Það er komið sumar og ekki úr vegi að leggja frá sér lopann og prjóna eitthvað brjálæðislegt! Við týndum til nokkur klikkuð prjónaverkefni sem okkur fundust óvanaleg og skemmtileg. Eins og til dæmis þessi froskur sem hér sést krufinn með innyflin úti. Þennan fundum við hér á Etsy.
Ef þú vilt ekki þekkjast í sumar eða hefur gaman af því að hræða börn og gamalmenni þá er þessi húfa upplagt verkefni fyrir þig. Einfalt að prjóna og útsaumurinn með svörtu garni hægðarleikur. Dawn Doran á heiðurinn af þessari hryllingshúfu.
Ertu orðin leið á hjólhýsinu þínu? Þá er um að gera að hekla eða prjóna utan um það. Tekur kannski svolítinn tíma en ef þú kallar í nokkrar vinkonur þínar þá rumpið þið þessu af á nokkrum kvöldum.
kyliejackes.blogspot.com.au
Hitapokar eru dásamlegir og sérstaklega ef þú prjónar eitthvað fallegt utan um þá. Þessi er fallega blár og sérdeilis flottur fiskur sem prýðir hann. Ekki amalegt að ylja sér á þessum. Þennan fundum við á vefnum Ravelry.
Hvernig væri að prjóna utan um eftirlætisbókina sína? Eða bara símaskrána ef bókakosturinn er rýr. Þessa hugmynd sáum við hér þar sem hönnunin er útlistuð skref fyrir skref. Hönnun er eftir Misa Erder.
mynd í eigu Misa Erder
Ef þú ert óeirðaseggur og vilt komast í kast við lögin er upplagt að prjóna nokkrar handsprengjur og hræða laganna verði. Við mælum með að prjóna þær í svörtu en litríkar handsprengjur eru líka flottar eins og skoða má hjá þessari prjónakonu henni Shoshana sem prjónar þær í massavís.
