Gaukur Hjartarsson deildi með okkur fallegum myndum frá Melrakkasléttu fyrr í vetur og nú er það Tjörnesið í allri sinni dýrð. Við báðum Gauk jafnframt að segja okkur ofurlítið frá umhverfi myndanna. Gaukur segir svo frá:
Tjörnes er nesið milli Skjálfanda og Öxarfjarðar. Á Tjörnesi er eitt af fámennari sveitarfélögum landsins, Tjörneshreppur, þar sem búa rétt liðlega 50 manns. Á flestum bæjum á Tjörnesi er stundaður búskapur, þó flest heimili hafi einnig tekjur af annari vinnu.
Innarlega við Tjörnes vestanvert er þéttbýlið Húsavík í Norðurþingi. Við Tjörnes eru þrjár allstórar eyjar.
Lundey er utan við Héðinshöfða, en Mánáreyjar tvær, Lágey og Háey eru um 9 km norðan við nyrstu strönd Tjörness.
Verulegt fuglalíf er á þessum eyjum en einkum er það lundi sem er þar fjölliðaður. Nyrsti tangi Tjörness heitir Voladalstorfa. Þar er fallegt að koma. Þar er viti.
Á um 100 m kafla á þjóðveginum framhjá Árholti sér að „kubbarnir“ fyrir utan Voladalstorfu eru fjórir. Undir öðru sjónarhorni falla þeir saman.
Nyrstu bæir á Tjörnesi eru Mánárbakki, Máná og Árholt. Yst á Tjörnesi er mun snjóléttara en innar við nesið og hefur verið næsta snjólaust í vetur á Mánárbakka fyrir utan óveðursskotið í þarsíðustu viku.
Höfðagerðissandur heitir breið sandfjara milli Héðinshöfða og Eyvíkur. Höfðagerðissandur er vinsælt útivistarsvæði Tjörnesinga og Húsvíkinga og fara þar um tugir manna á góðviðrisdegi.
