„Svandís Svavarsdóttir heilbrigðisráðherra hefur sent bréf til opinberra heilbrigðisstofnana þar sem þeim er falið að fjalla um og útfæra tilteknar aðgerðir sem hafa það markmið að laða fleiri hjúkrunarfræðinga til starfa og styrkja mönnun á sviði hjúkrunar.“
Þetta kemur fram í tilkynningu frá Heilbrigðisráðuneytinu á þriðjudag. Í bréfi ráðherrans er viðtakendum, þar á meðal Landspítalanum, falið að vinna að útfærslu níu aðgerða, sem ákveðnar voru á fundi „ráðherranefndar um samræmingu mála“ fyrir áramót. Fundinn sátu heilbrigðisráðherra, forsætisráðherra, fjármálaráðherra og mennta- og menningarmálaráðherra.
Tilefnið skortur á hjúkrunarfræðingum
Tilefni bréfsins er, að því er fram kemur í tilkynningunni, skortur á hjúkrunarfræðingum innan heilbrigðisþjónustunnar, sem þar er sagt alvarlegt vandamál sem vegi að öryggi hennar, standi í vegi fyrir því að unnt sé að veita nauðsynlega þjónustu og nýta innviði heilbrigðiskerfisins að fullu. Þetta hafi bæði Ríkisendurskoðun og Landlæknisembættið ítrekað bent á, auk þess sem vandanum hafi verið lýst af hálfum heilbrigðisstofnananna sjálfra. Því beri nauðsyn til að fá fleiri hjúkrunarfræðinga til starfa, og „finna leiðir sem stuðla að því að hjúkrunarfræðingar í hlutastörfum sækist eftir hærra starfshlutfalli.“
Þær níu aðgerðir sem heilbrigðisstofnunum er nú gert að útfæra í þágu þessa markmiðs eru misskýrar og hafa, við fyrstu sýn, misaugljós tengsl við hið yfirlýsta markmið. Sumar aðgerðanna virðast fela í sér almennar vangaveltar, á við „að kanna samspil heilsueflingar og starfsumhverfis“, aðrar eru afar tilteknar og afmarkaðar, þar á meðal „hvernig fjölga megi verknámsstöðum á stofnuninni“. Einhvers staðar þar á milli má finna, til dæmis, aðgerðina „innleiða stjórnunarhætti á heilbrigðisstofnuninni sem byggja á umboði til athafna og rými til nýsköpunar og þróunar í starfi“.
Fataskipti verði virkur vinnutími og sérfræðingar geri meira
Stofnunum er gert að útfæra endurskoðun á þáttum vinnufyrirkomulags, „svo sem að tími til fataskipta fyrir og eftir vakt verði virkur vinnutími og metinn til starfshlutfalls/vinnutíma“. Má af þessu ráða að svo hafi ekki verið til þessa.
Þá er stofnunum ætlað að útfæra hvernig má „auka innleiðingu nýjunga og endurnýjun á tækjabúnaði með það að markmiði að veita svo góða þjónustu sem þekking leyfir og skapa góðar vinnuaðstæður“, ásamt því að „endurskoða vinnufyrirkomulag á heilbrigðisstofnuninni til að tryggja betur skilvirka og örugga þjónustu með því að færa sérfræðinga, s.s. sérfræðilækna og aðra sérfræðinga, meira í framlínu þjónustunnar en nú er.“
