Margrét Pála, stofnandi og forstjóri Hjallastefnunnar, hélt þrumuræðu á ársfundi Samtaka atvinnulífsins á dögunum. Hún talaði um dálæti Íslendinga á heimsmetum og sagði að Íslendingar ættu heimsmet í því að setja fjármagn í menntun en það skilaði okkur, samkvæmt rannsóknum, jafnframt heimskustu börnunum.
Margréti var tíðrætt um að á Íslandi ríkti menntaeinokun sem fælist í einsleitri menntun kennara og valdi Kennarasambandsins í skólamálum sem skilaði litlu sem engu svigrúmi til nýsköpunar.
Margrét Pála sagði enn fremur að hjá Kennarasambandinu gættu 36 manneskjur hagsmuna kennara en til samanburðar væri aðeins einn starfsmaður sem gætti hagsmanna barna því hjá umboðsmanni barna væri aðeins einn starfsmaður.
Margrét benti einnig á að nám á Íslandi fyrir börn, þrátt fyrir nýjar námskrár og ný heiti, hafi í raun ekki þróast í takt við tímann. Enn sé gerð sú krafa að allir læri sama námsefnið og ef að barn er ekki gott í einhverju fagi þá skuli það sett í aukatíma, eða eins og Margrét orðaði það:
Þá er bara að gera meira af því sem þú ert slæmur í
Margrét sagði að í menntaskólanámi á Íslandi væri sama upp á teningnum, krafan væri í samfélaginu að skila öllum börnum með stúdentspróf hvað sem tautar og raular.
Öll börn eiga að enda á mynd með stúdentshúfuna á stofuskápnum hjá ömmu
Margrét kallar eftir byltingarkenndum aðferðum við að bjarga börnum frá skólakerfinu og Kennarasambandinu og segir að mikilvægt sé að ná í börnin áður en skólakerfið nái að eyðileggja þau og óskaði eftir aðstoð atvinnulífsins við að ná fram róttækum breytingum.
Hér má sjá Margréti Pálu flytja ræðu sína í fullri lengd og við hvetjum ykkur til að hlýða á hana.
Ljósmynd af MP er tekin af Jónatan Grétarssyni.