Kristinn Hrafnsson skrifaði eftirfarandi færslu á Facebook og leyfði okkur að birta hana hér:
„Landhelgisgæslan hefur sinnt verkefnum erlendis síðustu ár, meðal annars við að sinna flóttamannastraumi yfir Miðjarðarhafið. Gæslan hefur hagnast umtalsvert á þessum verkefnum (T.d. 2. milljarða hagnaður 2010 og 2011 – hreinn rekstrarhagnaður 680 milljónir króna).
Einhvern veginn hefur þessi gróði gleymst þegar rætt er um hetjulegar björgunaraðgerðir gæslumanna í Miðjarðarhafinu.
Það ætti að huga að honum þegar menn deila myndum af sjóreknum líkum barna. Það ætti að ræða þessar fjárhæðir í samhengi við þá mannúð sem stjórnvöld opinbera við ákvörðun um sýrlenskan flóttamannakvóta.
Eða erum við sem þjóð bara sátt við að græða á eymdinni?“
Skjáskot sem Kristinn birti úr skýrslu Ríkisendurskoðunar um Landhelgisgæsluna:
Við hjá Kvennablaðinu höfðum ekki gert okkur grein fyrir að það væri svo ábótasamt fyrir þjóðina að sinna björgunarstörfum en hér er skjáskot úr ársyfirliti landhelgisgæslunnar frá 2013. Það ár er varðskipið Týr 30 daga að störfum fyrir Landamærastofnun EU/Frontex og TF-SIF 130 daga að vinna fyrir sömu aðila.
Hér eru svo tekjurnar:
Samkvæmt heimlidum hefur TF-SIF verið í það minnsta 60 daga í verkefnum fyrir FRONTEX það sem af er 2015 og Týr verður út árið samkvæmt vef Landhelgisgæslunnar en þar segir í frétt frá 22. ágúst:
„Varðskipið Týr siglir nú áleiðis til Spánar þar sem skipið mun starfa við leit, björgun og eftirlit fyrir Frontex, landamærastofnun Evrópusambandsins. Í fyrstu mun skipið sinna verkefnum milli Spánar, Marokkó og Alsír en í nóvember heldur svo Týr til Ítalíu og starfar þar undan ströndum Ítalíu og Sikileyjar út árið.“
Týr var að störfum við Miðjarðarhafið frá því í desember 2014 og fram í júní 2015 samanber þessa frétt gæslunnar frá 2.06 2015 og tekur sér því rétt tveggja mánuða frí frá störfum.
„Varðskipið Týr kom heim í dag eftir ríflega hálfs árs veru á Miðjarðarhafi við landamæragæslu og björgunarstörf á vegum Frontex, Landamærastofnunar Evrópusambandsins.“
Það má því búast við að árið 2015 verði giftusamlegt fyrir landhelgisgæsluna vegna ‘erlendra’ verkefna og ekki óvarlegt að áætla að verkefni fyrir FRONTEX skili á annan milljarð í hagnað á síðustu árum – að þessu ári meðtöldu.