Broadway söngleikurinn Groundhog Day sem er meðal annarra framleiddur af íslenska leikhúsframleiðandanum Theater Mogul hefur hlotið sjö tilnefningar til Tony verðlaunanna, virtustu leikhúsverðlauna í Bandaríkjunum. Sýningin hlaut tilnefningar fyrir besta söngleik, besta leikara í aðalhlutverki, besta handrit, bestu frumsömdu tónlistina, besta dansinn, bestu sviðsmyndina og bestu leikstjórnina.

Sýningin, sem byggir á samnefndri kvikmynd frá árinu 1993 með Bill Murray í aðalhlutverki, hefur hlotið mikið lof gagnrýnenda og áhorfenda frá því sýningin var frumsýnd í August Wilson leikhúsinu á Broadway þann 17.Apríl síðastliðinn. Tónlistin í verkinu er eftir Tim Minchin sem er þekktur m.a. fyrir Matilda the Musical sem hefur slegið í gegn bæði á West End í London og á Broadway í New York. Höfundur handrits er Danny Rubin en hann er einnig höfundur kvikmyndarinnar sem söngleikurinn byggir á.

Theater Mogul var stofnað í Reykjavík árið 2000 utan um sýningarréttinn á einleiknum Hellisbúinn sem flestir Íslendingar kannast við. Fyrirtækið hefur síðan vaxið ár frá ári og er í dag stærsta starfandi leikhúsframleiðslufyrirtæki á Íslandi, en auk aðalskrifstofu í Reykjavík er fyrirtækið með skrifstofur í New York, Berlín og Zurich. Fyrirtækið framleiðir leiksýningar um allan heim og hefur framleitt leiksýningar í fleiri löndum en nokkurt annað leikhúsframleiðslufyrirtæki í heimi svo vitað sé til. Þátttakan í framleiðslu Groundhog Day er liður í að styrkja starfssemi félagsins á stærstu leikhúsmörkuðum heims, Broadway í New York og West End í London.

Fréttatilkynning frá Samtökunum ’78:

Í rússneska sjálfsstjórnarlýðveldinu Tsjetsjeníu stendur yfir herferð til útrýmingar á hinsegin karlmönnum. Undanfarnar vikur hafa karlar sem grunaðir eru um samkynhneigð verið kerfisbundið sviptir frelsi, pyntaðir og drepnir. Settar hafa verið á laggirnar fangabúðir á minnst tveimur stöðum þar sem meintir hommar og tvíkynhneigðir karlar eru í haldi. Ástandið er slíkt að það þykir helst minna á aðför þriðja ríkisins gegn hinsegin fólki á tímum helfararinnar. Hinsegin samtökin Russian LGBT Network vinna hörðum höndum að því að koma fólki undan og sögur þolendanna eru hræðilegar.

Breska utanríkisráðuneytið hefur eftir traustum heimildum að leiðtogi Tsjetsjeníu, Ramzan Kadyrov, hafi einsett sér að útrýma hommum og tvíkynhneigðum körlum úr samfélaginu fyrir upphaf Ramadan þann 26. maí næstkomandi. Kadyrov og félagar neita staðfastlega sök, en hómófóbían sem þeir tjá í sömu andrá er ótrúleg. „Ef slíkt fólk væri til í Tsjetsjeníu þyrfti lögreglan ekki að hafa áhyggjur af því, því þeirra eigin ættingjar myndu senda það á stað þaðan sem það ætti ekki afturkvæmt,“ sagði talsmaður Kadyrovs í viðtali.

Þrátt fyrir háværar kröfur alþjóðasamfélagsins undafarinn mánuð hefur ástandið hefur ástandið versnað og mannréttindabrotin halda áfram. Yfirvöld í Tsjetsjeníu hafa sýnt einbeittan brotavilja og hatur í garð hinsegin borgara sinna. Nú verða því aðrir að grípa inn í. Tryggja verður að óháð rannsókn á ástandinu fari fram og sækja þá sem fremja glæpi gegn hinsegin fólki til saka.

Frá miðvikudegi til föstudags munu Samtökin ’78 standa fyrir keðjustöðu við rússneska sendiráðið við Garðastræti kl. 12–17 þar sem fólk stendur stuttar vaktir til skiptis til að minna á alvarleika ástandsins. Á föstudaginn kl. 16 munum við fylkja liði á Suðurgötu 3, setja upp bleika þríhyrninga og ganga að rússneska sendiráðinu til að minna Rússa á skuldbindingar sínar á sviði mannréttindamála.

Ljósmynd af Ramzan Kadyrov efst í grein.

Heimildir:

https://www.hrw.org/news/2017/04/20/joint-letter-united-nations-secretary-general-re-arbitrary-detention-torture-and

http://www.pinknews.co.uk/2017/04/25/four-more-prisons-for-gay-men-have-been-found-in-chechnya/

https://tvrain.ru/teleshow/videooftheday/parlament_o_geyakh-433244/

https://www.hrw.org/news/2017/04/20/chechen-leader-denies-anti-gay-purge-putin-meeting

http://www.ilga-europe.org/chechnya/statements

Íslenska óperan tekur virkan þátt í Evrópskum óperudögum í ár með þrenns konar hætti en fyrst er að nefna að frá  5.-14.maí verður óperan Ragnheiður sýnd á Operaplatform og verður því aðgengileg öllu óperuáhugafólki. Það er mikill heiður að fá að sýna uppfærsluna á þessum vettvangi.

Laugardaginn 6.maí kl.11-13 verður líf og fjör hjá Íslensku óperunni þegar HVER ERTU ÓPERA?- fræðslustarf Íslensku óperunnar býður börnum á aldrinum 9-12 ára að koma í hár og smink og upplifa hvernig það er að fara í gerfi áður en stigið er á svið. Áhugasömum er bent á að skrá sig á opera@opera.is og fá þá nánari upplýsingar um hvar tekið verður á móti hópnum.

Sunnudaginn 14.maí kl.15.00 verður síðan sýnd glæný ópera – Hamlet in Absentia – eftir íslenska tónskáldið Huga Guðmundsson, en sýningin verður sýnd á stórum skjá í Norðurljósasal Hörpu  og strax á eftir verður samtal við tónskáldið Huga og librettistann Jacob Weis, en þeir hlutu báðir tilnefningu til dönsku Reumert verðlaunanna í Danmörku. Óperan var jafnframt kjörin tónverk ársins á Íslensku tónlistarverðlaununum 2016. Miða á viðburðinn er hægt að nálgast hér.

Félag heyrnalausra hefur deilt á Youtube alþjóðlegri táknmálsútgáfu á framlagi Íslands til evrópsku söngvakeppninnar í ár. Þetta er einstaklega fallegur táknmálsflutningur sem er í höndum þeirra Elsu G. Björnsdóttur og Kolbrúnar Völkudóttur. Og þetta er auðvitað lag Svölu Björgvinsdóttur Paper. Leiksstjóri myndbands er Gunnar Snær Jónsson.

KOLBRÚN

ELSA

Samkvæmt minnisblaði sem lekið var til dagblaðsins Australian reyndi Facebook að sannfæra auglýsendur um að samfélagsmiðillinn gæti einangrað markhóp táninga sem fyndu til „óöryggis“, „minnimáttarkenndar“ og hefðu þörf fyrir styrkingu sjálfsmyndar. Minnisblaðið var útbúið af tveimur yfirmönnum Facebook í Ástralíu og var að sögn blaðsins útbúið fyrir einn af stærstu bönkum landsins.

Í frétt Guardian um málið segir að Facebook hafi í fyrstu beðist afsökunar á minnisblaðinu og lofað að rannsaka málið en síðar breytt um stefnu og hafnað fréttinni sem misvísandi. Því var vísað á bug að samfélagsmiðillinn hefði tækni til þess að finna út og einangra markhópa fyrir auglýsendur á grundvelli tilfinningalegs ástands einstaklinga.

