Kvennablaðinu barst eftirfarandi beiðni í tölvupósti rétt í þessu frá KOM almannatengslum:
„Hvorki Ólafur Ólafsson, Hreiðar Már Sigurðsson né aðilar í þeirra umboði „leituðu með óformlegum hætti til Fangelsismálastofnunar um mitt ár 2015 vegna hugmynda um að reka og opna „lúxus“ áfangaheimili fyrir sterkefnaða fanga“. Það er rangt sem fram kemur í fyrirsögn í Kvennablaðinu 17. febrúar sl. að „Kaupþingsmenn vildu reka eigið „lúxusúrræði“ fyrir ríka fanga“.
Fjölmiðlaumfjöllun um aðstæður fanga á Kvíabryggju hefur verið tíð undanfarna mánuði. Það er í sjálfu sér af hinu góða þótt ýmislegt hefur verið fullyrt sem ekki reynist svo fótur fyrir. Umræðan byggist þá of oft á misskilningi eða jafnvel hreinu slúðri. Æskilegra væri að fullyrðingar sem birtast í fjölmiðlum byggðust á staðreyndum.
Það er sama hvað blaðamaður Kvennablaðsins segir að hann hafi talað við marga fyrir umrædda umfjöllun. Kjósi hann að veita viðmælendum nafnleynd eru ummæli og umfjöllun birt á hans ábyrgð og Kvennablaðsins. Það er alvarlegt þegar farið er fram með rangar fullyrðingar. Því óska Ólafur og Hreiðar Már eftir því að Kvennablaðið birtir þessar athugasemdir undir umræddri umfjöllun blaðsins og í sérstakri færslu á vefnum.“
