Carl Baudenbacher forseti EFTA dómstólsins ræddi áhrif dómstólsins á umræðufundi þann 14. mars í Safnahúsinu við Hverfisgötu. Fundurinn var öllum opinn og stóðu að honum Utanríkisráðuneytið og Lögfræðingafélag Íslands.
Fulltrúi Hagsmunsamtaka heimilanna spurði forsetann tveggja spurninga sem hann svaraði skilmerkilega og mjög afgerandi. Ég er sannast sagna mjög undrandi á því að enginn fjölmiðill hafi fjallað um svörin því þau eru STÓRFRÉTT. Ég hef að minnsta kosti ekki séð neitt um þetta stórmál í fjölmiðlunum okkar.
Spurningarnar til forseta EFTA-dómstólsins voru þessar:
a) Eru einhver þekkt dæmi þess að æðsti dómstóll aðildarríkis hafi dæmt þvert gegn ráðgefandi áliti EFTA-dómstólsins?
b) Gæti slíkur dómur sem fer gegn túlkun EFTA-dómstólsins á EES-reglum, leitt til skaðabótaskyldu viðkomandi aðildarríkis?
Hann svaraði spurningu a) um það hvort æðsti dómstóll aðildarríkis hafi dæmt þvert gegn ráðgefandi áliti EFTA-dómstólsins, játandi og var þar að tala um Hæstarétt Íslands í máli Hagsmunasamtaka heimilanna gegn ólöglega kynntri verðtryggingu neytendalána og að EFTA dómstóllinn teldi þetta gróft brot.
Hann svaraði spurningu b) einnig játandi og hvatti Hagsmunasamtök heimilanna til fara í skaðabótamál sem við erum svo sem fyrir löngu búin að ákveða en það var frábært að fá hans álit á þessu máli.
Stjórnarmaður Hagsmunasamtaka heimilanna sem fór á fundinn og bar upp þessar spurningar sagði að forseti EFTA dómstólsins hefði jafnframt sagt að stjórnvöld vissu að þau væru ekki bara að brjóta EFTA samningin með þessum gjörðum sínum heldur væri hér á ferðinni hrein MANNRÉTTINDABROT á íslenskum almenningi – það væri enginn munur á fjárhagslegum mannréttindabrotum og öðrum mannréttindabrotum.
Svo mörg voru hans orð við okkar fyrirspurn.
Forseti EFTA dómstólsins kom líka inn á þessa undarlegu stöðu með Hæstarétt Íslands – að hæstaréttarlögmenn sem hafa gengt opinberum stöðum eða starfað fyrir bankastofnanir séu valdir til starfa við Hæstarétt Íslands – sem á svo að fella hlutlausa dóma milli stjórnsýslu og almennings.
Okkar maður sagði að forsetinn hefði valdið miklum titringi meðal fulltrúa stjórnsýslunnar á fundinum og að þeir hefðu reynt að breiða yfir svörin og það sem forsetinn sagði um Hæstarétt.
Hvar er fjórða valdið, en það kalla fréttamenn sig á tyllidögum?
Hvar eru lögmenn sem vilja starfa eftir lögum en ekki lögleysunni sem hefur viðgengist hér á landi allt of lengi?
Færsla einnig birt á Facebooksíðu Hagsmunasamtaka heimilanna sem finna má hér.