Antonio Garcia-Martinez, fyrrverandi yfrmaður hjá Facebook, hafnar þessum síðari skýringum fyrirtækisins í aðsendri grein í Guardian og lýsir því yfir að hann sjálfur hefði unnið að greiningarforritum sem vinna upplýsingar fyrir auglýsendur, byggðar eru á notkunarsögu fólks á Facebook. Garcia-Martinez upplýsir meðal annars að sérstakt söluteymi sé hjá Facebook sem sérhæfi sig í að sannfæra stjórnmálaflokka um að samféalgsmiðillinn geti, gegn greiðslu, ráðið útkomu kosninga.

Gjaldið sem notendur Facebook þurfa að greiða fyrir þjónustuna er samþykki fyrir að veita fyrirtækinu rétt til að selja allar upplýsingar um notandann til auglýsenda sem reyna svo að finna líklegustu kaupendur fyrir vöru og þjónustu á grunni áhugasviðs sem birtist í netnotkun, í bland við persónuupplýsingar sem facebooknotendur skrá inn á síðuna.

Á Íslandi fer sístækkandi hlutdeild auglýsingafjár til erlendra fyrirtækja eins og Google og Facebook sem nota greiningartæki til að sérsníða markhópa fyrir auglýsendur. Athugulir notendur Facebook ættu að sjá dæmi þess að áhugaefni þeirra á netinu, t.d. netleit, endurspeglast gjarnan í þeim auglýsingum sem beinast sérstaklega að þeim, á þeirra eigin facebooksíðu.

símaskjáskot

Angi af þessu er herferð sem sportbarinn Hendrix við Gullinbrú. Fólk sem á afmæli framundan fær persónuleg einkaskilaboð á Facebook þar sem boðinn er salur undir afmælisveislu og bjórkútur á sérstöku tilboðsverði. Tilboðið er kallað afmælisgjöf og hefst á orðunum „Hæhæ og til hamingju með afmælið bráðum!…Hvað er betra en að halda afmælispartý og bjóða öllum vinum þínum án þess að þurfa að taka til eða hafa áhyggjur af því að eitthvað brotni!“

Tekið er fram í einkaskilaboðunum að pósturinn sé eingöngu ætlaður 18 ára og eldri en lesandi sem vakti athygli Kvennablaðsins á þessari beinu markaðsetningu segir að pósturinn hafi verið sendur 17 ára ungmenni.

Mynd efst í grein: Lára Garðarsdóttir

Bretar kynnu að verða krafðir um 100 milljarða evra á næstu árum fyrir útgöngu úr Evrópusambandinu. Þetta er jafnvirði allrar landsframleiðslu Íslands í u.þ.b. fimm ár. Þetta er töluvert hærri tala en upphaflega var áætluð af forvígismönnum ESB í febrúar og endurspeglar harðari afstöðu annara ríkja sambandsins gagnvart Bretum vegna Brexit. Þessi kostnaður er kallaður „skilnaðarreikningurinn“ í breskum fjölmiðlum en David Davis, ráðherra Brexit þvertekur fyrir það í viðtali við BBC að þessi upphæð verði greidd.

Þungur tónn er í samskiptum stjórnenda ESB og Bretlands vegna samningaviðræðna um útgönguna og upplýsti þýska dagblaðið  Frankfurter Allgemeine nýverið að Theresu May, forsætisráðherra Bretlands og Jean-Claude Juncker, forseta framkvæmdastjórnar ESB hefði lent saman í kvöldverðarboði í forsætisráðherrabústaðnum í Lunúnum nýverið. Juncker hefði upplifað veruleikafirringu hjá May og hefði lýst því yfir eftir fundinn að hatrammar samningaviðræður væru framundan.
Breskir ráðamenn hafa hafnað alfarði lýsingu á fundinum og kallað hana slúður frá Brussel. Theresa May lýsti því samt yfir í gær, aðspurð um þennan fund, að hún yrði fjandanum erfiðari við að eiga í samningaviðræðunum.

Kosningarnar sem forætisráðherrann boðaði óvænt til og haldnar verða 8. júní n.k. munu snúast að stórum hluta um Brexit enda yfirlýst að Íhaldsflokkurinn vill fá sterkara umboð til að semja af hörku um útgöngu. Hefur Theresa May lýst því yfir að gjá sé milli þings og þjóðar og meiri fyrirstaða gegn Brexit í þinginu í Westminster en meðal þjóðarinnar.

Nýjustu kannanir benda hins vegar til að vaxandi efasemdir séu meðal Breta um ágæti útgöngu úr ESB. Fyrir viku mældust þeir í fyrsta sinn fleiri sem telja útgöngu verri kost en hinn að vera áfram. 43% breta töldu rétt að yfirgefa ESB en 45% aftur á móti að þetta væri röng ákvörðun.

Gangi útgönguferlið eftir verður Bretland komið formlega út úr ESB árið 2019. Þó að hagkerfi Bretlands sé annað stærsta í ESB á eftir Þýskalandi er landsframleiðsla þess 17% af heildarlandsframleiðslu allra ríkjanna. Bretar eru um 13% af öllum íbúum á innri markaði ESB.

Mynd: May og Juncker – Frankfurter Allgemeine

Frakkar líta svo á að miðjumaðurinn Emmanuel Macron hafi haft betur í slag við hægri öfgaframbjóðann Marine Le Pen í sjónvarpskappræðum í gærkvöld. Valið stendur á milli þeirra í seinni umferð forsetakosninganna í Frakklandi á sunnudag. Lýsingar á kappræðunum eru flestar á þá lund að frambjóðendurnir hafi skipst á móðgunum í þessum tveggja og hálfs tíma löngu kappræðum en Le Pen hafi verið mun ósvífnari í þeim leðjuslag.
France 24 segir að kappræðurnar hafi verið háværar, hraðar, persónulegar, uppfullar af staðreyndavillum og efnisrýrar en Macron hafi sigrað.

Frambjóðendurnir höfðu það helst að markmiði að reyna að ná til þeirra 18% kjósenda sem hafa mælst óákveðnir en mikill munur er á fylgi frambjóðendunum í könnunum og hafa þær sýnt Macron sigra með um 60% atkvæða á bak við sig.
Þó að fátt bendi til annars en að Macron sigri með talsverðum yfirburðum verður litið á fylgishlutfall Le Pen sem mælistiku á markaðinnn fyrir öfgafullar skoðanir populista sem beina spjótum sínum að innflytjendum, Evrópusambandinu og alþjóðahyggju.

Breska slúðurpressan fékk Breta til að vakna um með andfælum í morgun og stara í uppnámi á fánastöng Buckingham hallar, vegna starfsmannafundar sem boðaður var í höllu Elísabetar II Englandsdrottningar. Allt starfslið konungsfjölskyldunnar var boðað til fundar og taldi pressan að stórtíðinda væri að vænta. Þegar sást til manns á þaki Buckingham hallar var talið mögulegt að setja ætti þar flagg í hálfa stöng til merkis um andlát í konungsfjölskyldunni en engin hreyfing varð á fánanum.

Breska útvarpið, BBC hefur greint frá því að ekkert ami að Elísabetu sem hélt upp á 91 árs afmælið í liðnum mánuði og einnig sé Philip prins, hennar ektamaður við góða heilsu. Bæði muni sinna sínum embætiserindum í dag.

Daily Mail fullyrti að fundarboðunin í morgun þar sem starfslið var meðal annars kallað til frá Balmoral kastala drottningar í Skotlandi væri afar óvenjuleg og ályktaði að stórtíðindi væru í vændum. Ekkert hefur verið gefið uppi um efni fundarins sem hefjast á klukkan 10.
Þrátt fyrir að efni fundarins hafi ekki verið gefið hefur starfslið reynt að koma þeim skilaboðum áleiðs að engin ástæða væri til óróa. Götublaðið Sun heldur sig þó við að kalla þetta neyðarfund. Fyrrverandi blaðafulltrúi drottningar hélt þó helst að það ætti að ræða uppfærslur á húsgögnum í höllinni.

