Nú líður að þeim tíma að fólk fer að detta í stundatöflur lífsins og allt virðist leita jafnvægis. Nema vigtin! Hún á það nefnilega til að verða óhagstæð yfir sumartímann. Kvennablaðið bað þjálfarann Önnu Eiríksdóttur hjá Hreyfingu til að svara nokkrum algengum spurningum sem gott er að hafa í huga þegar tekið er upp heilsusamlegra líferni.
Önnu kannast margir við en hún er átrúnaðargoð í líkamsræktarbransanum. Fólk bíður í röðum til að komast að í tíma til hennar.
Eru kolvetni djöfullinn?
„Nei, alls ekki, þau gefa okkur mikilvæga orku. Við þurfum bara að velja þau rétt og borða í réttu hlutfalli við aðra orkugjafa.“ Dæmi um góða kolvetnisgjafa eru flókin kolvetni á borð við grænmeti, ávexti, baunir, hnetur, gróft kornmeti og brún hrísgrjón.
Er æskilegra að borða fyrir morgunæfingu?
„Já, ég ráðlegg fólki alltaf að fá sér smá að borða til að hafa næga orku á æfingunni. Ef fólki finnst betra að æfa á fastandi maga þá er ekkert að því, fer svolítið eftir æfingunni sjálfri og hvað hentar hverjum og einum.“
Er brennslan mest á morgnana?
„Nei, brennslan er ekki meiri á morgnana en á kvöldin. Þetta snýst um að hver og einn æfi þegar hann er líkamlega best upplagður til þess en þannig fær viðkomandi mest út úr æfingunni sinni. Sá sem er sprækur á morgnana getur þannig brennt meira en á kvöldin og öfugt.“
Hvað er eðlilegt þyngdartap á viku?
„Eðlilegt þyngdartap er 1/2–1 kg á viku.“
Er það rétt að ég brenni meira eftir því sem ég hef meiri vöðvamassa?
„Já, það er rétt! Grunnbrennslan okkar er í beinu hlutfalli við fitulausa vefi líkamans (bein, vefi og vöðva). Því stærra hlutfall sem fitulausir vefir eiga í líkamanum því meiri orku þarf líkaminn.“ Líkaminn hefur þannig meira fyrir því að viðhalda vöðvum en fitu.
Er eðilegt að finna fyrir ógleði á æfingu?
„Ef þú æfir af mjög mikilli ákefð þá er alveg eðlilegt að finna fyrir ógleði en það ætti alls ekki að gerast á hverri æfingu, bara tilfallandi í mjög miklum átökum. Þetta getur gerst þegar við förum of hratt af stað eftir hlé frá æfingum, við tökum mjög mikið á eða erum ekki nægilega vel nærð fyrir átökin.“
Hvernig virkar hámarkspúls og af hverju er mikilvægt að vinna eftir honum?
„Hámarkspúls hjá hverjum og einum er einstaklingsbundinn en hann segir ekki til um það í hvernig formi viðkomandi er. Hversu hratt hjartað getur slegið á mínútu ákvarðast af erfðum. Við getum hins vegar aukið slagmagn hjartans í hverju slagi og þannig dælt meira blóði hraðar í gegnum líkamann meira blóði eftir því sem við erum í betra formi. Þegar við vinnum með hámarkspúls æfum við út frá hlutfalli af okkar eigin hámarkspúls þannig að allir ættu að geta fylgst að.“ Sífellt vinsælla er að eiga púlsmæli og vinna út frá eigin hámarkspúls og gera æfinguna þannig enn markvissari.“
10 góð ráð fyrir fólk sem vill koma sér í form!
Athugaðu að hreyfing og minni matarskammtar gera kraftaverk! Flest erum við nefnilega að borða allt of mikið. Hættir þú að borða þegar þú ert orðin södd/saddur?
Settu þér markmið og byrjaðu strax í dag.
Hreyfðu þig í lágmark 30 mín á dag – 4–6 sinnum í viku og taktu vel á því.
Finndu hreyfingu við þitt hæfi og hafðu hana fjölbreytta – mikilvægt að stunda styrktar og þolþjálfun til að ná sem bestum árangri
Fáðu endilega aðstoð við að skipuleggja æfingarnar þínar til þess að fá sem mest út úr þeim, sniðugt að fara á námskeið, til þjálfara eða mæta í hóptíma til að fá góðar leiðbeiningar.
Finndu þér æfingafélaga eða æfingahóp – æfingin verður skemmtilegri og þú tekur betur á.
Mundu að borða alltaf morgunverð til þess að koma brennslunni vel í gang fyrir daginn.
Borðaðu fjölbreytta fæðu 5–6 sinnum á dag og minnkaðu skammtana.
Forðastu sykur og unnar vörur.
Drekktu vel af vatni og fullt af grænmeti og ávöxtum yfir daginn.
Þú átt aðeins einn líkama – ræktaðu hann vel!