Solla deilir hér með okkur girnilegri páskatertu!
Hér er á ferðinni dásamleg sítrus-páskaterta sem sómir sér vel á veisluborðinu um hátíðina, enda páskagul á lit. Tertan geymist mjög vel í frysti og best er að láta hana standa aðeins við stofuhita og mýkjast upp áður en hún er borin fram.
Páskatertan
Súkkulaði botn
100 g kókosmjöl
100 g hnetur eða möndlur
30 g hreint kakóduft
250 g döðlur
smá sjávarsalt
-byrjið á að setja hnetur, kókosmjöl, kakóduft og salt í matvinnsluvél og látið blandast saman og hneturnar malast. Bætið döðlunum útí og blandið þar til þetta klístrast vel saman. Ef deigið klístrast ekki saman er gott ráð að bæta 1 msk af vatni eða 1 msk af kókosolíu eða nokkrum döðlum í viðbót út í deigið.
Sítrónu fylling
3 dl kasjúhnetur, lagðar í bleyti í 1-2 klst
½ dl kókospálmasykur
½ dl hlynsíróp
¾ dl kókosolía, fljótandi
1 dl sítrónusafi
1 msk sítrónuhýði, lífrænt (má sleppa)
2 tsk vanilla
smá sjávarsalt
– allt sett í blandara og blandað þar til silkimjúkt og kornlaust
Súkkulaði hjúpur – eða sósa
½ dl kakóduft
¼ dl hlynsíróp
½ dl kókosolía
– sett í skál og hrært saman með gaffli
Þrýstið botninum niður í eitt stórt form, eða mörg muffinsform og hellið sítrónufyllingunni yfir. Hellið svo súkkulaðinu yfir og látið standa í frysti í 3 klst. Einnig er möguleiki að bíða með að hella súkkulaðinu yfir þar til kakan er borin fram. Þá er þetta eins og súkkulaðisósa, sumum finnst sú aðferð betri. Kökurnar geymast best í frysti ef á að bjóða uppá þær seinna. Þá er gott að taka kökurnar úr frystinum tímanlega og leyfa aðeins að mýkjast áður en þið bjóðið uppá þessa dásemd. Njótið!