Þau tíðindi bárust frá bresku krúnunni í morgun að Filippus drottningarmaður og hertogi af Edinborg myndi senn hætta öllum embættisverkum. Filippus verður 96 ára í næsta mánuði og hefur sinnt ýmsum konunglegum skyldum við hlið Elísabetar II Englandsdrottningar. Síðasta embættisverk Filippusar var að vígja nýja stúku við krikketleikvang í gær.

Þessi mikilvægu tíðindi frá bresku konungsfjölksyldunni komu í kjölfar uppnáms í morgun þegar spurðist að allt starfslið konungsfjölksyldunnar hefði verið boðað til skyndifundar klukkan 10. Þegar sást til manns á vappi í grennd við fánastöng Buckingham hallar var óttast að fáni hennar yrði dreginn í hálfa stöng til merkis um andlát í konungsfjölskyldunni.

Fillipus lætur að störfum að eigin ósk og hefur verið að hugleiða þessi tímamót á ferlinum frá áramótum samkvæmt fréttum breskra fjölmiðla. Nú þegar hafa streymt inn velfarnaðaróskir frá stjórnmálamönnum til drottningarmannsins með þakklæti fyrir störf í opinbera þágu. Fillipus hefur staðið við hlið Elísabetar í 70 ár en hún varð 91 árs í liðnum mánuði.

Mannréttindadómstóll Evrópu (MDE) hefur dæmt að íslenska ríkið hafi brotið gegn tjáningarfrelsisákvæði Mannréttindasáttmála Evrópu í máli sem feðgarnir Reynir Traustason og Jón Trausti Reynisson auk Inga Freys Vilhjálmssonar, höfðuðu gegn ríkinu í kjölfar þess að hafa verið dæmdir fyrir meiðyrði í Hæstarétti. Feðgarnir voru ritstjórar á DV og Ingi Freyr blaðamaður. Þetta er sjötti dómurinn á 10 árum þar sem íslensk dómaframkvæmd fær falleinkunn hjá MDE í málum blaðamanna.

Máli snýst um hugtakanotkun í fréttaskrifum í DV árið 2011 en Hæstaréttardómurinn dæmdi dauð og ómerk skrif um Jón Snorra Snorrason, lektor í viðiskiptafræði og fyrrverandi stjórnarmann í Sigurplasti. Ummælin „Lögreglan rannsakar lektor“ og „Lektor í viðskiptafræði flæktur í lögreglurannsókn“ voru dæmd ómerk á þeirri forsendu að eiginleg „rannsókn“ hefði ekki átt sér stað heldur „skoðun“. Þessari meðferð fyrir íslenskum dómsstólum er alfarið hafnað af MDE.

Mannréttindadómstóllinn telur fráleitt að hægt sé að gera þá kröfu til blaðamanna sem beina skrifum sínum til almennings að endurspegla að fullu þröng mörk lagatæknilegra hugtaka. Vísar dómstóllinn til dómafordæma þar um. Dómstóllinn fellst því á engan hátt á þau rök að blaðamönnunum bæri að gera greinarmun á hugtökunum „rannsókn“ og „skoðun“ í málinu eða fara ítarlegar í saumana á lagatæknilegum smáatriðum. Litið er svo á að umfjöllunin hafi verið nægjanlega nákvæm og byggð á staðreyndum. Því er þeim rökum íslenska ríkisins alfarið hafnað að blaðamennirnir hafi starfað af óheilindum og ekki sinnt skyldum sínum að staðreyna upplýsingar fyrir birtingu.

Dómarar MDE telja hafið yfir vafa að umfjöllunarefnið átti lögmætt erindi við almenning sérstaklega þegar það er skoðað í stærra samhengi í uppgjöri við bankahrunið. Þeim rökum er einnig vísað á bug að einkalífsvernd lektorsins komi til álita og að auðkenning hans sé fyllilega réttmæt í ljósi stöðu hans.

Samkæmt dómnum er skaðabótakröfu feðganna og Inga Freys vísað frá MDE þar sem hún barst of seint. Samkvæmt frétt Vísis ætlar a.m.k Reynir að krefjast bóta af íslenska ríkinu fyrir dómstólum hér á landi.

Lesa má dóm MDE í heild sinni hér.

Yfirlýsing frá formanni VR

Vegna yfirlýsingar fulltrúaráðs verkalýðsfélaganna í Reykjavík vill formaður VR koma eftirfarandi á framfæri.

Það leikur enginn vafi á því að ég bauð mig fram til að halda ræðu á Ingólfstorgi þann 1. maí síðastliðinn. Þar sem undirbúningsnefnd hátíðarhaldanna hefur engan sérstakan tölvupóst, að mér vitandi, kom ég þessari beiðni minni á framfæri á stjórnarfundi VR við Ingibjörgu Ósk Birgisdóttur, sem situr í stjórn VR, er einn skipuleggjenda hátíðarhaldanna og á sæti í 1. maí nefnd fulltrúaráðs verkalýðsfélaganna í Reykjavík.

Ingibjörg er einnig varaforseti ASÍ. Það er ekki hlaupið að því að koma skilaboðum til fulltrúaráðsins þar sem engar sérstakar boðleiðir virðast sjáanlegar, hvorki heimasíða né tölvupóstfang eða símanúmer. Reyndar er litlar sem engar upplýsingar um fulltrúaráðið að finna á heimasíðu ASÍ eða helstu leitarvélum internetsins. Lá því beinast við að tala við einn af skipuleggjendum hátíðarhaldanna. Ingibjörg hefur staðfest að ég hafi beðið um að halda ræðu og því á hennar ábyrgð að koma því áleiðis, ef málið þurfti formlega meðferð. Ingibjörg Ósk sagði mér að ekki væri unnt að hliðra til í dagskránni vegna þess að þetta væri allt fyrirfram ákveðið og búið væri að velja ræðumenn.

Ég tók því þá ákvörðun að tala á öðrum fundi á Austurvelli eftir að hafa gengið með félögum mínum niður að Ingólfstorgi. Það varð enginn klofningur á milli VR og ASÍ með þessari ákvörðun minni og því málið allt stormur í vatnsglasi. Klofningurinn varð þegar ég náði kjöri sem formaður VR enda var framboð mitt vantraustyfirlýsing á forystu ASÍ.

Ég skora á fulltrúaráð verkalýðsfélaganna í Reykjavík að koma sér upp tölvupóstfangi og pósthólfi svo unnt verði að koma formlegum beiðnum til þeirra í náinni framtíð.

Með vinsemd og virðingu
Ragnar Þór Ingólfsson, formaður VR

Úr frétt mbl.is þar sem Ingibjörg staðfestir beiðni mína en segir svo reyndar að engin beiðni hafi borist.

Ingibjörg Ósk Birgisdóttir, varaforseti ASÍ og stjórnarmaður í VR, segir að búið hafi verið að ákveða fyrirfram að kona héldi ræðuna. „Þetta kom til tals á stjórnarfundi. Hann segir að hann geti haldið ræðuna en ég segi að það sé ekki hægt, það sé búið að ákveða að kona haldi hana. Það kom aldrei nein beiðni af hans hálfu,“ segir Ingibjörg í Morgunblaðinu í dag.

Emmanuel Macron hefur kvartað formlega til franskra saksóknara vegna meintra meiðyrða, Marine Le Pen, andsæðings síns í komandi forsetakosningum á sunnudag, vegna þess að hún dylgjaði að því að hann væri með leynilega bankareikninga í skattaskjóli. Hafin er rannsókn á þessum dylgjum og eru þær teknar alvarlega.

