Fréttatilkynning frá Reykjavíkurborg:
Reykjavíkurborg hefur gert nýjan samning við Útlendingastofnun um þjónustu við hælisleitendur. Samkvæmt samningnum mun Reykjavíkurborg þjónusta allt að 90 hælisleitendur. Í fyrsta skipti mun Reykjavíkurborg þjónusta fjölskyldur úr hópi hælisleitenda en hingað til hefur borgin aðeins þjónustað einstaklinga.
Dagur B. Eggertsson borgarstjóri, Ólöf Nordal innanríkisráðherra og Kristín Völundardóttir, framkvæmdastjóri Útlendingastofnunar undirrituðu samninginn í Ráðhúsi Reykjavíkur í morgun, miðvikudag 14. október.
Reykjavíkurborg tekur að sér að veita allt að 90 hælisleitendum þjónustu og búsetuúrræði í senn. Borgin skuldbindur sig ennfremur til að taka bæði við einstaklingum og allt að fimm fjölskyldum.
Samningurinn er sveigjanlegur upp að ákveðnu marki og getur Útlendingastofnun farið fram á það við Reykjavíkurborg að búsetuúrræðum verði fjölgað tímabundið. Greitt er daggjald að upphæð 7.500 kr fyrir hvern hælisleitanda og árlegt fastagjald fyrir þjónustuna sem nemur 11.550 milljónum króna til að standa straum af launa- og rekstrarkostnaði.
Samkvæmt upplýsingum frá Önnu Kristinsdóttur mannréttindastjóra Reykjavíkurborgar búa allir hælisleitendur sem Reykjavíkurborg þjónustar í leiguhúsnæði á almennum markaði og eru ekki í íbúðum Félagsbústaða.
Enn fremur hefur Reykjavíkurborg boðist til að taka á móti hópi flóttamanna og bíður eftir svari frá velferðarráðuneytinu varðandi það hvenær af því getur orðið.
Velferðarsvið Reykjavíkurborgar sér um þjónustu við hælisleitendur. Öll börn sem dvelja á vegum Reykjavíkurborgar fá þjónustu í leik- og grunnskólum.
Samningurinn gildir til 31.desember 2016.