Á heilsíðu í Fréttablaðinu í dag er mynd af hópi miðaldra og missköllóttra manna. Ég hélt í fyrstu að þarna væri auglýsing frá hagsmunasamtökum bænda eða frá nýstofnuðum karlakór en fyrirsögnin flennistór leiðrétti þann misskilning snarlega.
ÖFLUGASTA ÍÞRÓTTADEILD LANDSINS – Ha?
Ég renndi augum yfir karlahópinn og get með sanni sagt að engan þeirra þekki ég með nafni, sem er kannski ekki mikið að marka – ég hef einu sinni horft á íþróttaleik, nánar tiltekið á handboltaleik Íslendinga við einhverja sem ég man ekki hverjir voru á Ólympíuleikunum í Barcelona árið 1992.
Eina endurminningin sem ég á frá þeim leik er að skammt frá sætinu mínu var hópur Íslendinga málaðir eins og þjóðfáninn í framan – sem öskruðu viðstöðulaust eins og þeir væru sárþjáðir af óútskýrðum innantökum.
Ég horfði lítið á leikinn – fylgdist fremur með landanum og hugsaði: Hvað myndi Attenborough segja?
En að heilsíðu Fréttablaðsins aftur – ég saknaði þess að sjá ekki andlit Helenu Ólafsdóttur sem ég þekki lítillega til og stjórnar í sumar markaþætti í Pepsi-deild kvenna á stöð 2 Sport. Helena Ólafsdóttir sem hefur starfað sem þjálfari í Noregi var mikil markadrottning á árum áður og fyrrum landsliðsþjálfari.
Helena er sumsé þrátt fyrir að hafa ekki fengið að vera með á þessari auglýsingu – íþróttafréttamaður hjá Stöð 2, afrekskona í íþróttum sem á að baki glæstan feril sem leikmaður, mjög eftirsóttur þjálfari, lítur alls ekki út eins og miðaldra karl – en er auðvitað kona.