Dylgjur Le Pen féllu í sjónvarpskappræðum gærkvöldsins þar sem hún sagði: „Ég vona að við komumst ekki að því síðar að þú eigir aflandsreikninga á Bahamaeyjum“. Seinna viðurkenndi Marine að hún hefði engar sannanir í höndum til að styðja þessar dylgjur. Macron þverneitaði að eiga nokkra síka reikninga og taldi dylgjurnar það alvarlega að hann krafðist rannsóknar á dreifingu falskra frétta og lyga.

Sjonvarpskappræðurnar þóttu óvenju harðvítugar og þótti Marine Le Pen, sem bíður sig fram í nafni hægri öfgaflokksins Front National, í meira lagi óbilgjörn. Skyndikannanir sem gerðar voru eftir kappræðurnar virtust sýna að leðjuslettur Le Pen hefðu haft þveröfug áhrif og töldu flestir að Macron, þó hann teldist fremur litlaus, hefði haft betur í þessum kappræðum. Macron hefur mælst með yfirburðastöðu eða um 60% atkvæða en enn virðast margir óvissir um hvar þeir ætla að setja markið á kjörseðilinn. Allt að 20% hafa í könnunum síðustu daga sagst óákveðin.

Jóhann Hauksson blaðamaður skrifar:

Lögfræðingur Julians Assange hefur farið þess formlega á leit við dómstól í Stokkhólmi að sænsk yfirvöld falli frá kröfu um að Assange, stofnandi Wikileaks, verði fangelsaður í Svíþjóð vegna nauðgunarákæru. Ástæðan er sú að bandarísk yfirvöld hafa með afdráttarlaustum hætti lýst því yfir að ætlunin sé að handsama Assange.

Per E. Samuelsson, lögmaður Assange bendir á í því sambandi að yfirmaður CIA í Bandaríkjunum hafi 13. apríl síðastliðinn lýst því opinberlega að ætlunin sé að handtaka Julian Assange og að hann geti ekki lengur skákað í skjóli laga um tjáningarfrelsi vegna leka mikilvægra bandarískra leynigagna. Þar af leiðandi sé augljóst að bandarísk yfirvöld vilji fá hann framseldan. Nú sé því hægt að sanna að hann þarfnist hælis sem pólitískur flóttamaður.

Lögmaðurinn segir í samtali við sænska blaðið Dagens Nyheter að krafa hans merki ekki að sænsk yfirvöld falli frá ákæru og málarekstri gegn Assange vegna nauðgunarákærunnar. Meginatriðið sé það að með því að falla frá kröfunni um fangelsun hans í Svíþjóð verði honum kleift að yfirgefa sendiráðið Ekvadors í London þar sem hann hefur notið friðhelgi síðustu fjögur árin og ekki getað yfirgefið sendiráðið af ótta við að vera handsamaður af bresku lögreglunni. Aðalatriðið er að með þessu fengi Assange ferðafrelsi innan Svíþjóðar án þess að eiga á hættu að vera handtekinn, þótt svo nauðgunarmálið yrði áfram rekið gegn honum þar í landi.

Eftir heimsókn til Svíþjóðar í ágúst 2010 féll grunur á Assange um að hann hefði brotið kynferðislega gegn tveimur konum og var gefin út handtökuskipun.

Assange leitaði árið 2012 til sendiráðs Ekvadors í London þar sem honum var veitt hæli og hefur hann verið þar allar götur síðan.

Bandarískur heróínsali krafðist sýknu af ákæru á grunni lagaákvæða um frelsi trúarbragða. Áfrýjunardómstóll féllst ekki á lagarök mannsins en búist er við því að málið endi fyrir Hæstarétti Bandaríkjanna. Tvö dómafordæmi eru fyrir því að dreifing harðra fíkniefna hafi verið leyfð á grunni trúfrelsisákvæða.

Hinn ákærði, Timothy Anderson játaði greiðlega að hafa selt heróín þegar hann var handtekinn og kvaðst ekki hafa nein áform um að hætta því. Hann bar því við að salan væri hluti af trúboðsstarfi sínu enda væri hann lærissveinn upphafningar og dulhyggju. Hann hefði meðal annars stofnað trúarlegt góðgerðarfélag til að dreifa heróíni til „sjúkra, týndra, blindra, lamaðra, heyrnarlausra og dauðra í Konungsríki almættisins“. Hann fullyrti því að ákæran gegn sér væri brot á lögum sem sett voru árið 1993 til að koma í veg fyrir að stjórnvöld hömluðu einstaklingum að iðka sína trú.

Anderson hafði nokkur lagarök með sér, því að samkvæmt dómafordæmi Hæstaréttar Bandaríkjanna hefur verið heimilað að nota annars ólögleg fíkniefni í trúariðkunum. Með vísan til fyrrgreindra laga var til dæmis litlum brasilískum söfnuði í New Mexico í Bandaríkjunum heimilað að flytja inn bruggdrykkinn ayahuasca, sem inniheldur ofskynjunarefnið DMT. Meðlimir safnaðarins notuðu hann við trúariðkanir en það hafa innfæddir á Amason svæðinu í Suður-Ameríku lengi gert. Indíánar í Bandaríkjunum hafa einnig haft heimild, á sambærilegum trúarforsendum, til að nota peyote, kaktusplöntu sem inniheldur meskalín. Bæði peyote og ayahuasca eru skilgreind í flokki hættulegustu fíkniefna samkvæmt Bandarískum lögum og þar er heróín einnig flokkað.

Röksemdir Andersson fyrir dómstólum voru meðal annars þau að hann væri að útdeila heróíni til fólks til að fá það smám saman ofan af fíkniefnanotkun. Hann kvaðst ekki aðhyllast nein skipulögð stofnanatrúarbrögð en trúarvitund hans hefði það að markmiði að verða eitt með almættinu. Anderson flutti mál sitt fyrir daufum eyrum dómara í undirrétti sem dæmdi hann í 27 ára fangelsi.
Áfrýjunarréttur sem úrskurðaði í síðustu viku, skoðaði mál Anderssons gaumgæfilega með vísan til fordæmanna með peyote og ayahuasca en taldi þau ekki fullægjandi. Eitt væri að skoða rétt hvers og eins til fíkniefnanotkunar á trúarlegum forsendum en engar sönnur hefðu verið færðar á það að viðtakendur heróínsins frá Anderson hefðu, á trúarlegum grunni, notað það til andlegrar nálgunar við almættið. Dómarinn taldi sölu og drefingu fíkniefna engan vegin lögverndaða trúariðkun. Anderson tapaði því áfrýjuninni en samkvæmt umfjöllun Washington Post um málið eru allar líkur á því að hann reyni að fá þeim dómi hnekkt fyrir Hæstarétti Bandaríkjanna.

Verkamannaflokkur Jeremy Corbyns tapaði fjölda sæta í kosningum í gær til bæjarstjórna í Bretlandi en það þykir vont veganesti fyrir flokkin nú þegar aðeins rúmur mánuður er til þingkosninga í landinu. Theresa May, forsætisráðherra boðaði óvænt til þingkosninga í liðnum mánuði en Íhaldsflokkurinn, sem hún leiðir,  stendur sterkt að vígi á landsvísu. Stuðningur við Íhaldsflokkinn endurspeglaðist í kosningum gærdagsins, samkvæmt niðurstöðunum þar sem talningu atkvæða er lokið.

Í heild er kosið í nærri 5000 sæti í nærri 90 bæjarstjórnum í Skotlandi, Wales og Englandi. Klukkan átta að staðartíma lágu niðurstöður fyrir í 23 sveitarfélögum, samkvæmt BBC og höfðu íhaldsmenn meirihluta í 10 þeirra en Verkamannaflokkurinn í fimm. Alls hafði íhaldið bætt við sig 150 bæjarstjórnarsætum en flokkur Corbyns tapað 119. Frjálslyndir demókratar báru einnig skarðan hlut frá borði og höfðu tapað 29 sætum. Þjóðernissinnarnir og Evrópuandstæðingarnir í UKIP höfðu enn ekki náð að tryggja sér sæti neins staðar og höfðu misst 41 sæti.

