Alþjóðlegt ákall til Ban Ki-moon: Refsihyggju hafnað og umbóta í fíknivörnum krafist

Fjörutíu og átta íslenskir áhrifamenn hafa skrifað undir alþjóðlegt ákall til Ban Ki-moon, aðalritara Sameinuðu þjóðanna, um að hann beiti áhrifum sínum á Auka-allsherjarþingi SÞ um vímuefnamál (UNGASS2016) í þágu lýðheilsu og mannréttinda í stað útskúfunar- og refsihyggju.

Þingmenn úr öllum flokkum á Alþingi, aðrir fyrrverandi og núverandi stjórnmálamenn, skaðaminnkunarsinnar, lögfræðingar, listamenn, menntamenn og athafnamenn, þvert á pólitískt og hugmyndafræðilegt litróf íslensks samfélags, leggja málstað umbóta í fíknivörnum í heiminum lið og skrifa undir ákall ríflega eitt þúsund heimsþekktra stjórmálaleiðtoga og áhrifamanna er hafna refsihyggjunni sem tröllriðið hefur veröldinni áratugum saman og bundin er í alþjóðlegum sáttmálum Sameinuðu þjóðanna.

Fyrrverandi forsetar Mexíkó, Columbíu, Brasilíu, Síle, Nígeríu, Grænhöfðaeyja, Sviss og Póllands; fyrrverandi forsætisráðherrar Grikklands, Ungverjalands og Hollands; heimskunnir fræðimenn, lögfræðingar, trúarleiðtogar, stjórnmálamenn og stórstjörnur sameinast um ákall um fráhvarf frá bann- og refsihyggju og nýja valkosti og leiðir í fíknivörnum.

Hér er tengill á ensku útgáfuna og leitarvél sem inniheldur upplýsingar um alla sem ritað hafa nöfn sín undir ákallið.

Mikilvægt er að árétta að undirskriftirnar lýsa stuðningi við þá meginhugsun um umbætur í fíknivörnum í heiminum sem fram koma í ákallinu til aðalritarans, en þurfa ekki endilega að endurspegla skoðanir viðkomandi varðandi markmið og leiðir dagsins í dag varðandi fíknivarnir á Íslandi.

Undirskriftirnar segja ekkert um afstöðu þeirra stofnana eða fyrirtækja sem viðkomandi starfa hjá og endurspegla ekki endilega yfirlýsta stefnu íslenskra stjórnmálaflokka sem viðkomandi tengjast.

Pétur Þorsteinsson, fv. skólastjóri á Kópaskeri og formaður Snarrótarinnar – Samtaka um borgaraleg réttindi, hafði umsjón með söfnuninni á Íslandi.

Eftirtaldir Íslendingar skrifuðu undir: