Ísdrottningin, Jónína Björg Magnúsdóttir gerði garðinn frægan í vor með laginu Sveiattan við lag Baggalúts, Mamma þarf að djamma. Jónínu blöskraði þegar hún og samstarfsfólk hennar tvöfaldaði vinnuafköst sín í fiskvinnslunni að yfirmenn þeirra skildu umbuna þeim með íspinna þegar eðlilegt hefði verið að bjóða launahækkun eða bónusa fyrir að auka umtalsvert gróða fyrirtækisins.
Jónína Björg kölluð Nína sem hefur undurþýða röddu hefur nú ákveðið að senda frá sér plötu undir heitinu, Sungið fyrir svefninn – með mínu nefi. Hún safnar nú fyrir útgáfunni á Karolinafund.
Þetta er 27 laga geisladiskur en til þess að útgáfa hans megi verða þá þarf hún okkar stuðning og það er hægt að gera á Karolinafund. Karolinafund er hópfjármögnunarvefur og nú er um að gera að leggjast öll á eitt og gera geisladiskinn að veruleika.
Jónína syngur mörg laganna án undirleiks og það verður að segjast að rödd hennar er sérlega áheyrileg og sefandi. Flutningur Jónínu á mörgum þekktum lögum er frábær og verður geisladiskur þessi örugglega vinsæll á íslenskum heimilum.
Við hér á Kvennblaðinu erum sannfærðar um að þetta er geisladiskur sem mun rugga ungum og öldnum í svefn. Lögin eru á íslensku, sænsku og ensku og eru tvö lagana hennar eigin þýðing.
Diskurinn var tekinn upp í Stúdíó Gott Hljóð Borgarnesi. Lagið Komu engin skip í dag lenti það í 3ja sæti í Maggalagakeppni rásar 2 en þetta lag hefur fylgt söngkonunni frá barnsaldri. Lagið er um ekkju sem að missti manninn sinn í sjóslysi og hún fer við hvert sólarlag niður að sjó til að fylgjast með skipaferðum. Hlustið á það hér:
Hér má hlýða á flutning Jónínu og þýðingu hennar á laginu Tvær stjörnur eftir Megas:
Hér er svo myndband sem var tekið upp í skítakulda í gamla vitanum á Breiðinni á Akranesi.