BBC vitnar í stjórnmálafræðiprófessorinn John Curtice sem segir að samkvæmt þeim niðurstöðum sem liggi fyrir væri Íhaldsflokkurinn að fá bestu kosningaútkomu allavega síðan 2008 og væri fylgissveiflan frá Verkamannaflokknum til íhaldsins a.m.k. sjö prósent frá koningum árið 2013.

Sigur í sveitarstjórnarkosningunum styrkir stöðu Thereseu May í þingkosningunum 8. júní. Þegar boðað var til þingkosninganna var fylgi við íhaldsmenn í hæstu hæðum á meðan Verkamannaflokkurinn var í verstu stöðu sem hann hafði verið í árum saman. Staðan Verkamannaflokksins hefur heldur lagast á síðsta hálfa mánuði en mikið þarf að breytast til að flokkurinn gjaldi ekki afhroð í þingkosningunum.

mynd: BBC – íhaldsmenn fagna

Skólastjóri Fjölbrautaskólans í Ármúla, Steinn Jóhannsson, hefur sent nemendum og forráðamönnum bréf vegna frétta um sameiningu Fjölbrautaskólans og FÁ. Hann segir:

„Kæri nemandi.

Það hefur ekki farið fram hjá neinum að síðustu daga hefur átt sér stað umræða um mögulega sameiningu FÁ og Tækniskólans. Ég vil ítreka að engin ákvörðun hefur verið tekin af ráðherra menntamála um hvort skólarnir verði sameinaðir. Ég vona að niðurstaða liggi fyrir sem fyrst til að eyða allri óvissu nemenda og starfsfólks.

Komi til sameiningar mun ég sem skólameistari leggja áherslu á að tryggja réttindi nemenda og starfsfólks í nýjum sameinuðum skóla. Sameining myndi ekki hafa nein áhrif á námsframboð og rétt nemenda til að ljúka því námi sem þeir hafa innritast á. Nemendur þurfa enn fremur ekki að hafa áhyggjur af hærri innritunargjöldum þar sem þau myndu haldast óbreytt.

Um leið og ákvörðun liggur fyrir mun ég láta ykkur vita af niðurstöðunni í tölvupósti.

Ég óska ykkur góðs gengis í lokaprófunum sem eru framundan og vona að þið verðið dugleg að nýta aðstöðuna sem ykkur er búin í skólanum.“

Kær kveðja / Best regards,

Steinn Jóhannsson

Skólameistari / Head Master

Formaður Skólameistarafélags Íslands

Búin hefur verið til undirskriftarlisti þar sem skorað er á menntamálaráðherra Kristján Þór Júlíusson. Í áskorun segir:

„Fjölbrautaskólinn við Ármúla er frábær skóli sem var stofnaður haustið 1981. Síðan þá hefur hann dafnað og allir eru ánægðir með hann eins og hann er í dag. Fyrirhuguð sameining FÁ og Tækniskólans er breyting sem er óþörf og við viljum ekki. Kennarar skólans ætla að lýsa yfir óánægju sinni og mótmælum, nemendur skólans þurfa nú að gera slíkt hið sama. Stöndum saman og látum rödd okkar heyrast! Skrifið undir, deilið og þá getum við stöðvað þetta.“

Skrifið undir áskorun hér!

Reykjavíkurborg hefur ákveðið að veita landflótta rithöfundi frá Bangladesh skjólborg þar sem honum er tryggður öruggur dvalarstaður og efnahagslegt öryggi. Þetta er þriðji rithöfundurinn sem Reykjavíkurborg tekur á móti.

Reykjavíkurborg gerðist aðili að ICORN (International Cities of Refuge Network) árið 2010. ICORN eru samtök borga víðs vegar um heim sem gerst hafa skjólborgir rithöfunda sem ekki er gert kleift að búa í heimalandi sínu. Borgirnar leggja með því móti sitt að mörkum til þess að stuðla að tjáningarfrelsi einstaklingsins .

Rithöfundurinn heitir Ana Naila Zahin, bloggari og aktivisti, fædd árið 1995 í Bangladesh. Ana hefur verið virk í skrifum á bloggsíðum og í fjölmiðlum í heimalandi sínu. Árið 2013 tók hún virkan þátt í Shahbag mótmælunum í Bangladesh ásamt þúsundum annarra en mótmælin snéru að ákvörðun stjórnvalda um að dæma til dauða aðila sem tekið hafði þátt í vopnaðri baráttu gegn stjórnvöldum árið 1971(Bangladesh Liberation War).

Í skrifum sínum fjallar Ana m.a. um kynjajafnrétti, feminisma, trúleysi og stjórnmál. Ana var neydd til að hætta háskólanámi og varð að fara í felur um mitt ár 2016 þar sem öryggi hennar var ógnað. Frá árinu 2016 hafa fimm félagar hennar verið drepnir og stjórnvöld hafa ekki getað veitt Önu nægilega vernd.

Anna hyggur á háskólanám í haust.

Kristján Frímann skrifar um hljómplötur
Myndir KFK

Á gullöld rokksins um 1970 var íslenska rokksenan mjög enskuskotin og þeir tónlistarmenn sem vildu ná einhverjum árangri fluttu sína íslensku tónlist á ensku. Ástæður þess að tónlistarmenn völdu enskuna voru nokkrar, svo sem að tónlist unga fólksins á öldum ljósvakans var einhliða ensk og amerísk og að auki trónaði kanaútvarpið frá herstöðinni yfir Reykjanesinu og Reykjavík.

Hljómsveitir áttu líka sitt viðurværi mikið undir spilamennsku á vellinum og þar var herinn gjöfull veitandi. Á dansstöðum og sveitaböllum þýddi ekkert að bjóða uppá íslenska tónlist, því enginn vildi heyra það sem hann ekki þekkti, svo menn spiluðu lögin sem voru vinsæl í útvarpinu. Þá var útgáfustarfsemi einnig á brauðfótum þar sem hljóðversaðstaða var afar fátækleg og hvorki Ríkisútvarpið né SG hljómplötur tóku upp eða gáfu út íslensk lög á ensku. Fálkinn var þá eina fyrirtækið sem tók slíkt í mál en bara ef menn voru orðnir þekktir og seldu.

Jónas leiðir dóttur sína Margréti yfir þýska götu

Jónas R.

Jónas R. Jónsson söngvari og flautuleikari er fæddur í Reykjavík 17. nóvember 1948. Fyrsta hljómsveit Jónasar var fimm manna bandið „5 pence“ sem var stofnuð árið 1965. Sú sveit lék aðallega á skólaböllum og flutti eingöngu „cover“ lög enskra hljómsveita. Þar var hljómsveitin Kinks efst á blaði, enda var Kinks heitasta bandið eftir átta tónleika þeirra í Austurbæjarbíó þá um haustið. Eftir „5 pence“ hófst samstarf við hið eitraða band „Toxic“ sem hélt uppi stemningunni á skólaböllum og skemmtistöðum með „cover“ lögum árin 1966-67.

Árið 1968 varð svo kúvending þegar Jónas stofnaði hljómsveitina „Flowers“ ásamt Arnari Sigurbjörnssyni gítarleikara, Karli Sighvatssyni á hljómborð, Sigurjóni Sighvatssyni á bassa og Rafni Haraldssyni á trommur. Tveim mánuðum eftir stofnun var trommaranum skipt út fyrir Gunnar Jökull Hákonarson sem settist við trommurnar. Þannig skipuð hélt hljómsveitin til London á vegum Tónaútgáfunnar og tók upp fjögurra laga plötu með íslenskum lögum.

