Nú líður að jólum og þá er eins gott að læra að búa til uppstúf eða kartöflujafning til að hafa með jólahangikjötinu nú eða með bjúgum eins og hún Regína Birkis stingur uppá.
Regína Birkis er mikill matgæðingur en hún er dóttir Guðbjargar Birkis sem var húsmæðrakennari og því er Regína með réttu handtökin á hreinu. Regína kennir Tobbu Marinós sem er er barnabarn hennar og lesendum Kvennablaðsins að laga hið eina sanna uppstúf á milli þess sem hún steikir laufabrauð og sýður hangikjöt með fullt hús af börnum og barnabörnum.
Bræðið smjör í potti og hrærið hveitinu saman við þannig að úr verði smjörbolla. Regína skvettir dálítið af köldu vatni samanvið.
Bætið mjólkinni varlega í og hrærið uns jafningurinn verður kekkjalaus. Látið sjóða í nokkrar mínútur og hrærið vel í á meðan.
Kryddið með salti og sykri. Sumir vilja setja í uppstúfinn hvítan pipar og jafnvel örlítið af múskati.
Af Vísindavefnum:
Hver er uppruni og merking orðanna uppstúfur og jafningur?
„Orðin uppstúfur, uppstúf og uppstú eru notuð um hvíta sósu eins og nefnt er í fyrirspurninni. Þau eru að öllum líkindum löguð að danska orðinu opstuvning. Í sögulegu dönsku orðabókinni Ordbog over det danske sprog kemur fram að átt sé við jafning sem gerður er úr hveiti, smjöri og mjólk. Að baki liggur sögnin að stuve op sem notuð er um að hita upp mat við lágan hita í vökva, til dæmis jafningi. Myndin uppstúfur er aðlögun að íslensku beygingarkerfi.“
„Orðið jafningur er einnig aðlagað dönsku orði, jævning. Eiginleg merking er „eitthvað sem jafnað er saman“.