Í bakhúsinu á Laugavegi 23 er sköpunargleðinni gefinn laus taumur en þar opna í dag fimmtudaginn 8. maí, níu listamenn og hönnuðir aðstöðu þar sem þeir sýna og bjóða verk sín til sölu.
Fyrir innan gyllta hurð, inn af litlu porti, kúrir bjart og fallegt rými sem fengið hefur nafnið Skúmaskot.
Í Skúmaskoti fást ljósskúlptúrar, pappírsljóð, barnaföt, handlitaðir kjólar, postulín, perluverk, silkislár, málverk, bróderí, bækur, skottur og skart. Nýjar vörur berast oft í viku og listamennirnir skiptast á að vera á staðnum til að taka á móti gestum.
Skúmaskot lætur lítið fyrir sér fara, frá Laugavegi séð og vegfarendur þurfa að hafa augun opin þegar þeir nálgast nr.23, litast um eftir flögrandi gullskrauti, gylltri hurð og auðvitað nafninu ,,Skúmaskot“.
Að Skúmaskoti standa: Elín Haraldsdóttir, Hanna Hlíf, Heiða Eiríksdóttir, Herborg Eðvaldsdóttir, íris Ólöf Sigurjónsdóttir, María Vals / RimmBamm, Rán Flygenring, Þóra Björk Schram og Sæunn Þorsteinsdóttir.
Skúmaskot er opið frá þriðjudegi til laugardags, kl.12-18.
Frekari upplýsingar má finna á facebook