Flowers platan á Wikipedia – https://is.wikipedia.org/wiki/T_104

Flowers lifði aðeins árið og í júní 1969 stofnaði Jónas hljómsveitina Náttúru ásamt Björgvini Gíslasyni á gítar, Sigurði Árnasyni á bassa og Rafni Haraldssyni á trommur. Aftur var róið á ensku miðin og flutt „cover“ lög á ensku.

Árið eftir hætti Jónas í tónlistarbransanum til að gerast verslunarstjóri í nýju tískuhúsi karlmanna sem náttúrlega var nefnt Adam og var til húsa í kjallaran verslunarsamstæðunnar í Vesturveri. Þar birtist Einar Vilberg einn daginn með gítarinn og flutti Jónasi nokkur lög.

Í sól og sumaryl

Einar Vilberg

Einar Vilberg Hjartarson er fæddur í Reykjavík 26. apríl 1950. Hann ólst upp í Þingholtunum þar sem hver dagur var ævintýri. Lífið leikur og leikurinn starf. Þessi gleði æskunnar tendraði neista sköpunar í brjósti Einars og sá neisti varð að báli þegar amma hans gaf honum gítar á 12 ára afmælinu.

Tónlistin tók völdin og fjórtán ára samdi hann eigin lög. Fyrsta alvöru hljómsveitin sem Einar spilaði í hét „Beatnicks“ og lék hún mest „cover“ lög á skólaböllum. Svo var það hljómsveitin „RAIN“ sem Einar stofnaði 1967-1968 með félögum sínum, sem voru; Þórarinn Örn Stefánsson á hljómborð og gítar, Sveinbjörn Dýrmundsson á bassa og Gunnar Kárason á trommur. Meðan hljómsveitin lifði var hún vinsæl á dansstöðum enda spiluðu þeir alltaf nýjustu lögin.

Stóra skrefið kom svo þegar LAUFÚTGÁFAN (Ólafur Laufdal) sendi Einar í ferð til London með Pétri Kristjánssyni söngvara og Gunnari Jökli Hákonarsyni trommuleikara árið 1969 að taka upp plötu. Þeir bókuðu tíma í „Regent Studio“ sem var 4 rása og tóku upp á átta tímum fjögur lög eftir Einar. Tvö laganna komu út á plötu árið eftir; „Vitskert veröld“ og „Blómið sem dó“ sem Pétur söng en hin tvö biðu þess að koma út löngu seinna á safndiski Péturs.
Á þessum tíma samdi Einar einnig lög fyrir aðra listamenn svo sem Janis Carol og Jónas R. Jónsson.

Jónas og Einar

Jónas og Einar

Á þessu ári eru liðin 45 ár frá útkomu stóru hæggengu LP (Long Playing) plötunnar „Gypsy Queen“ sem Fálkinn gaf út 1972. Í tilefni þess hafði ég samband við þá félaga, hvort þeir væru ekki til í smá spjall um plötuna. Við hittumst svo bjartan vormorgun hjá Jónasi á fiðluverkstæði hans við Óðinsgötu.

Einar: „Það merkilega við þetta allt saman er, að ég og vinur minn Jónas R. höfðum ekki setið saman í viðtali síðan 1972, fyrr en nú. En platan var hljóðrituð að megninu til á tveggja rása stúdíó Péturs Steingrímssonar í Tannlæknasalnum í Síðumúla, eftirvinnsla og smá viðbætur áttu sér síðan stað í átta rása stúdíóí EMI í Stokkhólmi.“

Jónas hellir uppá kaffi og við göntumst aðeins með minnið og ellina en hvorki Jónas né Einar eldast þó tíminn líði og Einar er eins og uppflettirit, man allt, meðan við Jónas drögum seiminn.

Einar: „Þetta var á því tímaskeiði í upptökutækni að það mátti ekkert klikka í spilamensku og ekkert hægt að laga í tölvum eftir á (sem voru reyndar ekki aðgengilegar almenningi á þessum tíma) allt handspilað og ekki margir möguleikar í boði. Til dæmis í laginu „Lucky day“ spila ég á gítar x3 og syng aðalrödd og bakrödd, Jónas var á tökkunum og ég held að þetta sé fyrsta platan sem Jónas tók upp og pródúseraði. Timmy McDonald er á trommum, Siggi Árna spilar á bassa ásamt Tomma Tomm sem var bara polli þá.“

Kaffivélin drynur, kaffið er eins og maður sagði í gamla daga; „rótsterkur andskoti“ en hressandi fyrir gráu sellurnar. Túristarnir eru byrjaðir að kíkja á gluggann er ég spyr Jónas um kúvendingu hans úr tónlistinni yfir í tískubransann þegar hann fór að vinna í tískuhúsinu Adam.

Jónas: „Ja, ég hef alltaf haft áhuga á tísku og viljað tolla í tískunni og til marks um það, þá lét ég klæðskerasauma á mig jakkaföt samkvæmt nýustu tískunni í London fyrir fermingarpeningana mína. Starfið sem mér bauðst í Adam var örugg vinna og öruggar tekjur sem hljómsveitabransinn var ekki.“

Einar: „Á þessum tíma lifði ég ekta hippalífi og bjó í kommúnu á Laugaveginum sem hét „Sara“. Það var ljúft líf, ég samdi og spilaði í þessum „free spirit“ anda en einhvern vegin gekk það erfiðlega að koma því til skila að ég væri með stöff sem væri hæft til útgáfu og á röltinu datt mér í hug að kíkja á Jónas í Vesturveri, því mér fannst Jónas töff náungi, góður söngvari og hann var svona gæi sem var með allt á hreinu. Ég spilaði nokkur lög fyrir hann og við bara smullum.“

Jónas: „Eins og flís við rass og við byrjuðum strax að æfa fyrir plötu. Ég kom með flautuna inn í þetta sem breytti ögn áferðinni. Við útsettum og pródúseruðum saman og trommarann fann ég í London, hann var giftur gamalli vinkonu minni, henni Halldóru, sem er fyrsti íslenski kventrommarinn. Timmy var ákkúrat rétti maðurinn í djobbið því hann spilaði öðruvísi en flestir trommarar hér á landi gerðu, (nema kannski Jökullinn) því hann spilaði lagið. Hann hafði spilað með Mamelade og Richard Thompson, Þetta sem sagt small allt saman.“

Platan vakti mikla athygli og þótti framsækin, umslagið (sem var hugmynd Jónasar) er tvöfalt (Gatefold) opnanlegt með textum og mynd inn í, sem var nýlunda á þeim tíma. Platan var líka gefin út á kassettu og mun hún vera fyrsta íslenska hljómplatan sem kemur út á snældu.

Að framanverðu. Mynd: KFK

A hlið
1. On a riverboat *
2. Sweet lady *
3. I just want your love
4. A song for Christine **
5. Gypsy queen *
6. Look at all those people**

B hlið
1. Freedom for our lovin’*
2. See the sun
3. Music-forest
4. How can we hnow God is real*
5. Lucky day
6. Gypsy queen**

Mynd KFK: Baksvipur

Listafólk

Tónlistarmenn:
– Einar Vilberg / Söngur, Acoustic guitar, Slide guitar, Bottleneck guitar, Electric guitar
– Jónas R. Jónsson / Söngur, Flute, Accordion, Percussion
– Sigurður Árnason / Bass
– Tómas Tómasson / Bass * (tracks: A5, B3, B4, B5)
– Timmy Donald / Drums, Congas

Barnaraddir í laginu „Music Forest“ – Ingibjörg H. Hjartardóttir, Birna Benediktsdóttir, Berglind Sigurðardóttir og Hrafnhildur Sigurðardóttir

Lög og textar: Einar Vilberg
all songs published by STEF, lceland

Stjórn upptöku: Jónas R. Jónsson
Special thanks to BJÖRN NORIAN. EMI

Upptökustúdíó: all tracks recorded on 2-track at STUDIO PÉTUR STEINGRlMSSON exept * vocals recorded at EMI STUDIOS, STOCKHOLM SWEDEN ** recorded at EMI STUDIOS, STOCKHOLM SWEDEN

Umslag: Egill Eðvarðsson
Ljósmyndir: Sigurgeir Sigurjónsson

EINAR VILBERG appears by kind permsision of SARAH COPYRIGHT 1972, EINAR VILBERG, SARAH MUSIC

Upplag: 1500 plötur og 500 snældur.

