Engin verk sem fyrir liggja krefjast þess að núverandi stjórn sitji áfram

Gylfi Magnússon fyrrverandi efnahags- og viðskiptaráðherra skrifar á Facebook í dag:

Það stenst enga skoðun að ríkisstjórnin sitji áfram mánuðum saman vegna þess að einhver tiltekin verk þurfi að klára.

Í því samhengi hafa helst þessi verið nefnd:

1) Höftin og útboð vegna aflandskróna. Útboðið vegna aflandskróna er á dagskrá núna í vor og það þarf því ekki að bíða lengi vegna þess. Þar fyrir utan er það á forræði Seðlabankans og skiptir ekki öllu hver situr í ríkisstjórn vegna þess. Áætlun um afnám hafta liggur fyrir og það er enginn sérstakur ágreiningur um hana milli stjórnar og stjórnarandstöðu. Það ætti því ekki að breyta neinu um framgang hennar þótt skipt verði um stjórn. Raunar væri mun auðveldara fyrir nýkjörna stjórn með skýrt umboð þjóðarinnar að hrinda svona nokkru í framkvæmd en stjórn sem er í dauðateygjunum.

2) Húsnæðismál. Það eru komnar fram tillögur Framsóknarmanna. Sjálfstæðismönnum líst ekki vel á þær. Annað hvort semja flokkarnir um þetta eða ekki. Það þarf ekki marga mánuði til þess. Þar fyrir utan er ekkert sem bendir til þess að nýkjörin stjórn gæti ekki tekið jafnvel á þessum málum eða betur.

3) Afnám verðtryggingar. Þetta hefur aldrei staðið til og það vita það allir.

4) Búvörusamningurinn. Hann er einfaldlega afleitur og fráleitt að ríkisstjórn í dauðateygjunum bindi hendur arftaka sinna í áratug.

Kannski er ég að gleyma einhverju en það er þá varla stórvægilegt.

Það er því ekkert af þeim verkum sem fyrir liggja sem krefjast þess að núverandi stjórn sitji áfram. Þvert á móti.