13 skrýtnir jólasveinar – Nútímaþjóðsögur fyrir börn og fullorðna
Nær Stekkjastaur að gefa góðu börnunum í skóinn? Hann á bara síðasta húsið í Hnífsdal eftir en hann er með svakalega tannpínu og það er tvísýnt hvort það takist. Þá reynir á aðstoðarmanninn hans, hann Starra. Þá var það Pottaskefill sem steig á jólakúlu og slasaði sig svo illa að Ugla litla — betur þekkt sem Úa — þarf að leysa hann af. Hvernig bregst Úa við þegar lítill prakkari í Hafnarfirði vaknar á meðan hún er að lauma kartöflu í skóinn hans?
Barnabókin 13 skrýtnir jólasveinar fjallar um gömlu íslensku jólasveinana og nokkra hjálparkokka, sem hingað til hafa ekki fengið mikla umfjöllun. Hver og ein saga er sjálfstæð og hugmyndin er að foreldrar geti lesið þær fyrir börnin sín, í aðdraganda jólanna. Þannig mætti t.d. lesa söguna um Stekkjastaur og Starra þann 12. desember og sagan um Giljagaur og Krumma kvöldið eftir.
Alls telur bókin 13 fallegar og skemmtilegar sögur um hinar ýmsu hremmingar sem jólasveinarnir og aðstoðarmenn þeirra lenda í en ná með hugkvæmni, dugnaði og smá heppni að sjá til þess að íslensk börn fái þrátt fyrir allt eitthvað í skóinn. Til þess að gera ævintýrin „íslenskari“ aflestrar hefur hverjum aðstoðarmanni verið gefið nafn í höfuðið á íslenskum fuglum, svo sem Lóa, Glókollur, Rjúpa, Krummi og Fálki.
Höfundur bókarinnar er Ómar R. Valdimarsson blaðamaður og lögmaður, sem plataði móður sína, kraftakonuna, hárgreiðslumeistarann og listmálarann Dagmari Agnarsdóttur til þess að myndskreyta bókina með fallegum myndum.
Mæðginin Ómar og Dagmar.
13 skrýtnir jólasveinar er gefin út af bókaforlaginu Unga ástin mín, sem hefur keppst við að gefa út vandaðar, fallegar og þroskandi barnabækur allt frá stofnun útgáfunnar árið 2006.