Rölt með börnin inn í framtíðina

Andi ástar og frelsis

Platan „Gypsy Queen“ er hefðbundin 12 laga plata eins og plötur voru á þessum tíma og andi hippatímans svífur hér yfir vötnum í mjúkum textum og svífandi tónum. Ást og friður voru kjörorð og vinarþelið snerti alla. Þegar ég lít til baka var þessi tími á vissan hátt saklaus, maður gat farið hvert sem var, hvenær sem var, án þess að eiga á hættu að lenda í útistöðum við nokkun mann. Þá var það heiðarleiki og vinsemd sem stjórnaði lífinu og tónlistin bar þess merki.

ON A RIVER BOAT

On a river boat to an Island,
To an Island I want to be free.
l’ve got to get away from here,
Away from you and me.

On a river boat to an Island
To an Island I want to be free.
A fortune-telling lady
Pointed it out to me.
Island calls me — come on home.
Island wants me, wants me alone.

:/: On a river boat to an Island :/:

GYPSY QUEEN

Why did you do this to me?
Gypsy queen, l’m sad.
I’ve been crying a lot of tears.
I want my gypsy queen back.

Searchin in blindness
For my gypsy queen,
But I just can’t find her.
She’s been hiding away from me.

HOW CAN WE KNOW GOD IS REAL?

How can we know God is real?
If he’s just a thing that we feel,
If he’s not a thing we can see,
God is in you and in me.

That’s why the devil is real,
Though he’s just a thing that we feel,
He’s not a thing we can see,
But the devil’s in you and in me.

But you can control this power
If you think the right things
And don’t let the devil take over.
Remember, God is in you and in me.

Félagar í Japan

Japönsk útgáfa

Í kjölfar „Gypsy Queen“ útgáfunnar var þeim félögum boðið að taka þátt í „Yamaha Song Festival“ tónlistarhátíðinni í Tokyo í Japan og gefa út tveggja laga plötu þar í landi. Það var Jörmundur Ingi Hansen alsherjargoði og umboðsmaður Einars sem stóð að þeim gjörningi og sá um að halda í alla spotta. Platan er tveggja laga 45 snúninga og inniheldur lögin; „When I Look At All Those Things“ og „Song Of Love“ sem Jónas flytur á japönsku.

Tengill á viðtal við þá félaga um Japansförina 1972. – https://youtu.be/Rg5m3EMbYVs

When I Look at all Those Things

Walking the road in the morning
the sun is coming up,
could it be that no one feels
the tender love I´ve got
little rain falls and the rainbow
is high up in the sky
when I look at all those things
they make me want to cry.

Walking the road in the evening
the sun is going down,
I’m on my way back home again
another day is done,
somwere inside me I´m grateful
that I´m alive and able
that I can look at all those things
although they make me cry…

Fyrsta íslenska kassettan

Tenglar:
Platan – Lög:
Look At All Those People – https://www.youtube.com/watch?v=Rw5B5cVv4XM
Jonas og Einar – Gypsy Queen 1972 (FULL ALBUM) – https://www.youtube.com/watch?v=31ixR0-9J58
Lögin hér að ofan eru sjóræningjaútgáfur sem má finna víða á netinu.

World Popular Song Festival in Tokyo ’72 – http://rateyourmusic.com/release/comp/various_artists_f2/world_popular_song_festival_in_tokyo_72/

Trommarinn Timmy Donald á Discogs – https://www.discogs.com/artist/340553-Timi-Donald
Timmy Donald og hljímsveitin Blue – https://en.wikipedia.org/wiki/Blue_(Scottish_band)
When I Look at All Those Things – https://www.youtube.com/watch?v=voAg8HoVVeg

Live recording at RÚV’s Rokkveita ríkisins 1977. Einar Vilberg vocal+guitar, Ásgeir Óskarsson drums, Björgvin Gíslason guitar, Jóhann Þórisson bass guitar, Nikulás Róbertsson keyboards, Pétur Hjaltested keyboards. Video/Sound: RÚV 1977.
I love you for a reason – https://www.youtube.com/watch?v=JBykfUooEYE
For you, by Einar Vilberg – https://www.youtube.com/watch?v=fIRWh-HVKd0
Maybe it’s your faith? by Einar Vilberg – https://www.youtube.com/watch?v=KsKW7PrA4gc
All right mama, by Einar Vilberg – https://www.youtube.com/watch?v=j_mxKbBBp8c&feature=share

Francis páfi er afar ósáttur við ónefnið á þeirri risasprengju sem Bandaríkjaher varpaði á Afganistan í liðnum mánuði en hún hefur verið nefnd „móðir allra sprengja“ (Mother of All Bombs). Tilurð þessarar nafngiftar er ensk skammstöfun yfir risasprengjuna MOAB en það stendur fyrir „Massive Ordnance Air Blast bomb“.

Að kenna sprengjuna við móður fer fyrir brjóst páfa og gerði hann þetta að umtalsefni í ræðu samkvæmt frétt Independent. „Ég móðgaðist þegar ég heyrði nafnið“, sagði Páfi, hneykslaður. „Móðir skapar líf en þetta fyrirbæri færir dauða og við köllum þetta tól móður. Hvað er í gangi?“

Fréttamenn hafa enn ekki fengið að fara inn á svæðið í austurhluta Afganistans þar sem sprengjan var sprengd en hún er um 8,5 tonn að þyngd og hefur eyðingarmátt og sprengikraft sem jafngildir 11 tonnum af sprengiefninu TNT. Henni var varpað á hella í fjallahérðum Afganistan þar sem nokkur hundruð vígbúnir liðsmenn ISIS hafa setu. Fullyrt er að tugir, jafnvel hátt í hundrað, liðsmenn þeirra hafi fallið í þessari einu sprengingu en þær tölur fást ekki staðfestar. Fréttir hafa borist af því að enn sé barist á svæðinu.

Þetta var í fyrsta sinn sem Bandaríkjaher beitir þessari öflugustu sprengju í vopnabúri sínu þegar frá eru talin kjarnavopn. Talið er að herinn hafi látið gera um 20 slíkar risasprengjur og kostnaðurinn við hverja og eina er svimandi eða jafnvirði rúmlega eins og hálfs milljarðs króna. Blaðið Guardian telur að varfærislegt mat sýni að sprengjan hafi grandað 36 liðsmönnum ISIS og telur það einkennilegt herfræðilega að kosta svo miklu til, fyrir jafnlítinn árangur.

Jóhann Hauksson skrifar:

Hér verður lagt út af tveimur ágætum íslenskum orðum: fyrirmynd og leiðtogi.
Sá sem er fyrirmynd eða til fyrirmyndar sýnir gott fordæmi, eitthvað sem hann eða hún segir eða gerir er til eftirbreytni. Hagleikssmiður getur verið fyrirmynd og sá eða sú sem breytir rétt er það einnig.

Leiðtogi er forkólfur, forystumaður. Hans verkefni getur verið að „toga fólk á rétta leið“. En það er ekki alltaf þannig að hann geri það. Til þess þarf hann að vera „góð fyrirmynd“.
Sé hann það er hann fyrirmyndar leiðtogi.

Er Bjarni Benediktsson fyrirmyndar leiðtogi þjóðarinnar í embætti forsætisráðherra og áður fjármálaráðherra?

