnu frænku til Danmerkur inn í skáp og borði það allt ein – standandi yfir vaskinum með opna mjólkurfernu á kantinum.
Við þessu átti ég ekkert svar en gat ekki hætt að hugsa um leikritið sem Facebook býður upp á. Eigum við ekki að hætta þessu kjaftæði? Hætta að „insta“ statusa og fótósjoppa lífið. Það er stundum – jafnvel bara oft – fokk erfitt og leiðinlegt og það er bara eðililegt og í góðu lagi. Þessi gerviheimur fullur af túlípönum, bollakökum og vatnsgreiddum börnum gerir ekkert annað en að valda krónískri sektarkennd og vöðvabólgu. Fokk it.
Ég er ekki sykurlaus, er að drekka rauðvín, verkefnalistinn minn er þrútnari en franskur kvikmyndaleikari og dóttir mín fékk krukkumat í kvöldmat. Jebb – hún kúgast yfir lífræna heimatilbúna maukinu sem ég reyni að gefa henni. Hún veit að stundum má bara slaka á og að krukkur eru ekki alslæmar.
Er það kannski góður status?: Tobba Marinós elskar krukkumat og kolvetni! Já og á einhvern undraverðan hátt er sætkartöflumauk á náttbuxunum mínum en ég er of þreytt til að spá í það og ætla að sofa í þessum buxum. Örugglega á morgun líka. Dílið við það, bollakökukusur!
*insta = fríkka myndir með hjálp forritsins Instagram
**selfie = sjálfsmynd tekin á farsíma