Teflonmaður

Bjarni dustar af sér kuskið eina ferðina enn, eins og teflonmaður sem ekkert loðir við, um leið og hann segir (þýtt yfir á íslenskt mannamál): Mér finnst allt í lagi að flokkssystir mín og vinkona, Ásdís Halla Bragadóttir, reikni sér og sínum arð út úr Klíníkinni þótt tekjur hennar séu að verulegum leyti fé úr vösum skattgreiðenda.

Eftir áralangar tilraunir með mismunandi rekstrarform í velferðar-, heilbrigðis- og menntakerfinu að hætti hægrimanna íhuga nú Svíar hvort ekki sé rétt að banna með lögum arðgreiðslur úr einkafyrirtækjum rekin eru með skattfé borgaranna. Það þarf ekkert að koma í veg fyrir að reynd séu ólík rekstrarform.

Áður en Bjarni úttalar sig svona á þingi hefur hann og flokkur hans svelt heilbrigðiskerfið fjárhagslega því ekki má leggja skatta á ríkt fólk, kvótagreifa og annað eignafólk. Og lýðskrumið felst ævinlega í að lofa öllum skattalækkunum.

Niðurstaðan er áþreifanleg. Kunningi minn bíður við skert lífsgæði í heilt ár eftir nýju hné og fær þá loks inni á sjúkrahúsi. Annar kunningi minn í svpuðum aðstæðum, með nokkur fjárráð, þoldi ekki slíka bið og hafði samband við einkaklíník sem skipti um annað hnéð í hvelli. Fyrir það greiddi hann eina milljón krónur.

Tvær stéttir. Ríkir og fátækir. Opinber heilbrigðisþjónusta á brauðfótum ýkir þennan stéttarmun og tyllir lævíslega undir röksemdir hægrimanna um að stoppa þurfi upp í götin með einkarekstri í heilbrigðisþjónustu.

Til fyrirmyndar? Til eftirbreytni?

Jafnréttið

Bjarni segir eitthvað á þá leið, eftir að hafa sniðgengið jafnréttislög við ráðningu í embætti í ráðuneyti sínu: Mér finnst að sannfæring mín (geðþótti) eigi að ráða en ekki einhver tölvuforrit sem ákveða hvað sé jafnrétti kynja.

Rifjað hefur verið upp að hann fór mikinn í þinginu á sínum tíma gegn Jóhönnu Sigurðardóttur, þáverandi forsætisráðherra, sem kærunefnd um jafnréttismál hafði gefið að sök að hafa brotið jafnréttislög er hún réði karl, sem hæfastur var talinn, í embætti skrifstofustjóra í forsætisráðuneytinu.

Bjarni vildi að Jóhanna væri fyrirmyndar leiðtogi og ætti ekki að brjóta jafnréttislög. Vandlæting hans og fordæming var mikil. Jóhanna átti að segja af sér.

Umboðsmaður Alþingis komst reyndar að annarri niðurstöðu og taldi kærunefnd jafnréttismála hafa farið út fyrir verksvið sitt með því að styðjast við eigin hæfnisviðmið þegar hún komst að þeirri niðurstöðu að Jóhanna hefði brotið jafnréttislög.

Ætlar Bjarni að segja af sér?

Fiktað með skýrslur í þágu Flokksins

Bjarna láðist af einhverjum einkennilegum ástæðum að birta fyrir þingkosningar síðastliðið haust tvær skýrslur sem augljóslega gátu verið flokki hans mótdrægar í kosningabaráttunni. Önnur þeirra fjallaði um eignir Íslendinga í aflandsfélögum (man einhver eftir félagi sem hét Falson?).

Skýrslan var tilbúin fyrir þingkosningarnar en var birt 6. janúar síðastliðinn.
Hin skýrslan fjallaði um skuldaleiðréttinguna og var einnig tilbúin fyrir þingkosningarnar. Hún sýndi að mokað var 80 milljörðum króna í fjölskyldur sem lítið þurftu á slíkri aðstoð að halda. Skýrsla þessi var birt almenningi 18. janúar síðastliðinn.

Mikill er sá leiðtogi sem tekst að verja hagsmuni flokks síns fram yfir kosningar með svo snilldarlegum hætti.

Auðvelt er að sjá að Bjarni misbeitti dagskrárvaldi sínu sem ráðherra í þágu flokkshagsmuna. Hann var vakandi fyrir því valdi sem felst í því að taka enga ákvörðun, í þessu tilviki um birtingu skýrslnanna. Hann kaus að bæla umræðuna, halda málunum utan við þjóðmálaumræðuna með því að láta málin danka í skúffum sínum. Sá sem valdið hefur ræður stundum því hvað er á dagskrá stjórnmálanna og þjóðmálaumræðunnar. Bjarni hafði í þessu tilviki valdið til að „aðhafast ekki neitt“, birta ekki skýrslurnar og verja þannig flokkshagsmunina.

Er þetta til fyrirmyndar?

… og öll hin málin

Kári Stefánsson hjá DeCode spurði Bjarna áleitinna spurninga í blaðagrein á dögunum. Í fyrsta lagi spurði hann Bjarna hvort forsætisráðherrann ætti ekki að fordæma S-hópinn sem uppvís hafði orðið að sviksamlegu athæfi við kaupin á Búnaðarbankanum 2003. Eða gat Bjarni ekki tjáð sig um málið vegna þess að fjölskylda hans var sjálf á kafi í „bankaskítnum“ eins og Kári orðaði það.
Og gat Bjarni í öðru lagi heldur ekki tjáð sig afdráttarlaust gegn kaupum Goldman Sachs og vogunarsjóða á Arionabanka af sömu ástæðum? Var fjölskylda hans að undirbúa kaup á Íslandsbanka í gegn um Borgun sem Landsbankinn gaf Einari Sveinssyni, föðurbróður Bjarna, og fleirum?
Já Borgun. Var það þannig, spurði Kári í þriðja lagi, að þá fyrst komst skriður á gjafagjörning Landsbankans, þegar Einar Sveinsson, föðurbróðir Bjarna, stóð á gólfinu og talaði fyrir hönd kaupenda?

Loks spurði Kári um rútufyrirtæki í eigu forsætisráðherrafjölskyldunnar sem hann taldi njóta skattaívilnana og forréttinda, meðal annars vegna ákvarðana fjölskylduvinarins Ingimundar Sigurpálssonar, stjórnarformanns ISAVIA.

Þetta voru sem sagt spurningar Kára. Bjarna finnst þær ekki svaraverðar.

Taka tvö?

Afsögn margra ráðherra á Norðurlöndum á undanförnum árum og áratugum hefur orðið tilefni til fræðilegra athugana. Ein slík, sem gerð var í Svíþjóð, sýnir að almenningur og fjölmiðlar þola illa sérhagsmuna- og forréttindagæslu stjórnmálamanna Stjórnmálamenn verði að vera til „fyrirmyndar“ í orðum og æði og mega ekki leyfa sjálfum sér eitthvað sem þeir banna kjósendum. Því skyldu almennir skattborgarar fara að lögum ef ráðherrar gera það ekki?

Nú er verið að safna í nýja brennu, nýtt hrun, í boði Bjarna og Flokksins. Eins og ekkert hafi breyst. Eins og engir lærdómar hafi verið dregnir.

Óheft gróðahyggja og frændhygli ræður ferðinni líkt og fyrir hrun. Boðskapurinn er að „græða á daginn og grilla á kvöldin“. Munurinn er þó sá að nú hafa bæst við kerfisbundin skemmdarverk á velferðarkerfinu og ungt fólk í húsnæðisleit er í öngstræti.

Leiðtoginn Bjarni Benediktsson er sem sagt ekki til fyrirmyndar. Ekki frekar en Sigmundur Davíð Gunnlaugsson sem hrökklaðist frá völdum með skömm.